Read Konyak Naga 1 TIMOYHY 4 Bible Online

1 TIMOYHY 4 - Konyak Naga bible

1 TIMOYHY 4

¹Sha-a Yahawe meimeiye inang, phei me kahta ütam ütinglakpu mepu yanlak; iman-e ngaoleih yaha ngao jailak hüyange laawe nyüopu pheite woilak.

²Tüopa nyüopuwa kahta lowe tampu üleihpa, hüyange yan üshem-e jakyangpuke juteih li mahtepu kaiye pei.

³Iman-e nokyamlak tiennang, hüyange mengpalan hei ngaoting shingpalan-e minyonge yahlak jingne Kahwange hanghe hahying ling, tüolan mepu yanne ngohlak ngaokeng pha.

⁴Hangjingne kahtawe minyonge yahma-a, Kahwange lingpu toilam üshei ümei shaha ngohnang, hüyange yeyahlak hango yenang.

⁵Hangjingne tüopa-a Kahwang ngao hüyange yoppu kaiye jaowe tamnang.

⁶Nange tüolan ngao jeiheinaolan mongme angne tamma-a, nange hanghe ütinglakpu hüyange ümei nyüopu jaiye jonnang, ütinglakpu ngaolanne uhying, nang Khrista Jesu shaoshanpa ümei ne menglak.

⁷Kahwang ye-ompu hüyange pungao ülang ngayoun-e ngaopalan te tahjai. Kahwang shingpu me ngohlak nang nying nyingke nyüoleiyah.

⁸Hangjingne pümme ngange lingpuwa üjinghapu jingne hei küw, hüpoi Kahwang lepuwa üshei jingne küw ngohnang; hangjingne sha-a hanghe üyin ngoh hüyange ngoikülak üyin ngoh, tüo jingne janpu ngohnang.

⁹Tüopa ngao üting laklak, hüyange üshei yahpu oklak wangnang.

¹⁰Hangjingne tüopa jingne toman-e toi lingnang hüyange ngangnang, hangjingne toman-e üyin Kahwang, ao kahta üshei hüyange ünyeine mengpalan Yinyepa ngohnang, Ite monghüm nang.

¹¹Nange tüolan ngao phatüoh hüyange nyüotüoh.

¹²Nang naoshe hipak aowe-o ye-i-yeshene tahtam; hüpoi ngaome, üyin wanglamme, kenpume, ütinglakpu me, jaoshepu me, mengpalan shaome nang leppu ja ne ngohtüoh.

¹³Tao manpei manpei nange ükhong sheshao me laingao ipu, hengpu hüyange nyüopu me mongpha tüoh.

¹⁴Lwngmei lanne yak shingpuwe, hi-ngao ngaipu kaiye nangte phapu hanghe hünghao nangme ngohnang, tüopa winne tah-ang.

¹⁵Hüyange üshei shaome nang jaalunpu ütahte ngailak jingne, tüolan me mongpha tüoh, hüyange tüolan me ngangtüoh.

¹⁶Nang yoi jeng hüyange nange nyüopu jengte mong phatüoh. Tüolan me yelakpe ngohtüoh, hangjingne tüolan lingpu me, nange yoi nying nyingke hüyange nang ngao jaipalan moini yinlak.