Read Konyak Naga HEBREW 7 Bible Online

HEBREW 7 - Konyak Naga bible

HEBREW 7

¹Tüopa Melchizedek-a, Salem Ahngpa hüyange Ütahpa Kahwang ngengpa. Hüke Abraham ahngpalan peli naoyange shapju mepu I leihyewante, I phei Melkhizedek hüo hüyange Ite moiman tam;

²hüyange Abraham-e Iye yahpu üshei mepu penphong dopu meitam me ja tümme pha. Melkhizedek te leppu üwangpa min-a “Khakshupupa Ahngpa,” hüyange üne-o I-a Salem Ahngpa khei hüke I minte leppuwa “chingmei Ahngpa.”

³Melchizedek-a Ipa yenang, yejema-a Inyu yenang, yejema-a jongnyoi yenang, hüyange yejema-a ükong wangpu üyin yejema-a üyin üküm jeng yenang, hüpoi Kahwang üha le pu me tüopa Melkhizedek jinte ngengpa ne ngoh.

⁴Hümma-a aote pajeiyong Abraham-e nyieyahpu mepu penphong meitam pha, I hangshin yongpu!

⁵Hüyange Abraham mepu jaalunpu Levi nokphong ngengpalanne, iman jeiheinao mepu penphong yahlak ngaokhümme ngohpukih ngaokeng tüo.

⁶Hüpoi tüopa kahta jongnyoi iman phei yenang; tüopoi Iye Abraham mepu penphong meitam yahyangki; hüyange aowe Kahwang mepu janpu tüo Ite moiheiman yangki.

⁷Nüngneilak yenang, hüke üjoipawe üyongpa mepu moiman tüonang.

⁸Hüyange ngengpalan jengma-a hangko kahtawe penphong shainang, hüpoi tüopama-a I üyin ngohnang she aowe saki tüo, Iye penphong meitam tüonang.

⁹Hüyange ipu ja me, penphong meitam tüopu Leviye Abraham kaiye penphong meitam phayangki.

¹⁰Hangjingne Melchizedek-e aope I hüo, Levi manpuhpe ngohyangki.

¹¹Hüma-a, Levilan ngengpa wanglam me wangngoiye ngohpu ne ishih ma-a, hangjingne tüopa phangme jampulan-e ngaokeng yah. Aaron wanglam kih-e ye-i-pe, Melkhizedek wanglamke ülao ngengpa ja ngailak üne-o hanghe wongpong ngohpu shi?

¹²Hangjingne ngengpa wanglam leijeiye ngaipuwe, ngaokengo leijeilak wongpong ne meng.

¹³Hangjingne ao jeng tüolan ngao inang, I-a ülao jat, ümpehe mepu kahta aowe-o wümjong me shao yeshan. Iya tüopa jat mepu.

¹⁴Hangjingne teman Youngwanpa Judah jat mepu puhngai, tüopa-a meimeiye shingnang. Tüopa jatte ngengpalan jeng Mosawe hango yengao.

¹⁵Melkhizedek kihpu ngengpa ülao ja ngaipune mengma-a, hanghe toman-e inang tüopa üne-o ünyei shetingpu;

¹⁶ao meiye mongpu ngaokeng kih yeje, hüpoi jinte üküm yenangpu üyin ünganwong kaiye I ngengpa ne meng.

¹⁷Hangjingne I jeng saki tüopa phawe ngohnang, “Melkhizedek wanglam phei me. Nang jinte üküm yenangpu ngengpa ja.”

¹⁸Hangjingne üwangpa ngaokeng wong yenangpu hüyange küw yenangpu jingne lakne tamme ngohnang.

¹⁹(Hangjingne ngaokhüm-e hango wangngoipu yelingtam), hüyange tüopa nanleiye monghümpu shemeipu ja, hangheye teman-e Kahwang ü-o-te wennang, tüopa yahpei ngohnang.

²⁰Hüyange hatüowa jiengjeppu ye-ompe ye-ngaitam.

²¹Hangjingne ütingme üwangpalan-a jiengjeppu ye-ompe iman ngengpane mengetamteki; hüpoi, “Youngwanpawe jiengjep, hüyange I kenmong yejeileilak.” “Nanga jinte üküm yenangpu ngengpa ngohnang;” she aowe i, I kaiye jiengjeppu jawe I ngengpane meng.

²²Tüopawe Jesute jiengjeppu shemeipupa ütingpane lingetam.

²³Hatüome yoiyoi ne ngaipu ülam ja ngohnang: ülao ngengpalan üngang ngohyangki, hangjingne iman liküm hüyange iman toishao yephünpe yetai ok.

²⁴Hüpoi Jesupa-a jinte üyin me ngoh, hüyange ngengpa ja ne mengpu I toishao ülao ütamte phane yetam.

²⁵Tüokhei aoyinne I kaiye Kahwang tangte ü-o-te peinang, Iye iman jingne, yoppe tonglak jingne jinte üyin ngohpune menge, Iye üshei me meimeiye iman yinne oknang.

²⁶Hangjingne üjao, ümeng yenangpe, yenupe, ünulan mepu yoiyoine, hüyange wangdanglan tangte ütahpa, tüokihpu ütahpa ngengpa teman jingne wongpong ne ngohyangki.

²⁷Iye nyih jeihshe, tüopa ngengpalan leye, üwangne yoi ünu jingne, tüophei me kahtalan ünu jingne she toidopu dolak wongpong yenang; hangjingne Iye aope yoi nying nyingke dopu pha, Iye tüopa-a lanshe jintepu jingne tümyangki.

²⁸Hangjingne ngaokhüm-e kahta ye-ok-yeshangpu phei ütahpa ngengpalanne mengne lenang, hüpoi ngaokhüm pheime jiengjeppu ngaowe üküm yenangpu jingne wangngoipu me linge tampu Ha ja le nang.