Read Konyak Naga 1 JOHN 4 Bible Online

1 JOHN 4 - Konyak Naga bible

1 JOHN 4

¹Mongkenpalan, numan-e yaha lilite tahmeng, hüpoi yahalan Kahwang mepu heiya yejepu iman tokke leitüoh; hangjingne tahleih hipalan maawe kahtoknyute yantepu.

²Numan-e Kahwang Yaha tüo kaiye shingnang; Jesu Khrista mei me pei she, tüopa yaha aowe jannang tüokihpu yaha khongkümpu Kahwang mepu ngohnang,

³hüyange yaha hanghepawe Jesu yejan hükihpu lan-a Kahwang mepu yeje. Hüyange tüopa-a Khrista phei wepa ne mengpu yaha, hanghepa jeng tüopa peiküki she, numan-e jaiyangki; hüyange sha-a tüopa-a kahtoknyu me ngohnang.

⁴Hayimlan, numan-a Kahwang mepu ngohnang; hüyange numan-e iman okyangki; hangjingne kahtoknyu me ngohpu phei-a, numan me ngohpupa sheyongpu.

⁵Iman kahtoknyulan; tüokhei iman-e hanghe ngao tüowa kahtoknyu, hüyange kahtoknyuwe iman ngaote jainang.

⁶Teman-a Kahwang mepu; aowe Kahwang shing Iye temante jainang; ao Kahwang mepu ne yeje Iye temante yejai. Tüowe teman-e ütingpa yaha hüyange tahleih yaha shingnang.

⁷Mongkenpalan, teman-e jawe jate teiken hah; hangjingne kenne teihpuwa Kahwang mepu ngohnang, hüyange aowe kennang, Kahwang mepu pupu, hüyange Iye Kahwang shing.

⁸Aowe kenneyeteih Iye Kahwang yeshing; hangjingne Kahwang-a Kenpupa.

⁹Kahwang halom kaiye teman üyin ngohlak jingne, Kahwang I kahtoknyute shon; tüome temante Kahwange kenpu ütahte ngai.

¹⁰Teman-e Kahwangte kenpu yeje, hüpoi Iye hi temante ken, hüyange teman ünu jingne yinyetampane Iye yoi ha shon; tüome kenne teihpu ngohnang.

¹¹Mongkenpalan, Kahwange temante hüshinne kenpu ne mengma-a, hümma-a temane-o jawe jate teikenlak yang.

¹²Kahta aowe-o Kahwang hangke tingmo mannge. Teman-e jawe jate teikenma-a, Kahwang teman me ngohnang, hüyange I kenpu teman me wangngoi nang.

¹³Tüokaiye I teman me ngohnang, hüyange teman I me ngohnang, tüopa Iye temante phapu Yaha kaiye teman-e shing.

¹⁴Hüyange kahtoknyu Yinyepane menglak, Ipawe I ha shon, tüopa toman-e nge, hüyange saki phanang.

¹⁵Aowe Jesuwa Kahwang Üha she janlakei, Kahwang I me ngohnang, hüyange I Kahwang me ngohnang.

¹⁶Tüo-khei teman jingne Kahwange kenpu hanghepa ngoh, tüopa toman-e shing, hüyange mengyangki. Kahwang-a kenpupa, hüyange aowe kenpu me ngoh, I Kahwang me ngohnang; hüyange Kahwang I me ngohnang.

¹⁷Hatüome temante kenpuwe wangngoine tamnang, ngaophünpu nyih me teman wongnange ngohlak jingne, hangjingne I hangke ngoh, teman-o tüopa kahtok me hüke ngohnang.

¹⁸Kenpu me nyamlak yenang; hüpoi wangngoipu phei kenpuwe nyampu jangetei nang, hangjingne nyampu shaoshi ngohnang, hüyange aowe nyamnang I kenpume wangpune manmeng.

¹⁹Teman-e kennang, hangjingne Iye temante üwangne ken.

²⁰Kahta ütam-e, “Taowe Kahwangte kennang” she ima-a, hüyange yoi jeiheinaote nu maa-a, I tahleihpa; hangjingne hanghepa jeiheinao Iye nge; Ite Iye yekenma-a, hümma-a, Kahwang, ao Iye ye-nge, Ite Iye yeken ok.

²¹Hüyange tüopa ngaokeng toman-e Imepu tüo, hüke aowe Kahwangte kennang Iye yoi jeiheinaote-o kenlakyang.