Read Konyak Naga 1 PETER 2 Bible Online

1 PETER 2 - Konyak Naga bible

1 PETER 2

¹Tüojingne ümeng üshei hüyange kon ümeng üshei, hüyange ümeng ngaopu üshei winyange,

²numan yinyepu me jonglak jingne, üla ne puhpu naotak halan kih-e jaoshe ihpa yaha düamyeng jingne lahnyik tüoh.

³Hüke ngohpune mengma-a, Youngwanpa shüpshe ngohnang she numan-e jüppe nyüoyangki.

⁴Kahtalanne ütingme I yeyahpe winpu, hüpoi Kahwang sheshao me leyangpu hüyange toinyu üyin long ja, I tangte peiye,

⁵numan-o üyin longyin kih-e, Jesu Khrista kaiye Kahwange yah oklakne yaha me toidopu pha ne, üjao ngengpa ükhong ne menglak jingne, yaha nok ja ne menge, numan lingtüoh.

⁶Hangjingne laingaowe inang: “Leihuyah taowe Zion me jaowetam yangpu hüyange toinyu üjeng nokjing longja angnang; Hüyange aowe Ite menglakei, I wüotüone yetamlak.”

⁷Tüokhei numan aoyinne ütinglakke mengyapeih, I-a toinyu long; hüpoi aoyinne yemeng iman jingne, “Nokwepalanne hanghepa long yeyah, tüopa nokjing me üjengpa ne meng.”

⁸Hüyange, “Kahtalan yashah hüopu longja ne, iman yeitampu longnyu ja ne mengteki.” Iman-e ngao yejaipuwe, ngaome yashah hüonang; hüke tüopa jingne iman nyingtam yange ngohyangki.

⁹Hüpoi numan-a leyangpu jat, ahngli ngengpa ükhong, üjao jat, Kahwangpa kahtalan, aowe wangnyak mepu yashan yalipu yoi wangngai tangte hüke numane-o I shemeipupa me ütahte ngaitamlak jingne nyik.

¹⁰Numan üshongwante Kahwang kahtalanne yemengpe ngoh, hüpoi numan sha-a Kahwangpa kahtalanne ngohnang; hipak ja me numan shüpshe yetüope ngoh, hüpoi sha-a numan-e shüpshe tüoteki.

¹¹Kenneteihpalan, numan kahtoknyu me yinpalan hüyange üjao yinkempalan ke, yaha phei tüi-e hokpu, meiye lengpu mepu numan yanne ngohtüoh she taowe numante tongnang.

¹²Yinhulanne hanghepa jengme numante toi ümeng lingpalan she numan phei tüi-e ngaonang, tüopa jeng me iman-e numan toimei ngeye I peipu nyih me Kahwang müktishiwa tamlak jingne, iman yo me numan nyoingoh meiye ngohyah.

¹³Numan-e Youngwanpa jingne kahta ngaokeng üshei phangte yutüoh; hüke ahngpate I üshei phei shetahpa she,

¹⁴hüyange Governorlante toi ümeng lingpalante shangne tamlak, hüyange toimei lingpalante yihlulak jingne Youngwanpawe shon she ngao jaiyah.

¹⁵Hangjingne hüke numan-e toimei lingpu kaiye kahta ü-ngalan ngawoopu mepu ngao ngaine yetampe laktamlak Kahwange mongpu ngohnang.

¹⁶Numan bumei tüoyangpuke, hüyange numan jing bumei-a ümenge küplak ne yejonpe, Kahwang rha ja leye ngohyah.

¹⁷Kahta üsheite wangshüm hüotüoh. Jeiheinaolan te kentüoh. Kahwangte nyamtüoh. Ahngpate wangshüm hüoyah.

¹⁸Shaoshanpalan, numan-e iyesheye teihpuwe meipu hüyange innenyaipu nokpulan shahate yeje, hüpoi tükke ye-okpupa te-o ngao jaiye yoi nokpulan phang me ngohyah.

¹⁹Hangjingne ütam-e Kahwang yekaome kenmong ngohpu jingne yeshupe shangepongpu tüowe nün okma-a, Kahwang sheshao me tüopa yahpu oklak me ngohnang.

²⁰Hangjingne numan-e aope ünu om, hüyange tüopa jingne shütpu tüo, tüopa nün okma-a, hanghe minyong shi? Hüpoi numan-e aope khakshuwe lingyange, hüyange tüopa jingne shangpong nang, tüopa nün okma-a Kahwang shaome tüopa muh yahlak ne ngohnang.

²¹Hangjingne tüopa jingne hei numan nyik; hangjingne numan I ya mee me woilak jingne Khristawe numan jingne shange, numan jingne leppu ja tüohyange tai.

²²Iye ünu hanghe-o yeling, yejema-a I jupen me tahleih hango ye-nge,

²³Aope Ite phoi, Iye leih-e yephoi; aope I shangepong, Iye nyamshaowe yetam; hüpoi ngaoting iye ngao phünpate yoi nying nyingke I phünne pha.

²⁴Ünu mepu yanne teman li phei me khakshupupa jingne üyin ngohlak jingne Iye yoi nying nyingke pee me yoi püm me teman ünu ki; hüyange Ite shütpu makowe numan meitam.

²⁵Hangjingne nyeehalanke numan yejepu lamme taiye ngohyangki; hüpoi sha-a numan Nyeeyompa hüyange Yahalan yompa tangte leih yeteki.