Read Konyak Naga HEBREW 11 Bible Online

HEBREW 11 - Konyak Naga bible

HEBREW 11

¹Sha-a ütinglakpuwa, monghümpu ngaolan jeng ütingpa me shingne tampu, ye-ngepu toilan jingne hei ngohnang she ütinglakpu tüopa ngohnang.

²Hangjingne tüome ülanglanne iman-a ütinglakpu jingne imante saki phapu ngenang.

³Kahtoknyuwa Kahwang ngaowe ling she ütinglakpu kaiye teman-e shingnang; tüokhei hanghe ngenang tüolan-a ütahte ngaiye ngohpu mepu yeling.

⁴Ütinglakpuwe Abel-e Kahwang jingne Kain phei ünyei shemeipupa toidopu ja, hangheye I khakshupu phei ngoh she saki tüo, tüopa do; hüyange Kahwange Iye phapu hünghao jeng saki pha; hüyange I ütinglakpu kaiye I liyapoi yelakpe Iye ngaonang.

⁵Ütinglakpuwe Enokh lipu ye-ngetamlak jingne I yahtei; hüyange I ye-ngepe lak, hangjingne Kahwange I yahtei. Hangjingne yahmantei wantemuh, Iye Kahwang monghah ne tampu saki tüo.

⁶Hüyange ütinglakpu yenangma-a I monghah ne tam ne ye-ok; hangjingne aowe Kahwang tangte peilakeih, Iye Kahwang ngohnang she, hüyange I yampalante küw phapu ngohnang she üting laklak yang.

⁷Ütinglakpuwe Noahwe mükke ye-ngepulan jeng kentinglak ngao tüowe Kahwangte nyam-e, yoi noksa yinlak jingne yenglin (ghonu) tüm; hüyange tüopa kaiye Iye kahtanyuhalan yeinetam, hüyange ütinglakpu mepu ngaipu khakshupupa mothleipa ne meng.

⁸Ütinglakpuwe Abraham, aope Ite nyik, Iye mothleilak jingne hanghe kahmük tüolak ne ngoh, tüoyete yayonge tailak Iye ngao jai; hüyange I ümpeheyete tainang yeshingpe I yayonge tai.

⁹Ütinglakpu kaiye I yinpa ja kih janpu kahtok me nyoipa ne menge, tüopa janpu jamuh Iphei mothleipulan Isaac hei Jacob phei nyenok me ngoh.

¹⁰Hangjingne hanghe chingnyu lingpa hüyange wepupa Kahwang ngohnang, nokjing yafün ngohpu tüopa chingnyu jingne Iye tanne ngoh.

¹¹Ütinglakpuwe Abraham I jin lintepheite, hüyange Sarah yha heelang ne ngohyange-o naonyoi me üli peiye, püm yekenglak wong tüo, hangjingne aowe janpu pha Ite yhawe ütingpa she teih.

¹²Tüokhei ja mepu, hüke litepu phei shemei she ngohpupa mepu, shangtoime wangmepu shanhalan maapu phei hüyange yengching nah pheih kih ye-i-küm okpe üli ngai.

¹³Tüolan üsheiye janpulan ye-nge yahpoi üjai me tüolan ngeye salam phawe, hüyange kahtoknyu me iman yinpa hüyange chingtaipa ngohnang she janyang phei me, iman üshei ütinglakpu me li.

¹⁴Hangjingne aoyinne hükihpu ngao ngao iman-e yoi nyoilak kahtok yamnang she ütahte ngaitam nang.

¹⁵Hüyange iman-e hanghe kahtok mepu iman ngaiye pei, tüopa teishihma-a, ütingme leihyelak hipak ümei tüohah shepu.

¹⁶Hüpoi sha-a iman-e shemeipupa kahtok ja, hüke wangdang ching kahtok yahhu nang. Tüokhei Kahwange iman jingne I iman Kahwang she nyiklak yewüo, hangjingne iman jingne Iye chingnyu ja tümteki.

¹⁷Abrahamte tokwante, Iye ütinglakpuwe Isaac dopu yahpei, hüyange aowe janpu tüo Iye yoiha jashingha ngohpu toidolak jingne tüm,

¹⁸ao te hüke i, “Isaac kaiye nange üli tüolak.”

