Read Konyak Naga 2 TIMOYHY 2 Bible Online

2 TIMOYHY 2 - Konyak Naga bible

2 TIMOYHY 2

¹Tüokhei, Ü-ha, Khrista Jesu me ngohpu shüpshe me nang wongnangyah;

²hüyange saki yo me ü-mepu nange hanghe jai tüomuh üne-o ülaote nyüone okpu: hüyange monghümpu kahtalante-o ki ne tamtüoh.

³Khrista Jesu kengphet ümei ja kih, nange ü-phei shangpu nüntüoh.

⁴Kengphet toishao me ngohwante, aowe I kengphet ne menge tam I mong hahtamlak jingne I ching kahta toiphei yeshei.

⁵Hüyange wonpa üwan ao phetnang, Iye ngaokeng phei shuwe yephetma-a, Ite shaoshaoh shaohne yetam.

⁶Kahhampa aowe ngange lingnang, Ite üwangpa ülick tamlakyang.

⁷Taowe hanghe inang tüopa teihtüoyah, hangjingne Youngwanpawe shemin lamphe me nangte shinge oklak yahphalak.

⁸Ü-pungao ümei kih, lipu mepu yange yepu David nokli mepu Jesu Khrista teihtüoyah.

⁹Tüopa pungao ümei jingne tao toilangpa kih shapume shangpong nang; hüpoi Kahwang ngaowa shayange yenang.

¹⁰Tüokhei leyangpulan-e Khrista Jesu me ngohpu yinyepu hüyange jinte üküm yenangpu müktishiwa tüolak jingne, taowe iman jingne üshei nünnang.

¹¹Hüke iye angpuwa tingnang; “Teman Iphei lipune mengma-a, teman-o Iphei üyin ngohlak;

¹²teman-e nün-okpu ne mengma-a, temane-o Iphei wanglam lamlak; teman-e I yeyahpu ne mengma-a, Iye-o teman yeyahlak;

¹³teman mong yehümpe ngohma-a, I monghümme ngohnang; hangjingne Iye yoi nying nyingke yejeja she ye-ilak.”

¹⁴Tüolan nange imante teihne tamtüoh; ngao jeng me yemoplak jingne Youngwanpa shongme imante ngaokeng phatamtüoh. Tüowe hango okpu ye-nge; hüpoi jaipalan hei mengne tamnang.

¹⁵Kahwang ütingpa ngaolan khakshuwe nyüopu ja ne, I toi jingne yewüope toilingpa ja ne; Kahwang mepu monghahpu lanshe tüolak jingne, nange okpu shinne meiye lingtüoh.

¹⁶Kahwang yeshingpu hüyange ngangao ngaopalan mepu yantüoh; hangjingne tüowe kahtalan ünyei ünyei Kahwang yeshingpu yete woinang.

¹⁷Hüyange iman ngaowe mutükke ühak hahpuke hahlak. Iman yo me Haimenas hüyange Philetus,

¹⁸tüolan kahtawe yange yepu linne kümteki she iye, ngaoting mepu ünyong yete taiteki; hüyange kahta ütam ütinglakpu menge tamnang.

¹⁹Hüpoi Kahwang yepolakpa yafün, tüopa füosang tüpyange yongnang; “Aoyin, I jing ngohnang Youngwanpawe shingnang,” hüyange “Aoyinne Youngwanpa min jonyapeih I yejaoyeshapu mepu yanne tamtüoh.”

²⁰Hüpoi nok üyong ja me hon hei khüm toihei ngohpu ne yeje, hüpoi pee hei kahtok toi-o ngohnang; hüyange tüolan ütam minyonglak jingne, hüyange ütam min-yeyonglak jingne, ngohnang.

²¹Tüokhei ütam-e yoi nying nyingke tüolan mepu jaoshayange ngohma-a, I minyonge tamlak (toine) wangpu, nok nokpupawe jonlak wangpu, hüyange toi ümei üshei jingne tümme tapu ngohnang.

²²Tüokhei naoshewan otamaohepu mepu yantüoh hüyange khakshupu, ütinglakpu, kenpu, hüyange chingmei te tüolan phei jamme aoyinne jaoshepu mongjang phei Youngwanpate nyik tüolante mong phatüoh.

²³Hüpoi üngapa hüyange woopupa phei teingaopuwe teepu hei ngaitam nang she shinge, tüolan-a angtüoh.

²⁴Hüyange Youngwanpa shaoshanpawe yetee yelalak yang hüpoi üshei phei innenyaipu, nyüolak jingne deitükpu, nün okpa ne menglak yang;

²⁵hüyange yemeipalan phei innenyaipu kaiye tingne tamtüoh; aowe shingpu Kahwange ngaoting shingpu yete monglüppu imante phakülak;

²⁶hüyange kahshih mongpu linglak jingne iman I tün me pho phei me, iman I tün mepu yinlak jingne iman me juteih peilak.