Read Konyak Naga HEBREW 2 Bible Online

HEBREW 2 - Konyak Naga bible

HEBREW 2

¹Tüokhei tüolan mepu teman lüowe yetailak jingne, teman-e jaipu ütingpa ngao ünyei monge tüklakyang,

²Hangjingne wangdang shongmokpalan kaiye ngaopu ngao mongjüonge ngaima-a, hüyange ümeng hüyange ngao yejaipu liliye ümee wange yepu tüoma-a,

³tüokihpu yinyepu üyongte teman-e mongyephama-a, hangke teman-e yinlak? Tüopa jingne üwangne Youngwanpa kaiye ngao, hüyange jaipalan-e temante mongnetam;

⁴hüyange füo hei yashanyali moiniye, hüyange kahnyingwüngha maapuwe, hüyange Kahwange mongpuke Yaha Üjao hünghaowe, Kahwange-o saki pha.

⁵Hangjingne toman-e hanghepa ngoikülak kahtoknyu jeng ngaonang, tüopa-a wangdang shongmokpalanne wanglam lampu phangme angne Kahwange yetam.

⁶Hüleima laingao üken ütam-e hüke saki phawe i: “O Kahwang, nange I jing teihtüolak ne kahta-a hangshi? Kahta ja hei, hüke nange Ite paowetüklakpa?

⁷Nange wangdang shongmokpalan phei I üjingha üphangpa ne ling; Nange müktishiwa hüyange yihnoonpu phei Ite ahngpa shaoshaoh shaohtam.

⁸Hüyange nange shemin lamphe tangme I wanglam lampane lingtam.” Hatüo hüke inang “Sheminlamphe tangme wanglam lampa ne Kahwange kahta ling;” hatüome meimeiye sheminlamphe omnang. Tüoyangpoi, sha-a sheminlamphe tangme kahtawe wanglam lampu teman-e mannge.

⁹Hüpoi wangdang shongmokpalan phei hipak üjinghapu jingne ao üjingha hei üphangpa ne mengetam, Iye Kahwang shüpshe kaiye kahta üshei jingne lipute jüppe nyüolakne, I lipu shangpume müktishiwa hüyange yihnoonpu shaoshaoh shaohpu Jesu teman-e ngenang.

¹⁰Hangjingne ao jingne üshei ngohnang, hüyange ao kaiye üshei ngohnang. Iye müktishiwa tangte hayim maawe woipeiwante shangpu kaiye iman yinyepu shüowoipu wangngoi tamlak jingne, tüopa I jingne shupu ne ngoh.

¹¹Hangjingne aowe jaowe tamnang, hüyange aoyin jaoyange ngohnang, iman jongnyoi ja mepu. Tüojingne Jesuwe imante jeiheinaolan she nyiklak yewüo.

¹²Iye Kahwangte inang, “Taowe ü-jeiheinaolante nange hanghe lingyangki ngaolak; Taowe iman jemjing me nang yihlulak.”

¹³Iye üne-o inang, “Taowe ü-ütinglakpuwa Kahwang me anglak.” Hüyange üne-o Iye inang, “Kahwange üte phapu hayimlan phei Tao tüome ngohnang.”

¹⁴Hüke Iye imante nahalan she nyikpu kih-e, iman-a iy hei mei pheipu kahtalan. Jesu iman kih-e meng hüyange kahta wanglamme iman shangpu me om. Iye tüopa lingpuwa I lipu kaiye ao me lilak ünganwong ngoh tüopa kahshih mahtamlak jingne ling.

¹⁵Hüyange hükih-e aoyin lilakte nyampu me iman üyin jin kümme rhapa kih-e ngoh, iman üshei yinlak.

¹⁶Hangjingne ütingme Iye wangdang shongmokpalante jampu ne yeje, hüpoi Iye Abraham üli te jamnang.

¹⁷Tüokhei kahtalan ünu mepu yinyepu dopu phalak jingne Kahwang toi jeng üshei me I yayengshüpshe hüyange monghümpu ütahpa ngengpane menglak jingne, üshei me I jeiheinaolankih mengetamlak I jingne shuwe ngohyangki.

¹⁸Hangjingne Iye yoi nying nyingke tokpu hüowe shangpu tüotepuwe, Iye aoyin tokpu me haonang imante jampu oknang.