Read Konyak Naga 1 TIMOYHY 6 Bible Online

1 TIMOYHY 6 - Konyak Naga bible

1 TIMOYHY 6

¹Kahwang min hüyange teman-e nyüopu yeyao tamlak jingne, hangshin peitüp phangme rha ne menge ngoh iman-e yoi nokpu te iyeshelak wangnang she teihtüoh.

²Hüyange aoyin rhawe wanglamte mengpu nokpulan ngohnang, iman-e iman-a jeiheinao ne menge imante ye-i-yeshepe tahling. Hüpoi hüke linghah shepu nanleiye iman-e shemeishe shaoshantüoh, hangjingne toimei küw yahpalan-a mengpalan hüyange iman me kenpu ngohnang. Tüolan ngao nyüotüoh hüyange hengtamtüoh.

³Kahta ütam-e nyüopu ülaopakih nyüoma-a, hüyange teman Youngwanpa Jesu Khrista ngao me, hüyange ütingpa me nyüopu me teimong pu yenangma-a;

⁴I otapu loinang, hüyange hango yeshing. I me yemeipu me teilalak lahnyikpu hüyange ngao jingne teepu, hüyange tüowe müktakpu peitam nang; juteih me mong yejampu, tahleih me tienpu, mongyehümpu ümeng,

⁵hüyange mong yejaope lakpu hüyange ngaoting yenangpu kahtalan mepu teelapu ngainang. Mengpu wanglam-a haklak lam she iman-e teihnang.

⁶Hüpoi monghah pupa phei Kahwang lepu ütingme küw üyong ngohnang;

⁷hangjingne teman-e tüopa kahtoknyu te hango yah yepei, hüyange tüopa kahtoknyu mepu hango yah yetailak.

⁸Hüpoi teman me hahlak hüyange inlak nyemo ngohma-a, tüopawe monghah ngohhah.

⁹Hüpoi aoyinne hakpa ne menghu iman tokpu me hüyange tün me, hüyange ngapa hüyange jajang jawe lahnyikpu me yeinang; tüokihpu kahtalan ümeng hüyange mahlakpa me hüngne tamnang.

¹⁰Hangjingne nginte kenpuwa ümeng ülam üshei yalah ngohnang; hüyange tüopa yampuwe kahta ütam ütinglakpu mepu yejepulam te woiteiye, mongmengpu wangman-e yoi nying nyingke lüowe lütnang.

¹¹Hüpoi nang, O Kahwang kahta, tüolan üshei angtüoh, hüyange khakshupupa, Kahwang lepu, ütinglakpu, kenneteihpu, nünne okpu, hüyange innenyaipu jingne ngangtüoh.

¹²Üting- lakpu wehok ümei hoktüoh; jinte üküm yenangpu üyin hanghe jingne nang nyik, hüyange saki nangjangpu yo me saki ngao ümei jan, tüopa üyin tüktüoh.

¹³Üsheite üyin phapu Kahwang sheshao me hüyange Pontius Pilate shongme saki ngao ümei janpu Khrista Jesu shaome,

¹⁴nange teman Youngwanpa Jesu Khrista manyu manyu, ngaokeng üko yenangpe hüyange yephoipe anglak jingne taowe nangte inang;

¹⁵I yupuwa yoi hipakme Kahwang, ao moihei manpupa hüyange Youngwanpa ja shing, ahngpalan tangte Ahngpa, nokpupalan tangte Youngwanpa, ütahpa wanglam lampa,

¹⁶shongte yewen okpu wangngai me ngohpu ao aowe-o aope-o mannge, yejema-a nge ne ye-ok, Iye hüolak; Ite wangshüm hüyange jinte üküm yenangpu wanglam lampu ngohtüoh. Amen.

¹⁷Aoyin kahtoknyu üyin me hakpa iman mong yeyonglak, yejema-a ütingme yeshingpu toinyu me iman monghümpu ye-anglak, hüpoi Kahwang, aowe sheminlamphe temante wange yahlak üshei phanang, Ite monghümne tamtüoh.

¹⁸Iman-e ümei linglak, toimei me hakpa ne menglak, teitamlak jingne tümme ngohlak hüyange teimeilak monge ngohlak;

¹⁹ütingpa üyin tüklak, ngoikülak hipak jingne yoi jingne nyoijing ümei tümne tamtüoh; tüolan üshei imante ngaokeng phatüoh.

²⁰O Timothy, nangte hanghe lingne tam, tüopa yomtüoh. Hanghete “Shingemanpu” she nyik hüyange Kahwang yenangja she lapu hei ngayounne moppulan mepu yanne ngohtüoh.

²¹Hangjingne tüolan iman me je-nangpu ne she teihwante ütinglakpu mepu ünyong yete taiteki. Nang phei Kahwang shüpshe ngohtüoh.