Read Konyak Naga 2 TIMOYHY 4 Bible Online

2 TIMOYHY 4 - Konyak Naga bible

2 TIMOYHY 4

¹Taowe Kahwang shongme, hüyange üyinme ngohpalan hei litepulan ngao phünpa Khrista Jesu shongme, I ngaitampu hei I ahngchinge nangte ngaokeng phanang;

²nange ngaowa konnyüowe tamtüoh; hipak me hüyange hipak manngoipe lahnyiktüoh; luwe nün-okpu hüyange nyüopu khongkümpuwe teetamtüoh, tingetam tüoh, hengtamtüoh.

³Hangjingne hanghe hipak me iman-e ütingpa me nyüopu yenün oklak, hüpoi na te shükpu lanne menge, yoi mongpuke yoi jingne nyüopalan ütep ütep anglak,

⁴hüyange ngaotingpa jailak mepu iman na lüplak hüyange pungao ülang yete tailak, tüokihpu hipak peikülak.

⁵Hüpoi nange üshei me teihnyüopu ngohyah shangpu nüntüoh, konnyüopu toi lingtüoh, nange shaoshanpu toi wangne tamtüoh.

⁶Hangjingne tao shaaji phünne phalak yakme tükke oteiye ngohnang, hüyange tao yanlak hipak o-nang.

⁷Taowe hokpu meiye hokyangki, taowe üshao ngoiye phetyangki, taowe ütinglakpu angteki.

⁸Sha-a me peiye üjingne khakshupupa shaoshaoh tümyange ngohnang, hanghepa Youngwanpa, khakshupupa ngaophünpu toishao hünghao tüonyih üte phalak; hüyange üte shaha yeje hüpoi aoyinne I yukülakte kenne tanyangki iman üsheite tüopa phalak.

⁹Ü-tangte mamshe peilak nange ngangtüoh.

¹⁰Hangjingne Demaswe tüopa kahtoknyu te kenpu jingne, tao tüohyange Thessalonica te taiteki; Krescens Galatiate hüyange Titas Dalmatia te taiteki.

¹¹Luk shaha ü-phei ngohnang. Nange Mark nangphei woiye peikei; hangjingne shaoshanpu toime üjingne I meiyangpu wongpong.

¹²Taikhikas (Tychicus) Ephesiate taowe shon.

¹³Nang aope peilakeih, taowe Troas me Karpas yak me angyangpu phakshaoh ülao, hüyange laitep, ünyeine meisholaiteplan, tüolan yah peikei.

¹⁴Alexander, langyan aijonpawe üte yeonge yemeipe jon. I toishao shange Youngwanpawe Ite leihphalak.

¹⁵I jingne nango kentingyah, hangjingne Iye toman ngaote yeonge wongnange büang.

¹⁶Taowe üwangne yoijingne tienlak jingne lingwante, aowe-o ü-phei yejam, hüpoi üsheiye tao tüoh, hüpoi iman phei tüi-e hango tahlingtüoh.

¹⁷Hüpoi tao kaiye pungaowa wange jaine tamlak jingne, hüyange Yinhulan üsheiye jaiye oklak jingne Youngwanpawe ü-phin me yongyange üte wong nangne tam. Hüyange tao mailang ju mepu yin.

¹⁸Toi ümeng üshei mepu Youngwanpawe tao yinlak, hüyange I wangdang ahngching yete tao-o Iye yinlak. Ite müktishiwa jinte üküm yenangpe ngohtüoh. Amen.

¹⁹Taowe Priscilla hei Aquila, hüyange Onesiphorus noklante salam shonnang.

²⁰Erastus Korinth me ngohnang, hüpoi Trophimus dak-e Miletus me taowe tüoh.

²¹Nange eanyu manngoipe peilak ngangyah. Eubulas, Pudens, Linus, Klaudia hüyange jeiheinaolan üsheiye nangte salam phanang.

²²Youngwanpa nang Yaha phei ngohtüoh. Kahwang shüpshe nang phei ngohtüoh.