Read Konyak Naga HEBREW 13 Bible Online

HEBREW 13 - Konyak Naga bible

HEBREW 13

¹Jeiheinao teikenpu yelakpe ngohtüoh.

²Yinpate kenpu hüolak tahpe, hangjingne tüopa lingpuwe ütam-e yeshingpe wangdang shongmokpalan woi in.

³Aoyin küpnok me ngohnang, iman phei küppe ngohpuke teihtüoyah; numan nying nyingke üne-o püm me shangpu shinge, shangne tampalan teihtüoyah.

⁴Üshei yo me nokyampu minyong ngampai puphei angtüoh, hüyange nokne mengpu shinleng nuweshakke tah-ang, hangjingne Kahwange nuweshakpalan hüyange phwngngampalan ngao phünlak.

⁵Nginte kenpu mepu numan yanne ngohtüoh, hüyange numan me hanghe ngoh tüome monghah-e ngohtüoh, hangjingne Kahwange yoi nying nyingke ngaoyangki, “Taowe nangte hangkejam mongyehümpe yengohlak. Yejema-a taowe nang hangkejam yetüohlak.”

⁶Tüokhei wongnange teman-e inang: “Youngwanpa-a üte jampupa ngohnang, tao ye-nyamlak! Kahtawe üte hanghe lingpu oklak?”

⁷Numan tepu üjupalan aoyinne numante Kahwang ngao ngaoyange tai, iman teihtüoyah, hüyange iman üyin mepu ngaipu ülick teihtüowe, iman-e ütinglakpu yahpalanne mengtüoh.

⁸Jesu Khrista menyih, tenyih hüyange jinte üküm yenang jakihmuh ngohnang.

⁹Numan lamme lamme üla nyüopu kaiye ünyongyete tahteitam; hangjingne hanghe hahying jonpalanne küw yetüo, tüopa hahying kaiye yeje shüpshe kaiye mongjang mongetampu meilakyang.

¹⁰Hanghe khümjing nyenok me khümpalanne hahlak shupune yeje, tüokihpu wümjong ja toman-e ngohnang.

¹¹Hangjingne yinmoklan hanghe iy ünu jingne toidolak ütahpa ngengpawe üjaonyoi te yah ongnang, tüolan-a lakjing ü-at me jakke muknang.

¹²Tüokih-e Jesu-o, I yoi iy kaiye kahtalan jaowe shatamlak jingne, peten kaiye taiye shange pong.

¹³Tüokhei I jingne phoipu nünne, lakjing ü-at yeme teman I tangte taihah.

¹⁴Hangjingne teman jingne tüome üküm yenangpe ngohlak chingnyu yenang, hüpoi teman-e ngoikülak chingnyu yamnang.

¹⁵Hüma-a teman-e I kaiye yelakpe Kahwangte minyongpu toidopu, hüke I min janpu jupen ülick dohah.

¹⁶Hüpoi ümei linglak hüyange teijamlak tahpe, hangjingne tüokihpu toidopulan kaiye Kahwang monghah nang.

¹⁷Numantepu woipalante ngao jaiyah, hüyange iman phangme ngohtüoh, hangjingne iman mongmeng phei yejepe mongmei phei tüopa linge oklak nanjingne, Kahwangte dopu phalaklan kih-e iman-e numan yaha jingne yomnang; hangjingne iman-e mongmeng puphei lingma-a, numan jingne küw yenang.

¹⁸Numan-e toman jingne yoptüoh, hangjingne toman-e üshei me minyonge ngohuwe, toman juteih mongjang meiye ngohnang she toman-e monghüm nang.

¹⁹Hüyange taowe numan tangte nishe mamshe leih-e phawe oklak jingne, numan-e yoplak jingne; taowe yeonge ünyei hengnang.

²⁰Sha-a chingmei tampupa Kahwang, aowe üküm yenangpu jiengjeppu iy kaiye nyeeyompa üyongpa, hüke teman Youngwanpa Jesu,

²¹lipu mepu nishe woipei, I müktishiwa me hanghe monghahnang, tüopa teman me Jesu Khrista kaiye lingetam-e, Iye yoimongpu linglak jingne ümei üshei me wangetamtüoh; Ite müktishiwa jinte üküm yenangpe ngohtüoh. Amen.

²²Hüpoi, jeiheinaolan, numante hengetampu ngao nüntüoh she taowe numante tongnang, hangjingne taowe ngao shohkünoh-e nyanyangki.

²³Teman ünao Timothy lanne tamteki, tüopa shingyah; I mamshe peima-a, tao I-o omme numan phei hüolak.

²⁴Numan-e numan woipalante hüyange üjaolan üsheite salam phatüoh. Italy mepu jeiheinao lanne numante salam phanang.

²⁵Numan üshei phei shüpshe ngohtüoh.