Read Konyak Naga 1 JOHN 3 Bible Online

1 JOHN 3 - Konyak Naga bible

1 JOHN 3

¹Leihuyah, hanghe kenpu temante Üpawe pha! Tüopawe temante Kahwang hayim she nyik; hüyange teman hüke ngohnang. Kahtoknyuwe teman hangne yeshingpu shi she ima-a kahtoknyuwe I yeshing.

²Mongkenlan, sha-a teman Kahwang hayimlan ngohnang, hüyange phei me teman hanghe ne menglakei tüopa üne-o ütahte manngai. I ütahte ngaiwante teman I kih-e ngailak, hangjingne I hangke ngoh, hüke muh teman-e I ngelak; tüopa-a teman-e shingnang.

³Hüyange Ite aowe tüopa monghümpu ngohnang, I hangke jaowe ngoh, I-o hüke muh yoi nying nyingke jaonang.

⁴Aowe ünu omnang, Iye ngaokeng mengnang; hüyange ünuwa ngaokeng mengpa.

⁵Teman ünu yahteilak jingne Khrista pei she numan-e shingnang; hüyange I me ünu yenang.

⁶Ao I me ngoh, Iye ünu yejon, aowe ünu jonnang, Iye I mannge, hüyange I yeshing.

⁷Hayimlan, ao te-o numan ünyong yete woine tahtam; aowe ütingpa lingnang I hangke khakshupu me ngoh, I-o hükemuh khakshupu me ngohnang.

⁸Aowe ünu jonnang, I kahshih mepu; hangjingne, kahshih üwang memuh ünu om. Kahshih toi mahtamlak, tüopa jingne Kahwang Üha ütahte ngaiyangki.

⁹Ünu jonyange ao-o Kahwang mepu yepuh; hangjingne Kahwang üyüo I me ngohnang, hüyange Iye ünu jonne ye-ok, hangjingne I Kahwang mepu puh.

¹⁰Tüokaiye Kahwang halan hüyange kahshih halan ütahte ngai hüonang; aowe ütingpa yeling, I Kahwang jing yeje, yejema-a aowe yoi jeiheinaolan te yeken I-o yeje.

¹¹Hangjingne teman-e shümpa hei shümpa teikenlak yang she, numan-e üwang memuh jaipu ngaolan-a hatüo ngohnang.

¹²Kain hangke ümengpa mepu ngoh, hüyange Iye yoi nao toi, hüke teman yengohlak yang. Hüyange hanghe jingne Iye I toi? Hangjingne I toishao yemeipe ngoh hüpoi Inao toishao khakshupu me ngohyangki.

¹³Jeiheinaolan, kahtoknyuwe numante numa-a, ya tahshan.

¹⁴Teman-e lipu mepu üyin tangte taiteki she shing, hangjingne teman-e jeiheinaolante kennang. Aowe yeken, I lipu me ngohnang,

¹⁵Aowe yoi jeiheinao te nunang, I kahta toipa; hüyange kahta toipalan ao te-o jintepu üyin yenang she numan-e shing.

¹⁶Teman jingne Iye yoi üyin angtampu khei, teman-e kenpuwa shing; hüyange teman-e jeiheinaolan jingne yoi üyin angtamlak yang.

¹⁷Hüpoi ao kahta me kahtoknyu toinyunanha ngoh, hüyange yoi jeiheinao wongpong ngeyange, I mepu yoiye shüpsheye teihpu tükke angma-a Kahwang kenpu I me hangke ngohlak?

¹⁸Hayimlan, teman-e ngaome, yejema-a ngao ngaopu me yeje, hüpoi toishao hüyange ngaoting phei teikenhah.

¹⁹Tüopawe teman ngaoting jing ngohnang she teman-e shinglak, hüyange I sheshaome teman mongjang nishe shingnetamlak,

²⁰hüyange hanghe hipak me teman mongjange teman yeinetamlakei, hangjingne Kahwang teman mongjang phei sheyongpu, hüyange Iye üshei shingnang.

²¹Mongkenpalan, teman mongjange teman yeine yetamma-a, Kahwang yekao me teman wongnange ngohnang;

²²hüyange teman-e hangheyin yulakei, tüopa teman-e Imepu tüonang; hangjingne teman-e I ngaokenglan jonnang, hüyange I mükshaome hanghe meinang tüopa lingnang.

²³Hüyange hatüowa I ngaokeng, teman-e I ha Jesu Khrista min me menglak hüyange jawe jate teikenlak, hüke teman-e Iye ngaokeng phapu meimeike.

²⁴Aoyinne I ngaokenglan jonnang I me jamme ngohnang, hüyange iman phei I ngohnang, hüyange I teman me ngohnang, tüopa-a Iye temante phapu Yahawe teman-e shingnang.