Read Konyak Naga 2 TIMOYHY 3 Bible Online

2 TIMOYHY 3 - Konyak Naga bible

2 TIMOYHY 3

¹Hüpoi tüopa shing yahtüoh; hüke üküm nyih me nyam nyam shepu hipak peikülak.

²Hangjingne kahtawe yoite kenpu, nginte kenpu, otapu, helangkatwongpu, ngaomeng ngaotampu, nyupalante ngao yejaipu, minyong yephapu, yejao yeshapu,

³kahta yelepe yoi nyingke mengshipu, ümok hümme üyepu, phoitampu, yemeipe nyoipu, shihkhahpu, ümeipate müktakpu,

⁴shümpa phei wepane mengpu, jonhupu kih jonpu, otapuwe loipu, Kahwang nanleiye yoi mongmeilakte kenpu;

⁵Ütahme hüolak jingne mengpu wanglam yahlak, hüpoi tüopatepu ünganwong yeyah ok. Tüolan kihpu kahta mepu yantüoh.

⁶Hangjingne iman ütam-e noksate ongnang hüyange wong yenangpu sheko, ünuwe sheppe tamnang, hüyange lengpu üshei ngaiye tamnang;

⁷tüolan shekowe nyüopu lilite jainang hüyangpoi ütingpa shinge yeyah ok.

⁸Hüyange Jannes hei Jambres niye hangke Mosa phei tüi-e yong, hüke kahta mongjang me ümeng, hüyange ütinglakpu jeng yewangpu lanne-o ngaoting tiennang.

⁹Hüpoi iman nangjange yetailak; hangjingne tüopa kahta ni kih-e kahta üshei shaome iman ngawoopu ütahte ngailak.

¹⁰Sha-a taowe nyüopu, ü-nyoingoh, üyin me ü-juteih, ü-ütinglakpu, ü-nün okpu, taowe kenpu, ü-nün okpu wong;

¹¹tao shangne tampu, tao shangpu, Antiok me tao shangpu, Ikonium me, hüyange Listra me üte ngaipu, hüyange hanghe shangne tampu taowe nün ok, hüyange tüolan üshei mepu Youngwanpawe tao yintam tüolan üshei jeng nange shing.

¹²Ütingme, aoyinne Khrista Jesu me wangshüm hüowe ngohhu iman üsheiye shangne tampu ngelak;

¹³hüpoi kahta ümeng hüyange lowelampu nyoingoh nangpalan ne lo ne tamme hüyange yoi-o lowetamme, ünyei ünyei shemengpu pa ne menglak.

¹⁴Hüpoi nangepa-a hanghe shing hüyange hanghe me saki ütingpa nge tüome ngohtüoh; hangjingne aoyin mepu tüolan shinge yah tüopa nange shinge ngohnang

¹⁵hüyange hanghepa üjaolaiye Khrista Jesute ütinglakpu kaiye yinyelak jingne nang shingemanpa ne mengne tamlak oknang, tüopa nange naha memuh shinge ngohnang.

¹⁶Hangjingne Ngaolai üshei Kahwange hengtampu hüyange tüopa-a ütingpa, ümeng jingne teetampu, püohpu tingtampu, hüyange khakshupu üyin ngohlak jingne tingetamme nyüolak jingne shunang.

¹⁷Tüokaiye kahta aowe Kahwang shaoshan nang wangngoilak hüyange toimei üshei linglak jingne wangngoi nang.