Read Konyak Naga TITAS 1 Bible Online

TITAS 1 - Konyak Naga bible

TITAS 1

¹Paul mepu, Kahwang shaoshanpa ja, hüyange Jesu Khrista lampu ja, Kahwange leyangpu ütinglakpalan tangte hüyange iman ütingpa Kahwang le pu shinge manpu,

²ngaokih-e ye-i-okpu Kahwange ükongwang memuh, üküm yenangpu hipak me üwangne hanghepa üküm yenangpu üyin phalak jan,

³hüyange yoi hipak me tüopa I ngao me ütahte ngai; tüopa üte tamyangki, hüyange teman Yinyepa Kahwang Ngaokengke taowe tüopa nyüonang.

⁴Titas, jamshe ütinglakpu me ü-ütingpa ha; Üpa Kahwang hüyange teman Yinyepa Khrista Jesu mepu shüpshe hüyange chingmei ngohtüoh.

⁵Taowe nangte hüopuke, yewangpu toishao wangetamlak jingne, hüyange chingphe me jeiyonglan lelak, tüopa jingne Krit me taowe nang tüoh;

⁶kahta ütam ümeng yenangma-a, hüyange sheko ja hei yahpu kahta ne mengma-a hüyange I hayimlan mengpalan hüyange mopne tampu ümengme ümeng yetüopu yejema-a yetükpu ye-i-pe ngohma-a, tüokihpu letüoh.

⁷Hangjingne Bishop ja-a, Kahwang yakjongpake ümeng yenangpe ngohlak yang; helangkatwongpa yeje, mamshe mongshih ngaipu yeje, yu yingpalan yeje, yak hünge kempalan yeje, hahnyakpu me shangnyakpu yeje;

⁸hüpoi yinpate lahnyikpu, ümeipate kenpu, yoi tangme monghümme okpu, ngaoting ipu, üjao, yoi nying nyingke tüke okpu,

⁹Iya ütingpa nyüopu te mongjüonge henge okpu, tüo kaiye Iye meiye ngaowe oklak, hüyange yejan okpalan yeitamlak jingne nyüopuke monghümpu ngao tüklakyang.

¹⁰Hangjingne jajang japu ngao ngaopu hüyange lowelampupa hüyange ngao yejaipu maawe ngohnang; ünyei ne shokhüpalan tüokihpu ngohnang.

¹¹Iman ju lakne tamlak yang. Iman-e ümeng küw jingne yeshupu nyüowe, noksa khongküm mahne tamnang.

¹²Iman yo me ja, iman yoi hipawe i, “Kritlan jinte ngaoleih nang, yinmok ümeng, jookpa hahnyakpa.”

¹³Tüopa saki ütingpa. Tüokhei iman ütinglakpu me wongnanglak jingne,

¹⁴hüyange Jehudilan pungao yeme, hüyange ngaoting mepu lüppe taipu kahtalan ngaokeng yeme mong yephalak jingne, nange imante menge teetüoh.

¹⁵Jaoshapalan tangte sheminlam phe jaonang. Hüpoi yejao yeshapalan hei yemengpalan tangte hango üjao yenang, hüpoi iman mong hüyange juteih mongjang moini yejao.

¹⁶Iman-e Kahwang shingnang she iman-e jannang, hüpoi iman toiye iman-e Ite yejan, hüyange iman nunushepu, ngao yejaipu, hüyange toimei üshei jingne yewang.