Read Konyak Naga HEBREW 5 Bible Online

HEBREW 5 - Konyak Naga bible

HEBREW 5

¹Hangjingne ünu jingne dopu hünghao hüyange toidopu phalak ne, kahtalan nanleiye Kahwang toi jingne kahta yo mepu yah-e ütahpa ngengpa lili leye ngohnang.

²Iye hango yeshingpalan hüyange püohpompalan phei innenyaiye nün ok nang, hangjingne I-o yoi nying nyingke yewangyengoi pu ngohnang.

³Tüojing ne kahtalan jingne shaha yeje, yoi jingne-o hüke, ünu jingne toi dolak wongpong ngohnang.

⁴Hüyange kahta aowe yoi nying nyingke tüopa minyongpu yeyah, hüpoi Aaron nyikpu kih aope Kahwange I nyik lakei, Iye tüopa yahnang.

⁵Hükemuh, ütahpa ngengpa ne menglak Khristawe-o yoi nying nyingke minyongpu yeyah, hüpoi aowe Ite i: “Nang Ü-Ha. Tenyih taowe nang halomne mengnang”;

⁶hükemuh Iye üne-o nyoi ja me i, “Nanga üküm yenangpu ngengpa, Melkhizedek phei shompupa nang.”

⁷Hangjingne Jesuwe I iymei nyih hipak me, I lipu mepu aowe yinyepu ok Ite yeonge wünne hüyange mükphi phei yoppe tongphei me, Iye yeonge Kahwang le puphei hüopu jingne Iye tongpu jai;

⁸hüpoi I Kahwang Ha ne mengyapoi, I shange pongpu ngepu kaiye ngao jailak shing;

⁹hüyange I wangngoine tamyang phei me, Ite ngao jaipu üshei jingne I üküm yenangpu yinyepu üjüngne meng;

¹⁰hüyange Melkhizedek wanglamke ütahpa ngengpa she Kahwange nyikne tam.

¹¹Tüopa jeng toman-e ilak wangmanne ngohnang, hüpoi numan na jeitepuwe, khoih ilak wannang.

¹²Hangjingne hipak teshinpu mongma-a, numan nyüopalanne menge ngohhah shepu; hüpoi nishe Kahwang ngaolan, üwangpa wanglam ükongwangpu numan te ütam-e nyüolak wongpongne mengteki; hüyange aoyin jingne hahying üwan yeje, düamyeng wongpong, numan hükihpulan ne mengteki.

¹³Hangjingne düamyeng yingpalan khakshupu ngaome üta ne manmeng, hangjingne I üne-o naotak.

¹⁴Hüpoi lwngmeine menge aoyinne wanglam ne mengpu kaiye ümeng ümei tampu oklak yoi shingemanpu tükke ok, iman jingne hahying üwan-a ngohnang.