Read Konyak Naga HEBREW 9 Bible Online

HEBREW 9 - Konyak Naga bible

HEBREW 9

¹Sha-a üwangpa jiengjeppu me yoppe khümlak jingne ngaokenglan hüyange kahtawe linge ngaipu yoppekhümpu nyoi she ngohyangki.

²Hangjingne nyenok ja tümme ngoh; hüyange üwangpa tüp me vüntük yongjing, khao, hüyange Kahwang shongme angpu an ngoh; tüopate Üjao nyoi she nyik.

³Hüyange jhotnye nishepupa ümong yeme shejaopupa she nyikpu nyenok ngohnang;

⁴tüome sü jakpu nyoi hon khümjing ja, hüyange üshei neikonne honne lümpu jiengjeppu khok ja ngoh. Ümme kenme manna pheipu hontük, hüyange üju hüoyang phei Aaron shengshaoh, hüyange jiengjeppu nyanpu longshenglan ngohyangki.

⁵Hüyange tüopa tangme Müktishiwa cherubim (Kahwang nanleiye peipalan) shüpshe shotjingte küppe saayange ngoh, tüolan toishao jeng sha-a teman-e khoih ilak hipakne yeje.

⁶Sha-a hüke tüolan tümyang pheime, ngengpalanne üwangpa nyenokte yelakpe onge khümpu toishao lingnang;

⁷hüpoi nishepupa nyoite ütahpa ngengpa hei, wangpeng te ja me ongnang, hüpoi iy ye-ompe yeje: tüopa iy Iye yoi jingne hüyange kahtalanne yeshingpe lingpu ünu jingne do-nang.

⁸Nyenok üwangpa ngohpute ngoiye, üshei phei shejaopupa nyoite ongpu lam üne-o ütahte manngai she, Yaha Üjaowe hüke hüonang,

⁹hanghepa nyenok sha-a ngohpu jin jingne leppu ja ngohnang. Tüopa kaiye khümpalante juteih mongjang jeng wangngoine yetam okpu hünghao hüyange toidopu phanang;

¹⁰hüpoi hahlak, yinglak, hüyange jaowe shapu ülam maapu jeng, tüolan-a nishe lingeyepu hipak manngoipu mongme jonlak mei wanglam ngaokeng hei ngohnang.

¹¹Hüpoi ngoikülak ümeilan jing ütahpa ngengpa kih-e aope Khrista pei, yakke yelingpu nyenok, hüke tüopa-a lingyange ngohpu yeje, Iye tüopa üyongpa hüyange ünyei wangngoipu nyenok kaiye ong,

¹²hüyange youn hei mahu üpong üha iy kaiye yeje, hüpoi yoi iy kaiye, Iye jinte üküm yenangpu yintamputoi tüowe Ünyei Jaopu Nyoite jintepu jingne ja me ong.

¹³Hangjingne nuwe ngohpalante youn hei mahu üpong iy hüyange mahu üpong üha toidowe jakpu vünla shaiye tampu kaiye mei jaopu jingne jaowetamnang she ima-a,

¹⁴hüma-a, Khrista aowe jinte üküm yenang Yaha kaiye üko yenangpe yoi nying nyingke Kahwangte do, I iy kaiye üyin Kahwang shaoshanlak jingne numan juteihmong jang toi ümanglan mepu hangke ünyei jaowe tamnang shi!

¹⁵Tüojingne, üwang jiengjeppu mengpu me ngaipu ümeng jingne yintamlakne lipu ngaipu jingne, nyikpulan-e jinte üküm yenangpu mothleilak janpuwa tüotamlak jingne, I-a ülapa jiengjeppu jingne chingmeilampu ne meng.

¹⁶Hangjingne ümekenme mongpu hüolak ne ngoh tüome tüopa linge hüopupa-a liye hüolak wongpongne ngoh.

¹⁷Hangjingne monge teihpupa üyin me ngohma-a, monge teihpu wongpongne yeje; I liphei me nakshih tüopawe wongpongne mengnang.

¹⁸Tüokhei hei üwang jiengjeppu-o iy ye-ompe yewangpe ngoh.

¹⁹Hangjingne aope Mosawe ngaokhüm kih-e lingne tampu ngaokeng üshei kahtalan üshei sheshaome ngaowe sho, Iye yeng hei tushangpu yenangpu nyee ümin hüyange hyssop phei mahu üpong üha hei youn iy phei, hüyange ngaokeng laitep hei kahtalan üsheite shaine tamme,

²⁰hüke i, “Jiengjeppu iy hanghepa numan jingne Kahwange lingetam, hatüowa tüo ngohnang.”

²¹Tüo tokte kaiye, Iye nyenok hüyange khümjing me jonpu tük hei sheng üshei me hüke muh iy shaitam.

²²Ine ima-a, ngaokhüm kih-e iy kaiye sheminlamphe khongkümpu jaone tamnang, hüyange iy shokke tamküme nakshih ünulan-a wintamnang.

²³Tüokhei tüolan kaiye wangdang me ngohpu jeng leiye yahpalan jaowe tamlak wongpong ne ngohyangki, hüpoi wangdang jinglan muh tüolan phei shemeipu toidopuwe jaowetamlak wongpong ne ngohyangki.

²⁴Hangjingne ütingpa üjaonyoi lepu leiyah-ü yakke lingpu üjaonyoi jate Khrista ye-ong, hüpoi sha-a I teman jingne Kahwang sheshaome ngailak jingne wangdang temuh ong.

²⁵Hüpoi Jehudi ütahpa ngengpawe yinmok iy yahyange, wangpeng lep iye Üjao Nyoite ongpu kih Khristawe hipak lep iye I nying nyingke do ne ye-ong;

²⁶tüone yejeshihma-a kahtoknyu lingwante muh I hipak lep iye shangpu ngeye ngoh hahshepu. Hüpoi sha-a Iye yoi toidopu kaiye ünu winlak jingne jin üküm yeme ja me hei ütahte ngaiteki.

²⁷Hüyange hangke kahta ja me hei lilak, tüophei me ngaophünpu peilak.

²⁸Hüke kahta maapu jing ünu hangki kilak jingne Khrista ja me dophei me, I nishe, ünu ye-ompe I jingne tanpalan tangte ngailak.