Read Konyak Naga JEAMS 1 Bible Online

JEAMS 1 - Konyak Naga bible

JEAMS 1

¹Jeams Kahwang hüyange Jesu Khrista shaoshanpa mepu, yanne ngohpu nokphong pen-me-ni tangte salam.

²Ü-jeiheinaolan, aope numan-e tokpu ülam maawe tüolakei, mongmei she teihtüoyah,

³hangjingne numan ütinglakpute tokpuwe nün-okpu ngaitamnang she numan-e shing.

⁴Hüyange numan hanghe me-o yewangpe yenangpe, wangpu hüyange ngoipu ne menglak jingne, tüopa nün okpuwa yoi toikong wangpu ne mengtamtüoh.

⁵Hüpoi numan yo me ütam konjongme yewangpe ngohma-a, phoiwümme yetepe moilante jajang jawe phapu Kahwangte Iye yu ne tamtüoh; hüyange hatüopa Ite phalak.

⁶Hüpoi nüngneiye yejepe ütinglakke Iye yu ne tamtüoh; hangjingne aowe nüngneinang, I wangyei me ütangyete shüppe inpu yengching yayungpu jakih ngohnang.

⁷Hangjingne tüokihpu kahtawe Youngwanpa mepu ülamja tüolak she tahteih,

⁸I mongjang ni nyimpu kahta yoi wanglam üshei me yenün ok.

⁹Hüpoi üphangpa yatuhshao jeiheinaowe yoi jonge tampute mongmeitüoh,

¹⁰hüpoi khristan hakpawe aope Kahwange I üjaopa ne linge tamlakei mongmei tüoh; hangjingne phao jupeng kih-e hakpuwa lintailak.

¹¹Hangjingne wangyang yeonge sheampu phei wanghe ongnang, hüyange phümha kuine tamnang, hüyange jupeng kuiye tainang, hüyange I leilak shemeiyaomapu mahnang; tüokih-e hakpa kahta I yoi toishao me lükwante mahtailak.

¹²Aowe tokpume nün oknang I moimanpupa, hangjingne Iye tokpu okyang phei me, üyin shaoshaoh, hanghe Iye kenpalante phalak jingne Kahwange jan, tüopa Iye tüolak.

¹³Aope ütamjate toklakei, Kahwange üte toknang she kahta aowe-o tah i: hangjingne ümengpawe Kahwangte tokne ye-ok, hüyange Iye ao te-o yetokja.

¹⁴Hüpoi kahta lili aope I yoi ünyei yah-hupuwe shuilakei, hüyange lüppe lowe woilakei, I toknang.

¹⁵Hüwante aope ünyei yah-hupuwe püm yekengpe ngai, ünu puh-e tamnang; hüyange aope ünuwa wange jonglakei, lipute puh-e tamnang.

¹⁶Taowe kenpu jeiheinaolan, numan lowelam ne tahtam!

¹⁷Hünghao ümei lili hüyange wang ngoipu hünghao lili ütangpa mepu ngohnang, hüyange wangngailan üpa ao me leijeipu yejema-a leihkheihpu yashüm yenang, tüolan khongküm I mepu ngohnang.

¹⁸Iye lingengaipu yo me üwangpa ülick ülam ja ne teman menglak jingne, Iye yoi mongpuke ngaoting ngaowe teman puhne tam.

¹⁹Tüopa shingyah, taowe kenpu jeiheinaolan, kahta lili jaiyalak jingne mamtüoh, hüpoi monglaowe ngaoyah, hüyange monglaowe mongshih ngaiyah;

²⁰hangjingne kahta mongshih ngaipuwe Kahwangpa khakshupu toi yeling.

²¹Tüokhei numan-e yejaopu üshei hüyange ümeng maawe ngohpu winyange, nyimne tamyange jongne tampu ngao hangheye numan yaha yinpu ok, tüopa innenyai yange yahtüoh.

²²Hüpoi numan yoi nying nyingke tüopa ngaote lowelam me jaipa nehei yemengpe, lingeyahpa ne mengtüoh.

²³Hangjingne ütamme ngao lingeyahpane yemengpe, jaipa nehei mengma-a, I she-nge me yoi wanglam shetate leipu kahta kih ngohnang.

²⁴Hangjingne Iye yoi nying nyingke yoite leiyange tainang, hüyange I hangkihpu kahta ne ngoh, Iye hüwante muh pemahnang.

²⁵Hüpoi aowe wangngoipu ngaokhüm, bumei ngaokhümte, leinang, hüyange yelakpe leinang, hüyange I-a jaipa shaha ne yemeng, hüpoi lingeyahpupa ne mengnang, tüopa kahta te Iye lingeyahpu me Kahwange moimanlak.

²⁶Kahta ütam-e mongjang lowelamne tamyange yoi yee yetük okpe yoi nying nyingke ütinglakpu kahta she teihma-a, tüopa kahta ütinglakpu wanglam jajang japu.

²⁷Üpa Kahwang sheshao me wangngoipu hüyange khakshupu wanglam she ipuwa, khah-ha lante leilak, hüyange wamnyulan shange pongpute leipu, hüyange kahtoknyu mepu yoi nying nyingke nushakne yetampe angpu tüolan ngohnang.