Read Konyak Naga 2 PETER 3 Bible Online

2 PETER 3 - Konyak Naga bible

2 PETER 3

¹Hatüowa sha-a taowe numante nishepupa nyanpulai, kenne teipulan, hüyange tüopa moini me numan-e teihtüolak jingne taowe numante ngaotümme showe, numan wangngoipu kenmong jingne hengnang;

²üjao hipalanne üshongwante ngaopu ngaolan hüyange numan lampulan kaiye ngaopu Yinyepupa Youngwanpa ngaokeng numan-e teihtüolak yang.

³Üwangne numan üküm nyih me phoiwümpa lanne phoiwümme peikülak she shingyah. Iman yoiye nuweshakpu me kemlak;

⁴hüyange ilak, “I nishe yukülak janpuwa hanghe me ngohnangki? Hangjingne, payimlan lipu nyih mepu, sheminlamphe yelakpe muh ngohnang, linge ngaiyangpulan üwang memuh iman hangke ngoh hüke muh ngohnang.”

⁵Hipak nangjange taiteki, Kahwange ngaokeng pha, hüyange kahtok hei wangdang lingengai she; kahtoknyuwa yeng kaiye yengmepu tamme ngai she shing jang shinge iman-e hangke-o yeteihpe yaonang.

⁶Hüyange tüopa kaiye hüwante ngohpu kahtoknyuwa yengyong muleam kaiye mahtam.

⁷Hüpoi yejaoyeshapu kahtalan ngao phünlak hüyange mahlakpa nyih manngoi manngoi, tüopa ngao jawe muh, sha-a ngohpu wangdang hüyange kahtoknyulan tünne tüoh-e, vün jingne tümme ngohnang.

⁸Hüpoi, tüopa ngao numan-e tahpe, kenne teihpalan! Youngwanpa sheshao me nyih ja-a wangpeng haja ja kih-e, hüyange wangpeng haja ja-a nyih ja ke ngohnang.

⁹Ütam-e shonnangpuke teihnang, Youngwanpawe yoi janpu jeng jingne yeshonja; hüpoi ao-o mahne yetamhu, hüpoi üshei monglüppu yete ye ne tamhuwe numan ye me Iye laolünge nün oknang.

¹⁰Hüpoi kuhpa ja ke Youngwanpa nyih pei külak, tüopa nyih me wangdang lanne ngao üyong ngaiye linne tailak, hüyange wangme ngohpalan yeonge sheampuwe diye mahlak, hüyange kahtoknyu hei tüome ngohpu toinan üshei hahwinlak.

¹¹Hüke tüolan khongkümpu yengne menge tailak she shinge, numan Kahwang nyih peipu hangheye wangdanglan vün me jakke diye tailak, hüyange wangme ngohpalan yeonge sheampuwe diye tailak.

¹²Tüopa tanne hüyange yeonge yoonge üjao nyoingoh üshei hüyange Kahwangte nyampuwe numan hangke kahtane menglak tüopa nyoingoh me numan ngohtüoh!

¹³Hüpoi Iye janyangpuke teman-e wangdanglan üla hüyange kahtoknyu üla hanghe me khakshupulan ngohnang, tüopa jingne tanne ngohnang.

¹⁴Tüokhei kenneteihpalan, tüolan üshei tanwante, numan-e I sheshao me tushangpu hüyange ümeng yenangpe, chingmei me numan ngene tamlak jingne ngangtüoh.

¹⁵Hüyange teman Youngwanpate laowe tanpuwa Yinyepu she teihtüoyah. Tüone menge teman kenneteipu jeiheinao Paule-o Ite phapu konjong kih-e numan tangte nyan;

¹⁶tüolan jeng iye nyanpulai üshei me Iye nyan. Tüolan me ngao ütam ütam-a shinglak wanne ngohnang; hüyange üngapa hüyange mongjang wootepulanne-o yoi mahne tamlak ne, hangke lai ülaolan-o iman-e nyongküleih-e tam, hüke iman-e tüolan-o nyongküleih-e tamme yaowetam nang.

¹⁷Tüokhei kenneteihpalan, numan-e tüolan üwangne muh shinge, ümengpalan ngaoleih kaiye woiteiye numan-e yoite kangpu me yeyeilak jingne kentingyah.

¹⁸Hüpoi teman Youngwanpa hüyange Yinyepupa Jesu Khrista shüpshe hüyange shinge okpu me jongtüoh. Sha-a hüyange üküm yenangpe Ite müktishiwa tüoh. Amen.