Read Konyak Naga 2 TIMOYHY 1 Bible Online

2 TIMOYHY 1 - Konyak Naga bible

2 TIMOYHY 1

¹Paul, Khrista Jesu me ngohpu üyin janpukih Kahwange mongpu kih-e Khrista Jesu lampu mepu:

²Taowe kenpu ha, Timothy tangte: Üpa Kahwang hüyange teman Youngwanpa Khrista Jesu mepu shüpshe, yayeng shüpshe hüyange chingmei ngohtüoh.

³Taowe wangnyak wangngai yoppu me yelakpe nang teih tüowante, ü-pajeiyonglan mepu juteih mongjang khakshuwe hanghepa Kahwangte taowe shaoshan nang, I min yongnang.

⁴Nang mükphi teihtüonang; hüyange tao mongongpuwe maatamlak jingne, nang ngelak taowe leitan nang.

⁵Hanghepa ütinglakpu üwangne nangpi Lois hüyange nangnyu Eunice me ngoh, hüyange nang mongjang me-o ngohnang she taowe meimeiye ütinglak nang, nangme ngohpu tüopa lahnyikpu ütinglakpu taowe teih tüoyangki.

⁶Tüojingne ü-yak shingpu kaiye Kahwang hünghao hanghepa nangme ngohnang, tüopa loongtamlak jingne taowe nangte teih tüone tamnang.

⁷Hangjingne Kahwange temante nyamlak yaha yeje, hüpoi ünganwong hüyange kenpu hüyange tükke okpu yaha pha.

⁸Tüokhei teman Youngwanpa jingne saki phane, yejema-a I jingne küppe angpupa, ü-jeng jingne tahwüo; hüpoi Kahwang ünganwong kaiye pungao ümei jingne shangpu nüntüoh,

⁹Iye teman yin, hüyange üjao nyikpuwe teman nyikyangki, teman toishaoke yeje, hüpoi Iye mongpu hüyange shüpshe hanghepa jin ükong wangshao me üwangne Khrista Jesu me temante phawe ngoh,

¹⁰hüpoi sha-a teman yinyepa Khrista Jesu peipu kaiye ütahte ngai, tüopa mongpu hüyange shüpshe kih-e teman nyik. Iye lipupa mahne tamme, pungao ümei kaiye üyin hüyange yemahlakpa wangngai tangte woipei.

¹¹Kahwange tüopa pungao ümei jingne tao konnyüopa, hüyange lampu, hüyange nyüopa ne menglak jingne leyangki;

¹²hüyange tüojingne tao tüolan shange pongnang. Tüoyangpoi tao yewüo, hangjingne tao aohite mengyangki taowe I shing, hüyange tao I yakme tüopa nyih jingne hanghe angetam, tüopa Iye yomme ngohne ok, tüopa taowe meimeiye ütinglak nang.

¹³Khrista Jesu me ngohpu ütinglakpu hüyange kenpu me nange hanghe nyüopu ütingme ü mepu jai, tüopa leppu mongjüonge tükke angtüoh.

¹⁴Ngaomei hanghepa nangte kiyetam, tüopa nange teman me nyoipu Yaha Üjao kaiye yomme ngohtüoh.

¹⁵Asia me ngohpu üsheiye ü-mepu lüppe yeteki she nange shingnang; iman yo me Phygelus hüyange Hermogenes.

¹⁶Onesiphorus nokte Youngwanpawe yayeng shüpshe tüoh, hangjingne Iye hipak phe me tao toloimei ne tamnang, hüyange tao küpnok me ngohpu jingne. I yewüo;

¹⁷hüpoi aope I Rome me pei, Iye tao ngange yam hüyange tüo;

¹⁸tüopa nyih me Youngwanpa mepu yayeng shüpshe tüopu oklak, tüopa Youngwanpawe Ite phatamshi-hüyange Ephesia me Iye hangshin jamme shaoshan, nange meimeiye shing.