Read Konyak Naga HEBREW 6 Bible Online

HEBREW 6 - Konyak Naga bible

HEBREW 6

¹Tüokhei teman-e Khrista jeng ükongwangpu ngaolan tüoyange teman-e wangngoipu manngoi manngoi sheshao yete, toi ümang mepu monglüppe, tüopa yafün me nishe yelingpe, hüyange Kahwang yekaote ütinglakke,

²baptilak hei yak shünglak, hüyange lipulan yange yepu, hüyange jinte üküm yenangpu ngaophünpu jeng nyüopu phei taihah.

³Hüyange Kahwange mongma-a, teman-e tüopa linglak.

⁴Hüma-a hangke iman-e ütinglakpu tüohyange taimah, tüolan monglüplak jingne hangke yahyelak? Hipak ja me iman Kahwang wangngai me ngoh, iman-e wangdangpa hünghaote jüppe nyüo hüyange Yaha Üjao me iman meitam tüo,

⁵hüyange Kahwang ngao ümei hüyange ngoikülak jing ünganwongte jüppe nyüo,

⁶hüyange tüophei me iman lüppe tai! Iman monglüppe tamlak jingne nishe yahyelak ye-oklak; hangjingne iman-e yoi jingne Kahwang Üha tangpem me nishe taknang, hüyange I ükhong sheshao me wüotüone tamnang.

⁷Hangjingne hanghepa kahtokke yoi tangme yelakpe yütpu waiyeng ying, hüyange deiha jongne tamnang tüolan-a ao jingne aoyinne hamyapeih tüolan jingne ye-ongpu wongpong, hüyange Kahwang mepu moiman tüonang.

⁸Hüpoi huh hüyange huhphüm jongma-a tüopa-a winnang hüyange phoiwümpu ü-o me ngohnang, hüyange ükümne tüopa jakwinlak.

⁹Hüpoi, kenneteihpalan, toman-e hüke ngaoyapoi, tüolan phei shemeipu, hüyange yinyepu yete woipu lamnyu numan-e yahlak she tomante ütinglakne tamnang.

¹⁰Hangjingne numan-e, üjaolante jam, hüyange shaa-o jamnangki, hüyange tüopawe Kahwang min jingne numan-e hangke yayeng hüo, tüopa toishao kihmuh I ngaoting ye-i-pe yeje.

¹¹Hüpoi numan kahta liliye üküm ngoiye numan monghümpu me ütinglakpu ngohlak jingne, tüopa ngangpu jamuh hüowe oklak jingne,

¹²hüyange numan jookpu yengohlak, hüpoi aoyinne ütinglakpu hüyange nünne okpu kaiye janpulan moth leilak, iman kon yahpalanne menglak jingne, toman-e mongnang.

¹³Hangjingne aope Iye Abrahamte jan, Kahwange jiengjeplak jingne yoi phei yongpu ao-o yenangpuwe, Iye yoi nying nyingke jiengjeppe i,

¹⁴“Ütingme taowe nangte moiman phaning, hüyange jaalun tampha ning.”

¹⁵Hüyange hüke Abraham, nünne nün-okpu jingne, Iye hüke janpuwa tüo

¹⁶hangjingne kahtawe sheyong pupa min jonne jienge jepnang, hüyange iman moppu üshei me jienge jeppuwa ngao ükümpa ngohnang.

¹⁷Tüopa me Kahwange janpu mothleipalan te yoi kon yejeilei okpu ünyei maawe hüolak monge;

¹⁸yejeilei okpu ngao ni, ümpehepa me Kahwange ngaoleih ngao ne ye-ok, tüolanne toman shüome angpu monghümpu tüklak jingne lojing yahpalan toman-e henglak üyong ja jailak jingne, Iye jiengjeppu jawe üwo me yu.

¹⁹Hanghepa monghümpu Yaha yenglin tüklak kih-e, ütingpa hüyange shemongpu monghümpu, hüyange wangdang ümongpa wümjongte ongnang, tüopa monghümpuwa toman ngohnang.

²⁰Tüopa ümong yete, Melkhizedek wanglam kih-e jinte üküm yenangpu ütahpa ngengpa ja ne menge, lamleipa ja leye Jesu teman jingne ong.