Read Konyak Naga HEBREW 1 Bible Online

HEBREW 1 - Konyak Naga bible

HEBREW 1

¹Lintepu jinme Kahwang meitam lilime hüyange ülam lilime hipalan kaiye puyimlante ngao;

²hüyangpoi tüopa ükümpa nyih me I Ha, ao Iye üshei mothleilak le, hüyange ao kaiye Iye kahtoknyu ling, Iye temante ngao ngaoteki.

³Iya Kahwang müktishiwa phihlangpu, hüyange I ütingpa leppu, hüyange I ünganwong ngaowe üshei ngohnetam. Aope Iye ünu poi, I ütangpa me teehepu ütahpa me yak jah yeme shot.

⁴Wangdang shongmokpalan mepu hangshin Iye ünyei shemeipupa min mothlei, teshinne I iman phei shetahpupa.

⁵Hangjingne Kahwange shongmokpalan ja te nehoi hüke ye i; “Nanga Üha, tenyih Tao Nangpane mengnang.” Yejema-a üne-o, “Tao Ipa ne menglak, hüyange I Üha ne menglak?”

⁶Hüyange üne-o, aope Iye üwangpa puhpu kahtoknyu te yahpei, Iye i, “Kahwangpa wangdang shongmokpalan üsheiye Ite khümtüoh.”

⁷Hüpoi wangdang shongmokpalan jeng Kahwange inang, “Aowe yoi wangdang shongmokpalan wangyangkih, hüyange yoi shaoshanpalan vünyi kih ling!”

⁸Hüpoi Ha jeng Kahwange inang, “O Kahwang, nang Ahngpa shotjing jinte üküm yenang, hüyange ngaoting pheipu wanglam lampuwa nang wanglam lampu ngohnang.

⁹Nange khakshupupate kenyangki hüyange ngaoting yenangpupa te nu; tüokhei Kahwang, nang Kahwange nang shümpalan phei sheyong she mongongpuwe minngawe phowe nang, leyangki.”

¹⁰Hüyange, “Youngwanpa, nange üwangme kahtoknyu lingyangki, hüyange wangdanglan me ngohpulan-a Nang yaktoi.

¹¹Iman mahtailak, hüpoi Nang yelakpe ngohlak; iman üshei nyemo kih ülang ne menglak,

¹²hüyange lümpu nyekih nange tüolan teye anglak, hüyange iman-a leijeilak. Hüpoi Nanga jakih muh ngohlak; hüyange nang wangpeng aope-o üküm yengoilak.”

¹³Hüpoi wangdang shongmokpalante Kahwange aope-o hüke ye i, “Taowe nang wepa nang yalokjing ne manling manling, nang Ü-yakjah yeme shottüoh!”

¹⁴Hümma-a wangdang shongmokpalan-a hanghe? Iman-a yahalan aoyinne Kahwang shaoshan, hüyange iman-a aoyinne yinyepu yahlakei tüolante jamlak jingne Iye shon.