Read Konyak Naga 1 PETER 3 Bible Online

1 PETER 3 - Konyak Naga bible

1 PETER 3

¹Tüokhei shekonyulan, numan netanpalan ütam-e Kahwang ngao yejai huyapoi, tüoyangpoi yoi shekonyu nyoingoh kaiye, Kahwang ngao ye-ompe iman oklak jingne yoi netanpa phangme ngohyah;

²hangjingne numan nyoingoh meiyemapu hüyange jaoweshapu iman-e ngelak.

³Numan shangwüo shapu hüyange hon juyük yejema-a oleng ülam maapu o-pu, tüokihpu ütah o tahmei,

⁴hüpoi tüo nanleiye ümongye mongjang me, innyaipu hüyange nyaishümpu yaha, yemahlakpa o ne mengtüoh; tüopa yaha Kahwang shaome toinyu ngohnang.

⁵Hangjingne üshongwante üjao shekolanne-o Kahwangte monghüm-e iman yoi netanpalan phangme ngoh-e, iman yoi nying nyingke üyüo meinetam.

⁶Hüke Sarahwe Abrahamte nokpupa she nyik-e ngao jai; hüyange numan-e sha-a hanghe-o nyamne yetampe ütingpa me lingma-a numan-a yha hayimlan ngohnang.

⁷Hükih-e muh netanpalan, numan shekonyulan numan phei wong yenangpu nyu she, hüyange üyin shüpshe hünghao moth me tei ompalan she shinge, numan-e yoppu me nüngneipu yengohlak jingne juteih ümei me numan yoi shekonyute wangshüm teihüowe iman phei ngohyah.

⁸Ükümne, numan üshei phei, shüppeshapu yaha, yayenge teihpu, jeiheinaolante kenpu, innyaipu mongjang hüyange nyaishümpu kenmong ngohtüoh.

⁹Ümeng nanleiye ümeng yephape, hüyange phoihah shepu nanleiye yephoipe, moiheimanpahi phatüoh; hangjingne moiman moth leilak jingne hei numan nyik.

¹⁰Hangjingne, “Aowe üyinte kennang hüyange nyih ümei ngehunang, ümengpa mepu Iye yoi yee hüyange ngaoleih ye-ilak yoi jupen tükyah.

¹¹Hüyange ümengpa mepu lüppe ye-e Iye ümei lingne tamtüoh, chingmei yamme tüopate jange I taine tamtüoh.

¹²Hangjingne Youngwanpa mük khakshupulan tangme ngohnang, hüyange I na iman-e yoppute jaiye ngohnang. Hüpoi ümeng lingpalan phei tüi-e Youngwanpa sheta ngohnang.”

¹³Numan-e ümei jingne lahnyikke ngohma-a, numante shangne tamlak ao ngohnang shi?

¹⁴Hüpoi khakshupupa jingne numan shangne ngohyapoi, numan moiman, hüyange iman-e nyam-e tampu me tahnyam, yejema-a mongtahpai;

¹⁵hüpoi numan mongjang me Khrista Youngwanpa she jaowe angtüoh; hüyange numan monghümpu jeng kahta aowe tongnang, Ite numan yoiyoi tingpu janlak jingne tüm ngohyah; hüpoi innenyaiye hüyange nyamme jantüoh;

¹⁶hüyange numan juteih mongjang ümei me angtüoh, hümme aowe Khrista me numan üyin wanglam ümeite phoinang, numan hanghe jengme phoinang, tüopa jengme iman wüotüone tamlak.

¹⁷Hangjingne numan shangepongpu ngelak Kahwange mongpu ne mengma-a, ümeng linge shangpu phei-a, toimei linge shangpu shemei.

¹⁸Hangjingne Khristawe-o ünulan jintepu jingne ja me shangepongpu nge, yejaoyeshapulan nanleiye khakshupupa, hüke Kahwang tangte teman woiye in oklak jingne, I meime li ne tam, hüpoi yaha me üyin ne mengetam.

¹⁹Hanghe me yaha me I taiye küpnok me ngohpu yahalante konnyüo.

²⁰Hüke aoyin üshongwante Noah hipak me yenglin lingpu hipak me, Kahwange hipak laowe nünne tanne ngohwante, ngao yejaipe ngoh, imante nyüo, tüopa yenglin me üjingha hei, hüke kahta tet, yeng kaiye yin.

²¹Tüopa leye baptipu kaiye, pümme mak ngohpu winpu ipu yeje, hüpoi Kahwang yeme juteihmong jang ümei me yoppe dopu kaiye, Jesu Khrista yange yepu kaiye, sha-a numan-o yinnang.

²²I wangdangte onge wangdang shongmokpalan hüyange wonglan hüyange ünganwonglan I phangme angne tamme I Kahwang yakjah yeme ngohnang.