Read Konyak Naga 1 TIMOYHY 3 Bible Online

1 TIMOYHY 3 - Konyak Naga bible

1 TIMOYHY 3

¹Ütam-e bumeinok me bishop (üjupa) toishao yamma-a, Iye toimei linghunang tüopa ngao üting laklakpa.

²Tüokhei bishop (yahalanyompa) ja-a ümeng yenangpu, sheko ja yahpu, kenting mongtapu, teihnyüowe okpu, wangngoiye teih-e okpu, yinpate paowe okpu, nyüolak jingne üpong tüowe okpupa ne menglak wongpong;

³yu jok hah-ngapa, yejema-a mengshiye shette kempa yeje; hüpoi innyaipu, teelapu yeje, yejema-a nginte kenpa yeje;

⁴yoi noksa meimeiye wanglam lam-e okpu, hüyange yoi hayimlan sheminlam pheme wangshüm phei ange okpu kahta ne menglak wongpong;

⁵hangjingne kahta jawe yoi noksa me wanglam lampu yeman ma-a, Iye hangke Kahwang bumeinok paowetüklak?

⁶Otapu wonge naowe, kahshih-e yeitampu me yeyeilak jingne, I mengpu üla ne yejelak;

⁷tüophei jamme Ite yaopu ye-ngelak hüyange kahshih tün me yeyütlak jingne, ü-at me ngohpalanne monghahpu ja ne menglak wongpong.

⁸Hüke muh deaconlan ünyei wangngoilak yang, yee ni yeje; yu meiyange yingpu yeje, hahshempu me lahnyikpu yeje;

⁹iman kenting shakke, lowe angpu ngaote tükke jonpu kahtalanne menglak yang.

¹⁰Hüyange üwangne imante tokleilak yang, hüwante iman ümeng yenangma-a, imante deacon toi lingne tamtüoh.

¹¹Hükemuh iman shekolan-o ünyei wangngoilak yang, ngaoleih iye ngupu yeje, hüpoi kenting mongtapu, üshei me mongtapu, üshei me monghümpulan ne menglak yang.

¹²Deaconlan ne sheko ja hei yahlak, hüyange yoi hayim hüyange noksa mei meiye wanglam lamne tamtüoh;

¹³hangjingne aoyinne deacon toi meimeiye lingnang, iman-e yoi nying nyingke toimei hüyange Khrista Jesu me ngohpu ütinglakpu me yeonge wongnangpu küw tüonang.

¹⁴Tao nang tangte mamshe peilak teihnang, hüpoi taowe tüolan nyüoweleipu ngao ütam nyannang;

¹⁵tao shonne ngohma-a, shongnyu hüyange ütingpa phatnyu hanghepa Kahwang nok, hüke üyin Kahwang bumeinok me kahtawe hangke jonlak wongpong tüopa nange shinglak jingne nyannang.

¹⁶Ngao nüngneilak yenang, teman jing mengpu wanglam kahnyingwüngha shejaopupa ngohnang: I mei me ütahte ngai, Yaha me tingetampu tüo, wangdang shongmokpalanne nge, jatlan yo me nyüowe tam, kahtoknyu me yelakpe mengteki, müktishiwa me woi in.