Read Konyak Naga JEAMS 4 Bible Online

JEAMS 4 - Konyak Naga bible

JEAMS 4

¹Numan yo me hokke wepu hüyange teitoipu ümeken mepu ngaipu shi? Tüolan-a numan ümük ja me hokpu hanghe ünyei omhupu ngoh, tüopa mepu ngaipu ne yeje a?

²Numan-e ünyei omhunang hüpoi ye-ok, tüokhei numan-e toinang. Numan-e waonang, hüpoi yetüo, tüokhei numan-e teilangnang hüyange teitoinang. Numan me hango yenang, hangjingne numan-e Kahwangte yetong.

³Numan-e yunang, hüpoi yetüo, hangjingne numan-e yoi ünyei omhupu me winlak jingne numan-e pinne yunang.

⁴Nushakpu kahtalan! Kahtoknyu shümpa-a Kahwang wepa she numan-e yeshing a? Tüokhei aoyinne kahtoknyu shümpa ne menghunang, Iye yoi nying nyingke Kahwang phei wepa ne mengnang.

⁵Yejema-a, “Yaha hanghepa Iye teman me ngohne tam, tüopa yahawe teman jingne müktakke tamnang; tüopa ngao laingaowe ükengme ngaonang she numan-e teihnangkü a?”

⁶Hüpoi Iye shüpshe üyong phanang. Tüokhei laingaowe inang, “Kahwange otapu büangnang, hüpoi innyaipalante shüpshe phanang.”

⁷Tüokhei numan nying nyingke Kahwang phangme ngohtüoh, hüpoi kahshih tientüoh, hüyange I numan mepu phette tailak.

⁸Kahwang shongte owe peikei, hüyange I numan shongte peikülak. Numan ünulan, numan yak tuhtüoh, numan mongjang ni nyimpalan, numan mongjang jaotüoh.

⁹Mongmenge yoonge shaptüoh hüyange shaptüoh; numan nyipu shappune mengtüoh, hüyange numan mongmeipu hangki yihne mengtüoh!

¹⁰Youngwanpa sheshao me numan nying nyingke innyaitüoh, hüyange Iye numan yongne tamlak.

¹¹Jeiheinaolan, numan shejawe sheja phei tüi-e tahngao. Aowe yoi jeiheinao phei tüi-e ngaonang, hüyange yoi jeiheinaolan ngaophün nang, Iye ngaokhüm kaiye ngaonang, hüyange ngaokhüm te ngao phünnang. Hüpoi nange ngaokhümte ngao phünma-a, nanga ngaokhüm jonpa ne yeje, hüpoi ngaophünpa ja ne mengnang.

¹²Ngaokhüm phapa hüyange ngaophünpa, hüke aohiye yintampu ok hüyange mahne tampu-o ok, I ja shingha ngohnang. Hüpoi nang yupipate ngaophünpa ne mengpu nang ao shi?

¹³Numan aoyinne, “Tenyih yejema-a ngainyih toman-e tüopa chingnyute tailak, hüyange wangja tüome ngoh-e pheeileih-e küw tüolak she inang, sha-a leihu.”

¹⁴Hüpoi ngainyih hanghe ngaikülakei numan-e ye-i-ok. Numan üyin hanghe shi? Hangjingne ütenja ngeyange mahtaipu üshem, hatüowa numan ngohnang.

¹⁵Tüopa nanleiye numan-e hükepahi ilakyang, “Youngwanpawe mongma-a, toman-e üyin ngoh-e, toi hatüo yejema-a tüopa linglak.”

¹⁶Hüpoi sha-a numan-e numan otamaoheye helangkatwongpu; hüke yongelüopu üshei jajang japu.

¹⁷Tüokhei aowe toi mei linglak shingnang hüyange yeling, I jingne tüopa-a ünu.