Read Konyak Naga HEBREW 10 Bible Online

HEBREW 10 - Konyak Naga bible

HEBREW 10

¹Hangjingne ngaokenga ngoikülak jingne shemeipupa yashüm ja ne hei ngoh-e, tüolan jing ütingpa lepu yejepute, hanghe toidopulan wangpeng lep iye jakiye jinte do-nang, tüolanne ngaokenga ü-o-te wenpalante aope-o wangngoipu ne yemeng tam ok.

²Hüke yeje shihma-a tüolan dolak yelak hah shepu a? Hangjingne yoppe khümpalan-a, ja me jaowe tamtüome, ünu juteih mong jang shaaji yenanghah shepu!

³Hüpoi tüolan toidopu kaiye wangpeng lep iye ünu teihtüone tamnang.

⁴Hangjingne mahu üpong hüyange youn iy kaiye ünulan yahteine ye-ok.

⁵Tüojingne aope Khrista kahtoknyute yu, Iye i, “Phünne phapu hüyange toidopu nange yeyahhu, hüpoi ü jingne püm ja nange tümyangki.

⁶Üpüm lanshe jakke dopu hüyange ünu jingne toidopu me nange mongyemei.

⁷Hüwante taowe i, ‘Leihu, O Kahwang,’ ngaokeng laime üjingne nyanne ngohpuke, ‘Nange mongpu linglak jingne tao peiye ngohnang.’ ”

⁸Aope Iye ütangyete i, “Phünne phapu hei toidopulan hüyange püm nowe jakke dopu hei ünu jingne toidopu nange yeyahtei, yejema-a tüolan me mongyehah,” tüolan-a ngaokhüm kih-e do-nang,

⁹hüwante Iye i, “Leihuyah, taowe nange mongpu linglak jingne peiye ngohnang.” Nishepupa linglak jingne, Iye üwangpa-a yahteinang.

¹⁰Tüopa mongpu kih-e, Jesu Khrista püm üshei jingne ja me dopu kaiye, teman jaowetamteki.

¹¹Hüyange hanghe toidopuwe aope-o ünu yahteine ye-ok, tüolan jakih muh ngengpa liliye ütingme yongyange nyihjeih jin jinte shaoshanne do-nang.

¹²Hüpoi Khristawe ünu jingne jinte üküm yenangpu dopu ja toidoyang phei me, Kahwang yakjah yeme I shot;

¹³tüonyih mepu I wepalan I yalokjingne man ang man ang tanne ngohnang.

¹⁴Hangjingne ja me dopu kaiye Iye jaowetampalan jinte üküm yenangpe wangngoitam nang.

¹⁵Hüyange Yaha Üjaowe temante saki phanang; hangjingne üwangne Iye hüke i:

¹⁶“Tüopa jiengjeppu taowe iman phei linglak tüolan nyih linyang phei me, she Youngwanpawe inang; Iman mongjang me ü-ngaokhümlan taowe angtamlak, hüyange tüolan-a iman kenmong me taowe nyanlak.”

¹⁷Tüophei me Iye paowe i, “Shaaji taowe iman ünu hüyange ümeng yeteihtüolak.”

¹⁸Sha-a ümeken me tüolan jingne ümeng winpu ngohnang, ünu jingne dopu shaaji yenanglak.

¹⁹Tüokhei, jeiheinaolan, shaaji Jesu iy kaiye teman üjao nyoite onglak monghümpu ngohnang.

²⁰Ülapawe hüyange üyinlam hanghepa Iye teman jingne jhotpunye kaiye, hüke I iy kaiye eppetam,

²¹hüyange shaaji teman-e ngengpa üyongja Kahwang nokme ngohpuwe,

²²ütingpa mongjang, ütinglakpu saki wangmanpu phei, ünu juteihmongjang mepu teman mongjang jaowe tamyange hüyange teman püm jaoshe ihpu yengphei jaoyange teman owe wenhah.

²³Teman-e janyangpu monghümpute mongjüonge tükhah, hangjingne aowe janyangki Iya monghümlakpa:

²⁴hüyange kenpu hüyange toimei tangte lahnyiklak jingne, teman-e jawe jate teijamhah;

²⁵hüyange ütam wanglam kih-e, teman jamme jemlak tahtüoh hah, nyih hangshinne owe peipu ngenang, teshinne ünyei jawe japhei teihenghah.

²⁶Hangjingne ngaotingpa shingpu tüohyang pheime, teman-e shingjang shinge, ünu jonma-a, hümma-a ünulan jeng toidopu shaaji towe yenang;

²⁷hüpoi ngaophünpu jeng nyam nyamshe tanpu, hüyange Kahwang phei hokweye yongpalan hahkümlak vün ümeng tüowe ngohnang.

²⁸Kahta aowe Mosa ngaokeng ye-i-yeshe, kahta ni hei lüm saki ngao kaiye I shüpshe yeteihpe li ne tamnang.

²⁹Hüma-a aowe yaphang me Kahwang üha loknang, hüyange jiengjeppuwa hanghepa iy kaiye I jaowetam, tüopa yejaopukih-e mongnang, hüyange shüpshe Yahate phoinang, numan-e teihpu me, I tüome ünyei hangke shemengpu she ilak?

³⁰Hangjingne, “Phuh hahpuwa Üjing, taowe leihye phalak,” hüyange üne-o, “Youngwanpawe yoi kahtalan ngaophünlak,” she tüolan aowe i, teman-e shing.

³¹Üyin Kahwang yak me yeilak tüowa yeonge nyamlakpa!

³²Hüpoi üwangpa hipak teihtüoyah, numan-e wangngai ngeyang pheime, hanghe toime shangshih wehok üyong nün;

³³Jayeme, phoiye teene tampu hüyange shangne tampu moini me mük yemeipe lei; hüyange jayeme, tüokihye jonpalan phei ja ne meng.

³⁴Hangjingne numan-e küpnok me ngohplante shüpsheye teih, hüyange numan-e yoi jingne ünyei meipu hüyange jinte ngohpu toinyu ja ngohnang she shinge, mongmei me numan toinyu nanha mahpu nün ok.

³⁵Tüokhei hanghe me khintak üyong ngohnang, numan-e monghah-e teihpu tahwin.

³⁶Hangjingne Kahwange mongpu lingyang phei me, numan-e janpu tüolak jingne, numan nün-okpu wongpong ngohnang.

³⁷“Hangjingne ütenja mongme, hüyange peilakpa-a peikülak, shonne yengohlak.

³⁸Hüpoi ütinglakpuwe ü-üjaopa üyin ngohlak; hüyange shinne yema-a, ü-yahawe Ite mong yehahlak.”

³⁹Hüpoi aoyinne mahlak yete shinne yenang, teman iman yome yeje; hüpoi yaha yinyelak jingne mengpalan yo me ngohnang.