Read Konyak Naga 1 TIMOYHY 1 Bible Online

1 TIMOYHY 1 - Konyak Naga bible

1 TIMOYHY 1

¹Paul, teman Yinyepa Kahwang hüyange teman monghümpu Khrista Jesu ngaokeng kih-e, Khrista Jesu lampu mepu:

²Ütinglakpu me ü-ütingpa ha Timothy tangte: Üpa Kahwang hüyange teman Youngwanpa Khrista Jesu mepu shüpshe, yayeng shüpshe hüyange chingmei ngohtüoh.

³Tao Macedoniate taiwante, hangke nangte ngaokeng pha, shaa-o hüke muh phanang; nange Ephesia me ngoh-e kahta ütam-e konnyüopa ülaopakih yenyüolak,

⁴yejema-a pungao hei üküm yenangpu jongnyoi pungao, hangheye Kahwangte ütinglakpu me ngohpu shaoshanpu nanleiye teelapu ju ngaine tamnang, tüolan me iman-e mong yephalak jingne büangtüoh.

⁵Hüpoi ngaokenge mongpuwa jaoshe-ihpu mongjang hüyange kenmong ümei hüyange ütinglakke kenpu mepu ngaipu yayeng jingne ngohnang.

⁶Ütam tüopa mepu lüppe ye-e, jajang japu ngao ipu yeme mahteki;

⁷hüyange iman-e hanghe i, yejema-a hanghe jeng iman-e ngaonang, tüopa yeshing okyapoi, ngaokeng konnyüopalan-e menghunang.

⁸Hüpoi ütam-e ngaokenga shuwe jonma-a, tüopa ümei ngohnang she toman-e shing.

⁹Hüpoi teihlak wongpong, hüke ütingme ngohpalan jingne ngaokeng yeling, hüpoi ngaokeng yejonpalan hüyange ngao yejaipalan jingne, Kahwangte yenyampalan hei ünulan jingne, hüyange yejaopulan hei wanglamte yaowelepalan jingne, payonglan toipalan hei nyuyonglan toipalan jingne; kahta toipalan jingne,

¹⁰nuweshakpalan jingne, netanne netanphei wüotoi lingpalan jingne, kahta phopalan jingne, leihpalan jingne, ngaoleih me jiengjeppalan jingne,

¹¹hüyange ü-yak me tüohpu moiman Kahwang müktishiwa pungao ümeikih ütingme nyüopu phei tüi-e ülao ngohma-a, tüopa kihpu jingne ngaokeng ling.

¹²Aowe üte wongpha, hüke Youngwanpa Khrista Jesu min yongnang, hangjingne Iye tao monghümpupa she ipu me omyange I shaoshanlak jingne tao le.

¹³Tao üshongpe phoiwümpa, shangnetampa hüyange menge tampupa ne ngohyapoi, tüoyangpoi taowe yayeng shüpshe tüo; hangjingne manmengpe taowe tüopa yeshingpe ling;

¹⁴hüyange Khrista Jesu me ngohpu ütinglakpu hüyange kenpu phei üjingne teman Youngwanpa shüpshe ünyei wangmanne jaalun.

¹⁵Hüke ünulan yinlak jingne kahtoknyute Jesu Khrista pei she iyangpuwa üting hüyange eihja she yahlak-a wangpu. Hüyange ünulan yo me taowa shemengpupa.

¹⁶Hüyange aoyin jinte üküm yenang üyin jingne Ite menglak, imante leppu ja ne, Jesu Khrista yoi lüowe wangngoiye nün-okpu üshei üte, üjengpakih, ütahte ngaiye hüolak, tüopa jingne taowe yayeng shüpshe tüo.

¹⁷Sha-a jinte üküm yenangpu Ahngpa, yemahlak, ye-nge oklak, hüyange Kahwang-a jashing, I tangte iyeshepu hüyange müktishiwa jinte üküm yenangpe ngohtüoh. Amen.

¹⁸Ü-ha Timothy, wehok ümei hoklak jingne, üshongpe nang jeng itte angpu ngaolanke taowe nangte tüopa ngaokeng shunge tüohnang.

¹⁹Ütinglakpu me tükyange hüyange kenmong ümei me angtüoh. Ütam-e tüopa ütinglakpu hüyange kenmong ümei mepu yanpu jingne, iman ütinglakpu yenglin hemteki.

²⁰Iman yo me Haimenas hüyange Alexander; iman-e Kahwangte phoiwümpu yengaolak imante konnyüolak jingne, iman-a taowe satante phünne phayangki.