Read Konyak Naga 1 PETER 4 Bible Online

1 PETER 4 - Konyak Naga bible

1 PETER 4

¹Hüke Khrista mei me shangyang puwe, numan-e yoi nying nyingke juteih japhei o tüoh, hangjingne aowe mei me shangepong yangki, Iye ünu mepu lakteki;

²numan-e kahta nuweshakpuke mei me numan hipak towe ngohpulan-a shaaji ngohlak ne yeje, hüpoi Kahwange mongpuke ngohlak.

³Hangjingne nuweshakpu, ünyei lengpu, yuwejokpu, lengkhongpu, hahnyakpu, hüyange nunushepu moungte khümpu, tüolan khongkümpu me numan-o kemme, yinhulan lahnyikpu kih-e numan-e wangmanne hipak winteki.

⁴Tüopa jengme numan-e iman phei hüke jamloi nuweshakpu jakih kihpu me yekemtüoh-e iman-e yashanne numan jingne ümeng ngao nang.

⁵Hüpoi aowe üyin me ngohpalan hei lipalan ngao phünlak jingne tümme ngohnang, Ite iman yoi toishao phalak.

⁶Tüojing nehei iman liye ngohpalan te-o pungao ümei konnyüo, mei me ngohpu kahtalanke iman ütingme ngao phünlak, hüpoi Kahwange mongpuke yaha me üyin ngohlak.

⁷Shemin lamphe jingne üküm owe peiteki. Tüokhei numan yoppu me mongjang ütingpa me hüyange kenting mongtawe ngohyah.

⁸Ünyei ne numan yoi yoi pa me numan teikenpu me lahnyik tüoh; hangjingne teikenpuwe ünu maawe büange angnang.

⁹Shejate shejawe ngu-ngawe yengohpe yeonge teimeitüoh.

¹⁰Kahta liliye hünghao yahpuke, tüowe Kahwang shüpshe üngan jing yakjongpalanne meng. Ümeilanke, numan jeiheinao hei jeiheinao teijamtüoh.

¹¹Aowe ngaonang, Kahwangpa ngaolanke ngaotüoh; aoyinne shaoshanpu me jamnang Kahwange phapu wongke lingtüoh; sheminlamphe me Jesu Khrista kaiye Kahwang müktishiwa tamlak jingne, hangjingne Jesu Khrista jing müktishiwa hüyange ünganwong jinte üküm yenangpe ngohnang. Amen.

¹²Kenneteihpalan, numan toklak jingne numan yo me tokke nyüopu vün kih-e, peipute tüopa hüke numante ülam ja ngainangpu kih teihyange numan yatahshan.

¹³Hüpoi hangshinne numan Khrista shangepongpu teitamme hanpalan ngohnang, I müktishiwa ütahte ngaiwante numan yeonge mongmei puwe mongmeilak jingne, teishinpu phei mongmei tüoh.

¹⁴Khrista min jingne numante phoima-a, numan moiman, hangjingne müktishiwa, hüyange Kahwang Yaha numan tangme ngohnang.

¹⁵Hüpoi numan yo me aowe-o kahta toipake, yejema-a kuhpa, yejema-a toi ümeng lingpalan, yejema-a eiha toi me yeshupe lingpalanke tahshang,

¹⁶Hüpoi Khristan ja leye kahta jawe shangma-a, Iye yewüope tüopa min me Kahwang müktishiwa tamtüoh.

¹⁷Hangjingne Kahwange yoi noksalan yo me ngao phünpu wanglak hipak peiye ngohnang; hüyange tüopa-a üwangne teman me wangma-a, hümma-a Kahwang pungao ümei yejaipalan ükümpa yatuhshao hanghe ne menglak!

¹⁸Hüyange, “Khakshupulan nehoi payei she yin okma-a, hüma-a, Kahwangte yenyampu hei ünulan-a hanghe ne menglak?”

¹⁹Tüokhei aoyinne Kahwange mongpuke shange pongnang, iman-e ümei lingpu kaiye Lingengaipupa monghümpu pate yoi yaha phünne phatüoh.