Read Konyak Naga TITAS 3 Bible Online

TITAS 3 - Konyak Naga bible

TITAS 3

¹Nange kahtalante tüo teihne tamtüoh, wanglam lampalan wongpheipulan phangme ngohlak, ngao jailak, toimei üshei jingne tümme ngohlak;

²hüyange kahta ao jeng-o ümeng ye-ilak, teelapu yengohlak, innenyaipu hüyange kahta üshei phei nyaishümme ngohlak.

³Hangjingne teman-o hipak ja me üngapa, ngao yejai, leihpa ne menge, lamme lamme shangne tam-e hüyange mongmei shaoshanpa ne menge tam-e, teikhahpu hei tei yeleihupu me ngoh-e, nulak hüyange jawe japhei teinuwe ngohyangki.

⁴Hüpoi aope teman Yinyepa Kahwang yayeng shüpshe hüyange kahtanyuhalan tangte I kenpu ütahte ngai;

⁵hüwante teman nying nyingke khakshupu toishao lingpuwe yeje, hüpoi I yoi yayeng shüpshe kih-e nishe puh-e baptipu hüyange Yaha Üjao ülane mengtampu kaiye Iye teman yintam;

⁶hüyange Jesu Khrista shüpshe kaiye teman tingetam-e, jinte üküm yenangpu üyin monghümpuke mothleipalan-e mengtamlak jingne,

⁷tüopa Yaha teman Yinyetampupa Jesu Khrista kaiye temante wangman-e küppe tamyangki.

⁸Tüopa ngao ütinglak lakpa. Hüyange Kahwangte mengpalanne toimei me tükke kentinge ngohlak jingne, taowe tüolan jeng nange meimeiye inetamhu nangki. Tüolan ngao kahtalan jingne meinang hüyange küw ngohnang.

⁹Hüpoi angsate teitongpu, nokphong pungao, moppu hüyange ngaokeng jeng teepu, tüolan üshei mepu nang yanne ngohtüoh; hangjingne tüolan me küw yenang hüyange jajang japu.

¹⁰Teitamne ngangpu kahtalan ünja ün-ni me teene tamyang pheima-a tahyah,

¹¹hangjingne hükihpu kahta ünyong yete tainang, hüyange yoi saki kaiye ümeng ne menge ünu omnang, tüopa nange shingnang.

¹²Aope tao nang tangte Artemas yejema-a Tychicas shonlakei, nange ü-tangte Nicopoliste peilak jingne ngangtüoh, hangjingne tüome eanyu linne ngohlak mongteki.

¹³Ngaokeng shingpu Zenas hüyange Apollos lamme hanghe me-o yetoiyenanlak ne tümme shontüoh.

¹⁴Hüyange teman kahtalante-o ülick yenangpe yengohlak jingne, wongpong hüyange toinanpu jingne toimei me tüklak jampong lak shingne tamtüoh.

¹⁵Ü-phei ngohpu üsheiye nangte salam shonnang. Ütinglakpu me temante kenpalante salam phatüoh. Numan üshei phei shüpshe ngohtüoh.