Read Konyak Naga HEBREW 4 Bible Online

HEBREW 4 - Konyak Naga bible

HEBREW 4

¹Tüokhei I toloimei jingte yulak janpu tümme ngohnang pute, hangke nyoiweih linge numan ütam yune ye-okpe ngohpha ma she, teman-e nyamhah.

²Hangjingne imante hangke pei hüke temante pungao ümei konnyüo yangki. Hüpoi jaipu ngaowe iman küw yenangpe ngoh, hangjingne jaipalan phei iman ütinglak-e yejam.

³Hangjingne teman aoyinne mengyangki, tüopa toloimei jingte yunang. Iye ipuke: “Ü mongshih ngaipu me taowe jiengpuke, ‘iman aope-o ü-toloimei jingte yeyulak!’” Kahtoknyu lingengaipu hipak me muh toishaolan showe ngohyapoi Iye tüopa i.

⁴Hangjingne nyih nyit shepupa jeng Iye nyoi ja me hüke iyangki, “Hüyange nyih nyit shepupa me Kahwange yoi toishao üshei mepu toloimei.”

⁵Hüyange tüopa nyoi me muh Iye iyangki: “Iman-e aope-o ü toloimei jingte yeyulak.”

⁶Aoyinne tüopa üwangpa Pungao Ümei jai, tüopa toloimeipuyah ongpu ye-ok, hangjingne iman-e ngao yejai. Hüwante ülaolan ngohyangki, aoyinte tüopa tüone tam.

⁷Hatüowa Kahwange ülaopa nyih ja, hanghete “Tenyih” she nyikpu ngaitampu me ngenang. Wangpeng nangjang linphei me David kaiye ngaopu laingao me hüke nyanne ngenang: “Numan-e tenyih Kahwangpa ngaowüng jaipu ne mengma-a, mongjang wanne ükhu ne tahmeng.”

⁸Kahwange janyangpu toloimei Joshuawe kahtalante phapu ne mengshihma-a Kahwange ülao nyih ja jeng phei me yengaohah shepu.

⁹Tüokhei, tüome Kahwang kahtalan jingne Sabbath toloimei nyih ngohnang.

¹⁰Hangjingne hangke Kahwange yoi toi mepu toloimei, hüke aowe I toloimeite yunang I-o yoi toi mepu toloimei yangki.

¹¹Tüokhei kahta aowe-o tüopa ngao yejaipu jakih-e yeyeilak jingne, teman tüopa toloimei tangte yu ne nganghah.

¹²Hangjingne Kahwang ngaowa üyin hüyange lingeyahpu phei, hüyange ünah ni yanglow üshei phei shepahpu; hüyange üyin hei yaha, üpong hei waanli tüolan üshei lüowe lütte phün okpu, hüyange kahta mongjang juteih hei kenmong mamshe shingpupa.

¹³Hüyange Kahwang mepu lowe anglak hango yenang. Linge ngaiyangpu üsheiye I mük sheshao me lanne shaiyange hüolak, hüyange Ite teman üsheiye yoi toishao hüolak yang.

¹⁴Shaajehi ütahpa ngengpa üyong ja, ao wangdanglan kaiye linteki, hüke Kahwang Üha Jesu ongtepuwe temante nyingtampu me mongjüonge tükhah;

¹⁵Teman jing ütahpa Ngengpa-a teman ye-ok-yeshangpu jingne yayeng shüpsheye yeteihlakpa ja ne yeje. Tüoleima temante tokpu kih-e ülam lili me tokne tampu, hüpoi ünu ye-ompu Ütahpa Ngengpa (teman me) ngohnang.

¹⁶Tüokhei teman-e yayengshüpshe yah oklak, hüyange wongpong hipak me temante jamlak shüpshe tüo oklak jingne, monghümpu phei shüpshe ahngpa shotjing ü-o-te teman wenhah.