Read Konyak Naga 1 JOHN 2 Bible Online

1 JOHN 2 - Konyak Naga bible

1 JOHN 2

¹Ü-hayimlan, numan ünu yejontamlak jingne taowe tüolan ngao numan tangte nyannang. Hüyange kahta ütam-e ünu om ma-a, Ipa phei temante teijampa Üjaopa Jesu Khrista ngohnang;

²hüyange I teman ünu jingne yinyetampa ngohnang; hüyange teman ünu jingne shaha yeje, hüpoi kahtoknyu nopu jingne ngohnang.

³Hüyange teman-e I ngaokenglan jonma-a, teman-e I shing she tüopawe teman-e shing.

⁴“Taowe I shingnang” she aohipawe inang, hüyange I ngaokenglan yejon, I tahleihpa, hüyange I me ngaoting yenang.

⁵Hüpoi aowe I ngao jaiye jonnang, I me ütingpa me Kahwang kenpu wangngoiteki. I me teman ngohnang she tüopawe teman-e shingnang.

⁶Tao I me ngohnang she aowe inang, I hangke kem, Iye-o hüke muh kemlak wongpong.

⁷Kenneteihpulan, taowe numan tangte ngaokeng üla hango yenyan, hüpoi üwang memuh numan-e hanghe nge, tüopa ngaokeng ülang nyannang; numan-e hanghe ngao jai, hatüowa tüopa ngaokeng ülang ngohnang.

⁸Tüoyangpoi taowe numante ngaokeng üla nyannang, hanghepa I me hüyange numan me, ngaotingpa ngohnang, hangjingne wangnyak-a linne tainangki, hüyange sha-a ütingme wangngai-a teenangki.

⁹Aowe tao wangngai me ngohnang she inang, hüyange yoi jeiheinao te nunang, I sha-a ngoiye wangnyak me muh ngohnang.

¹⁰Aowe yoi jeiheinaote kennang, I wangngai me ngohnang, hüyange I me yashah hüolak hango yenang.

¹¹Hüpoi aowe yoi jeiheinaote nunang, I wangnyak me ngoh nang, hüyange wangnyak me kemnang, hüyange Iye ümpeyete tainang tüopa yeshing, hangjingne wangnyakke I mük müone tam.

¹²Hayimlan, I min jingne numante numan ünu wintampu khei taowe numante nyannang.

¹³Pa yiman, ao üwangme muh ngoh, numan-e I shingpu khei taowe numan tangte nyannang. Naoshelan, numan-e ümengpa okpu khei taowe numan tangte nyannang. Hayimlan, numan-e numan Üpa shingpu khei, taowe numante nyanyangki.

¹⁴Pa yiman, ao üwang memuh ngoh, numan-e I shingpu khei, taowe numan tangte nyanyangki. Naoshelan, numan wongnangpu, hüyange Kahwang ngao numan me ngohtepuwe hüyange numan-e ümengpa okpu khei, taowe numan tangte nyanyangki.

¹⁵Numan-e kahtoknyu yejema-a kahtoknyu me ngohpu toilan tahken. Ütam-e kahtoknyute kenma-a, Ipa te kenpu I me yenang.

¹⁶Hangjingne kahtoknyu mei ünyei yah hupu, mükke ünyei yah-hupu, hüyange üyin otamaohepu, kahtoknyu me ngohpu tüolan khongkümpu Üpa mepu yeje, hüpoi kahtoknyu mepu ngohnang.

¹⁷Hüyange kahtoknyu, hüyange tüopa ünyei yah hupu linnetai nangki, hüpoi aowe Kahwange mongpu jonnang, I jinte üküm yenangpe ngohnang.

¹⁸Hayimlan, üküm hipak ngoipeiteki; teman Khrista phei wepa peinang she numan-e jaipuke, sha-a Khrista phei wepa maawe ngaiteki; tüowe üküm hipak ngoiteki she teman-e shingnang.

¹⁹Iman teman yo mepu ngaiye tai, hüpoi iman teman yo me ye-ompe ngoh, hangjingne teman phei om shih ma-a, teman phei yelakpe ngoh hahshepu. Hüpoi iman üshei teman yo me ye-om she ütahte ngailak jingne iman-e ngaiye tai.

²⁰Hüpoi numanpa-a, Üjaopa mepu minnga phowe lepu tüo, hüyange numan üsheiye shing.

²¹Numan-e ngaotingpa yeshing she taowe numan tangte nyanpu ne yeje, hüpoi numan-e tüopa shingpu khei, hüyange ngaoting mepu tahleih hango yengai: tüojingne taowe nyanyangki.

²²Jesuwa Khrista üja she aowe yejan ok, I kaiye üne-o ao üleihpa ngohnang shi? Aowe Ipa hüyange I Ha te yejan ok, I muh Khrista phei wepa.

²³Aowe Ihate yejanlakei, Iye Ipate-o yejan ok. Aowe Ihate janpu oknang, Iye Ipa ngeye oknang.

²⁴Numan pa-a, üwangne muh numan-e hanghe jai, tüopa numan me ngohne tamtüoh. Tüopa üwangne muh jaipuwa numan me ngohma-a numane-o Iha hüyange Ipa me ngohlak.

²⁵Hüyange tüopa hanghepa jinte üküm yenangpu üyin ngohne tüopa janpuwa Iye temante jan.

²⁶Aoyinne numan ünyong yete woihunang, iman jeng taowe tüolan ngao numan tangte nyanyangki.

²⁷Hüpoi I mepu numan-e hanghe minnga phowe lepu tüo, tüopa numan me ngohtepuwe, ütam-e numante nyüophalak, tüopa numan wongpongne yeje. Hüke Iye minnga phowe lepu kaiye sheminlamphe jeng numante nyüopuwe, hüyange tüopa-a ngaoting ne mengne, üleih yeje, hüyange tüopawe hangke numante nyüo, hüke numan I me ngohtüoh.

²⁸Hüyange sha-a hayimlan, I ütahte ngaima-a teman wongnanglak, hüyange I-yuwante I sheshaome wüoyetüolak jingne I me ngohtüoh.

²⁹I khakshupu me ngohnang she numan-e shingma-a, hümma-a aowe khakshupupa jonne ang, I-o Imepu puhpu, tüopa numan-e shingnang.