Read Konyak Naga 1 PETER 1 Bible Online

1 PETER 1 - Konyak Naga bible

1 PETER 1

¹Peter, Jesu Khrista lampuwe, Pontus, Galatia, Kapadosia, Asia, hüyange Bithinia me yanne ngohpu yinpalan tangte;

²Ipa Kahwange Yaha jaowe tam-e phapu me, Jesu Khrista te ngao jailak hüyange I iy shaitamlak jingne lepu hüyange nyinge tampu mepu, numan tangte shüpshe hüyange toloimei ünyei ngohtüoh.

³Teman Üpa Kahwang hüyange Youngwanpa Jesu Khrista te minyong tüoh! I mepu shüpshe üyonge üla ne puh-e hüyange üne-o Jesu Khrista lipu mepu yange yepuwe üyin me monghümlak pha;

⁴teman jingne wangdang me yoppu yemah okpu, yenuyeshaklak, hüyange yengne menge yetai okpu mothlei tüolak jingne,

⁵üküm nyih me ütahte ngailak jingne tümpu yinyepu jingne, numan aoyin Kahwang ünganwong kaiye ütinglakpu kaiye yomme ngohnang;

⁶tüojingne wongpong phei shuwe, sha-a ütenja tokpu maapu jingne juteih mahyahpoi, numan-e numan yinyepu me yeonge mongmei nang.

⁷Mah-e tailak jeyapoi, hanghepa hon vünne tokkelei nang, hükihpu hon phei-a toinyune numan hanghepa ütinglakpu ngohnang, tüopa ütinglakpute tokpa Jesu Khrista ütahte ngaiwante, wangshüm hüowe yihlupu phapu hüyange müktishiwa tüolak jingne;

⁸ao numan-e mannge, tüoyangpoi Ite kennang; numan-e sha-a I ye-ngeyapoi, Ite menge, ine ye-okpu mongmei hüyange müktishiwapuwe maawe numan mongmei nang;

⁹hüyange numan ütinglakpu ütahte hüowe hüke numan yaha yinyepu, numan-e tüowe ngohnang.

¹⁰Tüopa yinyepu jeng hipalan aoyinne numan jingne menglak shüpshe jeng itte tüoh, iman-e tüopa yinyepute jang hüyange ngange yam.

¹¹Iman me ngohpu Khrista Yahawe, Khrista jingne shanglak maawe hüyange tüophei me müktishiwa wangman-e ngailak jeng ütingpa me saki pha, hüyange hatüowe aope yejema-a hangke ngaikülak iman-e yam.

¹²Hanghe ngaoyin wangdang mepu shonpu Yaha Üjao kaiye aoyinne numante pungao ümei konnyüo, tüopa-a iman-e sha-a numante phateki, hüyange hanghe ngaoyin wangdang shongmokpalanne nehoi shinge leihunang, hipalanne yoi jingne yeje, hüpoi numan jingne tüolan ling she iman tangte ütahte ngai.

¹³Tüokhei numan kenmong tümyange kenting mongtapu ngohyah, hüyange Jesu Khrista ütahte ngaiwante numan tangte hanghe shüpshe yahpeilak ngoh, tüopa me numan monghümpu mongjüonge angtüoh.

¹⁴Numan ngaojaipu hayim ne mengpu khei, numan üshongwante yeshingpu hipak me nuwe shakpu leye tahling.

¹⁵Hüpoi numante nyikpa hangke üjao me ngoh, numan-o nyoingoh khongkümpu me hüke üjao me ngohyah;

¹⁶hangjingne tüopa hüke nyanne ngohnang, “Numan Üjaome ngohyah, hangjingne Tao üjao me ngohnang.”

¹⁷Hüyange aowe sheta yeleipe kahta lilite yoi toishao phei phinne ngaophün nang, Ite numan-e Üpa she nyikma-a, numan nyampu me numan yinpa ne muh nyoipu hipak linne tamtüoh.

¹⁸Numan puyimlan memuh jonne peipu jajang japu üyin wanglam mepu, mahlakpa toi, hon hei khüm-e numan shakpu ne yeje;

¹⁹hüpoi üko hüyange tushangpu yenangpu nyee üha toinyu iy, hüke Khrista iy kaiye numan shakyangki.

²⁰I-a kahtoknyu ükong wangshao memuh nyinge tamyange ngoh hüpoi numan jingne tüopa üküm hipak me ütahte ngaitam.

²¹I kaiye lipu mepu I yange yenetampu hüyange Ite müktishiwa phapu Kahwangte mengpalan numan ngohnang; tüokhei numan ütinglakpu hüyange monghümpu Kahwang me ngohnang.

²²Numan-e ngaotingpa te ngaojaiye aohüngpu yenangpe jeiheinao jawe jeiheinao jate teikenlak jingne numan yaha jaowe tamyangpu khei, numan-e jawe jate innyaipu mongjang phei phinne hüyange yelakpe teikenyah.

²³Hangjingne Kahwang üyin hüyange jinte ngohpu ngao kaiye mah-hah shepu üli mepu yeje, hüpoi yemahlakpa üli mepu numan ülane puh.

²⁴Hangjingne mei üshei hüng hei ngohnang; hüyange I müktishiwa üshei phao jupengke ngohnang. Hüng küinang hüyange jupeng yeimah nang;

²⁵Hüpoi Youngwanpa ngao jinte üküm yenangpe ngohnang. Hüyange hanghe pungao ümei numante konnyüo, hatüowa tüopa ngao ngohnang.