Read Konyak Naga JEAMS 3 Bible Online

JEAMS 3 - Konyak Naga bible

JEAMS 3

¹Ü jeiheinaolan, shewan she ngaophünpu konnyüopalan toman-e tüolak she shinge, numan yo me maawe konnyüopa ne tahmeng.

²Hangjingne teman üsheiye ülam maawe püoh-e lingnang. Ütam jawe ngao me yepüohma-a, I-a wangngoipu kahta, püm khongkümpu woi oknang.

³Teman ngao jaiye tamlak jingne koiponglan ju me fagam jepne tamma-a, teman-e iman püm khongkümpu woipu oknang.

⁴Leihuyah, üne-o yenglin yeonge yongnang, hüyange wongnangpu wangyange shungyapoi, üjinghapu lenyeihlakke woipawe ümpehe yekaote woihuyapeih, tüoyekaote lüpne tamnang.

⁵Hüke yee-o ümük üjinghapu ja ngohnang, hüyange yongelüowe ngaonang. Leihuyah, üjinghapu vün ne phao hangke shu ne tamnang!

⁶Hüyange yee-a vün ngohnang; teman ümük ja yo me yee me yejao okpu üyong ngohnang, hatüowe püm noshe nu ne tamnang, hüyange nyoingoh hahwinlak vün ngaine tamnang, hüyange tüome molovün ngaine tamnang.

⁷Hangjingne yinmok awhalan, leyekempu (toshitolao) hüyange yengchingme ngohpu nyah ülam khongkümpu kahtanyuhawe nokme tamme oknang; hüyange tamyangki.

⁸Hüpoi yee tammetüklak kahta aowe-o ye-ok; hatüowa toloimei yenang okpu ümeng, lilak soihünge maawe ngohnang.

⁹Hatüowe teman-e Youngwanpa hüyange Üpa min yongnang, hüyange hatüowe Kahwang le pume lingengaipu kahta phoiwümnang.

¹⁰Ju ja mepu muh minyongpu hei phoiwümpu ngainang. Ü jeiheinaolan, tüolan hüke yejelak yang.

¹¹Yengpeiwo ja mepu yeng üwüng hei ükhah moini ngaine tamnangkü a?

¹²Ü jeiheinaolan, phukpee ye olive ülick, yejema-a wulick wume phuklick lickpu oklak a? Yejema-a hümyeng ngaijing me yeng ümei ngaine ye-ok.

¹³Numan yo me kentamongtingpu hüyange shinge okpu ao ngohnangki? Iye yoi üyin innyaipu hüyange konjong ümei kaiye I toishao hüone tamtüoh.

¹⁴Hüpoi numan mongjang me ükhah, aohüngpu, hüyange ünyei yah-hupu ngohma-a, ngaotingpa kaiye ünu omme ngaoleih tah i, hüyange o tahta.

¹⁵Tüopa konjong ütangpa mepu yupu yeje, hüpoi kahtoknyu mepu, mei hüyange kahshih-e phapu.

¹⁶Hangjingne ümeken me aohüngpu hüyange ünyei yah-hupu ngohnang, tüome khongkümpu ngohnang.

¹⁷Hüpoi ütang mepu yupu konjonga üwangne jaoshe iye, tüophei me toloimei, innenyaipu, mongjang meipu, yayengshüpshe ülick ümeiye maawe ngohnang, tahtüolak yenang, pa ipu ye om.

¹⁸Hüyange chingmei lingpalanne toloimei me khakshupupa chingmei ülick deinang.