Read Konyak Naga 2 THESSALONI 2 Bible Online

2 THESSALONI 2 - Konyak Naga bible

2 THESSALONI 2

¹Jeiheinaolan sha-a Youngwanpa Jesu Khrista yulak hüyange teman jamshe I tangte jemlak jeng,

²Youngwanpa nyih sha-a, ngohnang she, yaha me jeyah, ngao me jeyah, toman mepu she nyanpu laime jeyah; numan kenmong mamshe yepotamlak yejema-a mong yeshanglak jingne toman-e numante tongnang.

³Hangkih tingme-o aowe-o numan lowe lamne tahtam; hangjingne üwangne ngao yejaipupa manpei manpei, hüyange ünu kahta, tüopa-a mahlakpa ha ütahte ngaiye mantam mantam, tüopa nyih yepeilak;

⁴hangjingne Kahwang min me nyikpu, yejema-a hanghelante khümnang, Iye tüolan üshei kaiye büangnang; hüyange I nying nyingke ütangpa me inne tamyange Iye Kahwang khümjing me shotyange, yoi nying nyingke Kahwang she hüonang.

⁵Tao numan phei ngohwante tüolan jeng numante i she numan-e yeteih tüopu a?

⁶I yoi ju hei hipak me ütahte ngailak jingne, sha-a Ite hangheye tükke angnang, tüopa numan-e shinge ngohnang.

⁷Hangjingne ngaokeng yejaipu lowe angpu ngao shaaji sha-a toiling nang; hüpoi sha-a aowe shuinang I yah manteiwante hei tüopa ütahte ngai tamne ok.

⁸Tüophei me tüopa ngaokeng yejaipa ütahte ngaine tamlak; hüyange Youngwanpa Jesuwe I ju lüowe I toilak, hüyange I yupu ütahte ngaipu kaiye I ükengne menge tamlak.

⁹I yupuwa satanne lingpu mepu ngohlak, hüyange mahlaklan jingne tüo ngoiye hüyange füo üshei hüyange ngaoleih yashanyali,

¹⁰hüyange yejaopu lowelampu üshei omme ngohlak; hangjingne iman yinlak jingne iman-e ngaoting te yeken.

¹¹Tüojingne hanghepa üting yeje tüote menge tamlak jingne Kahwange ümeng lingpa iman tangte shon;

¹²tüowe aoyinne, ütingpate yemengpe, ünu toime mongmei iman ngaophün ne tamlak.

¹³Hüpoi, Youngwanpawe kenpu jeiheinaolan, numan jingne toman-e Kahwangte minyong phalak jinte shunang, hangjingne Yahawe jaowetam-e hüyange ngaoting te mengpu me yinyelak jingne Kahwange üwang memuh numan leyangki.

¹⁴Youngwanpa Jesu Khrista müktishiwa omlak jingne Iye toman pungao ümei kaiye numan nyik.

¹⁵Tüokhei, jeiheinaolan, mongjüonge yongtüoh, hüyange toman-e nyanpulai kaiye jeyah, ngao me jeyah, numante hanghe ngao, tüopa tüktüoh.

¹⁶Sha-a I teman Youngwanpa Jesu Khrista I nying nyingke, hüyange teman Üpa Kahwang, aowe temante ken, hüyange temante shüpshe kaiye jinte üküm yenangpu toloimei hüyange monghümpu ümei pha.

¹⁷Iye numan mongjang toloimei tamtüoh, hüyange toi hei ngao ümei üshei me numan mongne tamtüoh.