Read Konyak Naga 1 TIMOYHY 5 Bible Online

1 TIMOYHY 5 - Konyak Naga bible

1 TIMOYHY 5

¹Lwngmei kahtate tahtee, hüpoi Ite I-a nangpa ja leye ngaotüoh; naoli lante nao yimankih,

²wunyulante nyuyongkih, hüyange naoyha te naolinyu kih, jaoshapu üshei me hengne tamtüoh.

³Wamnyulan aoyin ütingpa wamnyu ngohnang imante yihnoonpu hüotüoh.

⁴Hüpoi wamnyu ütam-e yoi hayim yejema-a huyim ngohma-a, iman-e üwangne iman yoi noksa me mengpu wanglam tükke jonpu nyüolak, hüyange yoi nyupa phuhshümlak shingne tamtüoh. Hangjingne hatüo Kahwang shaome yahpu oklak ngohnang.

⁵Hüpoi ao ütingpa wamnyu hüyange yha shaha ngoh, yhawe Kahwangte monghümpu angnang, hüyange wangnyak wangngai, yoppe tongpu hüyange yoppu me yelakpe ngohlak;

⁶hüpoi wamnyu aowe iymei toi lingnang, yha üyin ngohwan temuh ümang ngohnang.

⁷Imante teetamlak ne yengohlak jingne tüolan ngao-o itüoh.

⁸Hüpoi ütam-e yoi pheipulan, ünyei ne yoi noksa jingne paowetükpu yengohma-a, Iye ütinglakpute yejan hüyange I yemengpalan phei shemengpupa.

⁹Nyupuh wangpeng dewok mai yejema-a ni lümme toitai yangpu ao-o wamnyu ne tah i:

¹⁰hüyangpoi yha toimei jingne yeonge meiye toklak, aowe yoi ha jongne tam, namnopu hüowe, üjaolan ya poine tam-e, shangepongpa lan toloimeine tam-e, hüyange yha yoi nying nyingke toimei üshei jingne phünne pha ütingpa wamnyu.

¹¹Hüpoi shenaolipulan wamnyu ne tahyah, hangjingne aope iman-e Khrista te phün phayangphei te iy mei-e yah-hupu ünyei ngailakei toitai hunang,

¹²tüokaiye iman-e üwangne janpu winpu jingne, iman yeine tamnang.

¹³Tüo tokte iman-e nok ja mepu jate ngoiye wauwe jooklak shingnang; hüyange jookpu shaha yeje, ju moklak hüyange ye-omlak me omme yeje jepu ngao shinge yahnang.

¹⁴Tüokhei taowe shenaolipu wamnyulan-a nokne menge, moi paiye, noksa wanglam lamne tamhu nangki, hüyange yaoweletamlak jingne yemeipalante yafün phane yetamhu.

¹⁵Hangjingne ülao ütam-a Satan pheite taiteki.

¹⁶Bumeinokke ütingpa wamnyu paopu oklak jingne mengpalan sheko ütam meitam wamnyu ngohma-a, Iye iman paotüoh, hüyange bumeinok hangki yih ne tahmeng tam.

¹⁷Lwngmeilan aoyinne meimeiye wanglam lamnang, ünyei ne aoyinne ngaome hüyange konnyüopu me toiling nang, imante nanmee üphong ni nyeiye phapuwa wangnang she teihtüoh.

¹⁸Hangjingne ngaolaiye inang, “Mahu tahnoiwante nange ju tahbüangtüoh.” Hüyange “Toilingpawe yoi nanmee tüolak wangnang.”

¹⁹Lwngmei phei tüi-e ngaipu ngaote saki ni yejema-a lüm ngoiye yenangpute aope-o tah yah.

²⁰Ülaolanne nyamme teilak jingne ünu jonpalan te ükhong sheshao me teetamtüoh.

²¹Meimeiye yeshingpe ngao yephünlak, tüolan nange jonlak hüyange sheta leiye hango yelinglak jingne, Kahwange hüyange Khrista Jesu hüyange leyangpu wangdang shongmokpalan sheshaome taowe nangte tüo inang.

²²Youngwanpa toishao jingne jaowe tamwante mamme kahta aote-o yakke tahshing; yejema-a eiha ünu me tah-om. Nang, nang nying nyingke jaowe angtüoh.

²³Shaaji yeng shaha tahying, hüpoi nang sea-mong hüyange yelakpe dakpu ngohtepuwe wuwüngti üjingha yingtüoh.

²⁴Kahta ütam ünu lanta-akke, hüyange ngaophün jingte tingkhakke woinang; hüpoi kahta ütam ünu-a phei me ngenang.

²⁵Hüke toimei lanta-akke; hüyange hanghe ümei yeje, tüolan-a yeyüo ok.