Read Konyak Naga JEAMS 2 Bible Online

JEAMS 2 - Konyak Naga bible

JEAMS 2

¹Ü-jeiheinaolan, teman Youngwanpa Jesu Khrista, müktishiwa, Youngwanpa te mengyange, sheta tahlei.

²Hangjingne numan jemjing me hon shüptet hüyange phihlangpu inkhek yahyange kahta ütam peima-a, hüyange nyemo ümeng inyange toiha ja peima-a,

³hüyange numan-e phihlangpu nyemo yahyange ngohpupate sheta leiye, “Nang tüome shemeipupa nyoi me shotkei,” she ima-a; hüyange numan-e toihapa te, “Otüome yonge ngohkei, yejema-a tüome ü-yashongme shottüoh, she ima-a,”

⁴numan-e numan yo me teitam-e jonpu ne yejepu a? Hüyange ümengpa teihyange ngaophünpa lanne yemengpu a?

⁵Jaiyah, taowe kenpu jeiheinaolan! Kahtoknyu me aoyin toiha ne ngoh, Kahwange imante ütinglakpu me hakpa ne menglak hüyange Iye kenpalante Iye janpu ahngching mothlei ne yelepu a?

⁶Hüpoi numan-e toihalan ye-i-yeshepe ling; Hakpalan ne numante shaoshi ne yetampu a? Hüyange iman-e numan ngao phünjingte shuiye yetei a?

⁷Hanghepa yihnoonpu min me numan ütahne mengnang, tüopa min iman-e yephoipu a?

⁸Hüyange laingao kih-e, “Nange nang yupite yoi kih-e kenyah,” tüopa ütahpa ngaokhüm numan-e ütahte ngaitampu okma-a, numan-e ümei lingnang.

⁹Hüpoi numan-e kahta sheta leiye, ngaokhüm mengpalan she ngaokhüm-e numan yeine tamküma-a, numan-e ünu omnang.

¹⁰Hangjingne aowe ngaokeng üshei jonyange, hüyange ja me I yeima-a, I üshei me ümeng ne mengnang.

¹¹Hangjingne, “Phwngngampu tahjon,” she aowe i, Iye üne-o, “Nange tahtoi” she i. Sha-a nange phwngngampu yeling, hüpoi kahta toima-a, nang ngaokeng mengpane mengteki.

¹²Bumei ngaokhüm kaiye numan ngao phünpu ngelak lan she shinge, hüke numan-e ngaotüoh, hüyange hüke muh lingtüoh.

¹³Hangjingne aowe shüpshe yehüo Ite shüpshe ye-ompe ngao phünlak; shüpsheye ngaophünpu tangme okpu ngenang.

¹⁴Ü jeiheinaolan, kahta jawe I me ütinglakpu ngohnangshe ima-a, hüpoi Ime toishao yenangma-a, hanghe küw? Tüopa ütinglakpuwe I yintampu oklak a?

¹⁵Jeiheinao yejema-a nyanao ja inlak yenangpe hüyange nyihjeih hahlak yetüope ngohma-a,

¹⁶hüyange numan yo me shejawe imante, “Numan sheamme hüyange moh hahyange taitüoh” she iyange, iman püm jingne wongpong toilan numan-e hango yephama-a, hatüowa hanghe küw?

¹⁷Tüokhei ütinglakpu-o toishao yenangma-a, I shaha-a ümang.

¹⁸Hüyangpoi kahta ütam-e ilak, “Nang me ütinglakpu ngohnang, hüyange üme toishao ngohnang.” Nang toishao yo me nang ütinglakpu üte hüopha, hüyange taowe ütoi kaiye ü-ütinglakpu nangte hüopha ning.

¹⁹Kahwang ja shing she nange mengnang. Meinangki! Ünu yahalanne-o mengnang, hüyange nyamme ninnang.

²⁰O üngapa kahta, toishao ye-ompe ütinglakpu ükeng she nange shinghu nangkü a?

²¹Teman Üpa Abraham-e wümjong me yoi ha Isaac dopu kaiye I tingeyetam pu a?

²²I toishao phei jamme ütinglakpu wongnange ngoh hüyange toishao kaiye ütinglakpu, wange tamyangki she nange ngenang.

²³Hüyange Abraham-e Kahwangte ütinglak, hüyange I jingne hatüowa khakshupupa she i; hanghe ngaolaiye hatüo inang tüopa ütingme ngai, hüyange “Ite Kahwang shümpa she nyik”.

²⁴Ütinglakpu shaha yeje hüpoi toishao kaiye kahta tinge tamnang she numan-e ngenang.

²⁵Hüyange hüke Rahab phwngngamnyuwe Israel kuhshükpalan ngoine tam, hüyange ülao lamye me teine tampu jingne; tüopa toishao kaiye yha tingetampu yeje a?

²⁶Hangjingne hangke yaha ye-ompe püm ümangne meng, hüke muh toishao ye-ompe ütinglakpu-o ümang.