Read Konyak Naga JEAMS 5 Bible Online

JEAMS 5 - Konyak Naga bible

JEAMS 5

¹Sha-a leihuyah, hakpalan, numan tangme hanghe shaoshi peinang, tüopa jingne shaptüoh hüyange üngwüntüoh.

²Numan moth mahtainang, hüyange numan nyemo mütte hahnang.

³Numan jing hon hüyange numan jing khüm shit te hahkümnang; hüyange iman shit-a numan jingne saki ne menglak, hüyange vün ne hahpuke iman-e numan mei hahlak. Numan-e üküm nyih jingne numan moth yowe ang.

⁴Leihuyah, numan tahyah-e nanpalan nanmee, hanghepa numan-e yephape tükke ang, tüopawe üngwünnang; hüyange tahyahpalanne üngwünpu wangdang Youngwanpa ükhong nasate ongteki!

⁵Numan-e kahtoknyu me meipulan shinne ngoh hüyange mongmei nge. Toilangpu nyih me numan-e numan mong hahnetam.

⁶Numan-e khakshupu kahta-a yeine tam, hüyange numan-e toi; hüyange Iye numan te yebüang.

⁷Tüokhei jeiheinaolan, Youngwanpa peipu ngoiye nünne ngohtüoh. Leihuyah, kahhampalan-e üwangpa hüyange ükümpa wai mankei mankei nünne kah mepu ülick ümei jingne tannang.

⁸Numane-o nünne ngohtüoh; numan mongjang wongnangyah, hangjingne Youngwanpa peilak hipak ü-o me ngohnang.

⁹Jeiheinaolan, numan ngaophünpu ye-ngelak jingne, shejawe sheja phei tüi-e teitahngoh; leihuyah, ngaophünpa tafün shongme yongyange!

¹⁰Jeiheinaolan, hipalan aoyinne Youngwanpa min me ngao, iman-a shangepongpu nünne okpu hüyange laolü-ünge tanne okpu leppu ja kih-e yayah.

¹¹Leihuyah, aoyinne nün ok imante teman-e moimanpupa she nyiknang. Job-e nün-okpu jeng numan-e jaiyangki, hüyange Youngwanpa toishao üküm, hangke Youngwanpa shüpshe teihpu hüyange yayengshüpshe ngohnang, tüopa numan-e ngeyangki.

¹²Hüpoi, ü-jeiheinaolan, üshei phei ükengnyu hatüo ngohnang, numan-e wangdange, yejema-a kahtoknyuwe yejema-a ülao hanghe-o jiengjeppuwe tahjieng. Hüpoi numan ngao phünpu me ye-omlak jingne numan ngao, o she iküma-a o she, yeje she ima-a yeje she itüoh.

¹³Numan yo me ütam shange ngohnang kü a? Iye yoptüoh. Ütam mongmeiye ngohnangkü a? Iye yihlupu hem loktüoh.

¹⁴Numan yo me ütam dak-e ngohnangkü a? Iye bumeinok jeiyonglan nyiktüoh, hüyange Youngwanpa min me iman-e Ite minnga phowe, I jingne yoppe tamtüoh,

¹⁵hüyange ütinglakke yoppu kaiye dakpa-a meilak, hüyange Youngwanpawe I loilak; hüyange Iye ünu jonne ngohyapoi, hatüo Ite ümeng winlak.

¹⁶Tüokhei numan meilak jingne, shümpawe shümpa shaome yoi püohpu jantüoh, hüyange shümpawe shümpa ja jingne yoppe tamtüoh. Khakshupu kahtawe yoppu hüyange lingpu me yeonge ünganwong ngohnang.

¹⁷Elijah-o teman kihpu nyoingoh wanglam pheipu kahta ja ne ngoh, hüyange Iye wai yekeilak jingne mongjüonge yop; hüyange kahtoknyu me wangpeng lüm phei me lekeng wok wai yekei.

¹⁸Hüyange Iye nishe yop, hüyange wangdange wai shon, hüyange kahtokke yoi ülick ngaine tam.

¹⁹Ü-jeiheinaolan, numan yo me ütam ngaoting mepu yejepe taima-a, hüyange shejawe I lüppe yene tamma-a,

²⁰aowe ünupa ja I yejepu lam mepu lüppe yene tam, Iye yaha ja lipu mepu yinlak, hüyange ünu maawe küppemah ne tamnang she Iye shingyah.