¹⁹Hangjingne Kahwange lipu mepu-o yange yene tamlak oklak she Iye ütinglak; ütingme, Isaac lipu mepu Iye üne-o leppu jakih leih-e tüo.

²⁰Ütinglakpuwe Isaac-e peine ngohpu ngao jeng me Jacob hei Esau moiman.

²¹Ütinglakpuwe Jacob-e li ne hipak ngoiwante Joseph hayim lilite moiman, hüyange yoi “wongjoi me jonyange khüm.”

²²Ütinglakpuwe Joseph-e, aope yoi üküm hipak owe pei, Iye Israellan yayong tailakjeng nyüopu ngao pha; hüyange yoi mang jingne hangke linglak nyüoweleipu phawe tüoh.

²³Ütinglakpuwe, aope Mosa puh, I nyupalan-e lekeng lüm lowe ang, hangjingne iman-e I naha shemei yaomapu she nge, hüyange iman-e ahngpa ngaokeng te yenyam.

²⁴Ütinglakpuwe, Mosa aope I jongyapeih, Iye Pharaoh yhanyu üha she nyiklak yejan.

²⁵Hangjingne Iye ütenja ünu mongmeipu mongmei phei-a Kahwange lepu kahtalan phei shange ponglak le.

²⁶Hüyange Egypt toinyu nanha üshei phei Messiah jingne shangpu toinyu nanha sheyongpu she teih; hangjingne Iye ngoikülak khintak tüolakte lei.

²⁷Ütinglakpuwe Iye Ahngpa mongshih ngaipute yenyampe, Egypt kahtok tüoh, hangjingne Iye ao mükke ye-nge Ite ngepukih nünne ngoh.

²⁸Ütinglakpuwe halompalan mahne tampupawe imante yeletlak jingne, Iye yinyelak mo hüyange taten me iy shaitampu jon!

²⁹Ütinglakpuwe iman-e, kahwan tokme kempuke, Ütak Yengching kaiye tai, hüyange tüopa kih-e linglak jingne Egypt lanne ngangwante iman yenge yah mah.

³⁰Ütinglakpuwe Israellanne nyih nyit Jerikho longpe neikon yangphei me tüopa toiyeta.

³¹Ütinglakpuwe Rahab phwngngamnyuwe kuhshükpalan mongmei me yahpu jingne, ngao yejaipalan phei yha yemahtam.

³²Hüyange üne-o taowe hangshin nyeiye ilak? Hangjingne Gideon, Barak, Samson, Jephthah hüyange David, Samuel hüyange hipalan, iman üshei jeng taowe ngaone ima-a, hipak yewanglak.

³³Ütinglakpuwe iman-e ahngchinglan hah ok, ngaotingpa me ngange ling, janpulan tüo, yengkong mailang wakhümkhai ne tam;

³⁴wongnangpu vünyi meine tam, ünah ni yanglow mepu yin, wong yenangpe ngohpu wongnange ngai, wehok shapju me wong üyongpa ne meng, hüyange mihjat nyahponglan okyange jange tei.

³⁵Ütinglakpuwe shekolanne yoi pheipulan mang nishe yange yepu tüo, hüyange ülaolan lipu yange yepu shemeipupa tüolak jingne yoi yinyepu yeyahpe, shangne tam.

³⁶Hüyange ülaolanne phoipu hüyange shütnetampu, tüophei nyeiye shapu hüyange küpnok me ange shangpu nge.

³⁷Iman longe shüppe toi; iman pewetlakke tang, iman yanglow-e toi, iman toiha ne hüyange shangne tamme hüyange ye-i-yeshepe, youn hei nyee üsho inyange kem.

³⁸Tüopa kahtok iman jingne wangngoipune yeje tüoh-e phao hei kahtang me, longsa hei kahkook yo me waakem.

³⁹Hüyange iman üsheiye iman ütinglakpuwe hüke saki tüoyapoi, Kahwange hanghepa janpu pha, iman-e yetüo;

⁴⁰hangjingne Kahwange teman jingne ülamja shemeipupa tümlakte, teman ye-ompe iman wangngoipu ne yemengtam lakyang.