Read Konyak Naga 1 JOHN 5 Bible Online

1 JOHN 5 - Konyak Naga bible

1 JOHN 5

¹Aowe Jesuwa Khrista she menglakei I Kahwang ha, hüyange aowe Ipate kenlakei Iye ha te-o kennang.

²Hüke aope teman-e Kahwangte kenlakei, hüyange I ngaokenglan jonlakei, teman-e Kahwang hayimlante kennang she teman-e shing.

³Hangjingne teman-e I ngaokenglan jonlak, tüopa-a Kahwange kenpu ngohnang; hüyange I ngaokenglan hangki yihpu ne yeje.

⁴Hangjingne ao Kahwang mepu puh, Iye kahtoknyu oknang; hüyange okpupa hangheye kahtoknyu naonang tüopa-a teman ütinglakpu.

⁵Jesuwa Kahwang Ha, tüopa te ao mengyapeih I kaiye kahtoknyu okpu ao ngohnangki?

⁶Hatüowa I ao yeng hüyange iy me pei, hüke Jesu Khrista, yeng shaha me yeje hüpoi yeng hüyange iy kaiye. Hüyange saki phapa-a Yaha ngohnang, hangjingne Yaha-a ngaoting.

⁷Saki phapalan lüm ngohnang,

⁸Yaha, yeng, hüyange iy; hüyange tüolan lüm teimongnang.

⁹Teman-e kahtalan saki yahnangma-a, hümma-a Kahwang saki tüophei sheyongpu; hangjingne Iye yoi Ha jeng saki pha she, tüopa-a Kahwang saki ngohnang.

¹⁰Aowe Kahwang ühate mengnang, Ime tüopa saki ngohnang. Aowe Kahwangte menge ye-ok, Iye I leihpa ne mengnetam yangki; hangjingne hanghe saki Kahwange yoi Ha jeng phayangki, tüopa te Iye yemeng.

¹¹Hüyange Kahwange temante jintepu üyin pha hüyange tüopa üyin I Ha me ngohnang, tüopa saki-a tüo ngohnang.

¹²Ao me I Ha ngohnang I me üyin ngohnang, ao me Kahwang Üha yenang I me üyin yenang.

¹³Aowe Kahwang Üha min me meng numan tangte taowe nyannang, hatüowe numan me jintepu üyin ngohnang she shinglak.

¹⁴Teman-e Iye mongpuke ülamja yuma-a, Iye teman te jainang; tüowa I yekaome teman-e tüopu wongnangpu ngoh nang.

¹⁵Hüyange teman-e hanghe yin yulakei tüopa Iye jainang she teman-e shingma-a, hümma-a I te hangheyin yu tüolan tüoyangki she teman-e shingnang.

¹⁶Ütam-e yoi jeiheinao lilakne yejepe ünu jonpu ngema-a, Iye yoppedolak, hüyange lilakne yejepe ünu jonpalan jingne Kahwange Ite üyin phalak. Lilakne ünu ja ngohnang; tüopa jeng Iye yoppedolak yang she taowe ye i.

¹⁷Yeshupe lingpu üshei ünu ngohnang; hüpoi lilakne yejepu ünu ja ngohnang.

¹⁸Ao Kahwang mepu puh, Iye ünu yejon, hüpoi Kahwang mepu puhpu pawe yoi nying nyingke tükke angnang, hüyange ümengpawe Ite yelüt she teman-e shing.

¹⁹Teman-a Kahwang jing ngohnang, hüyange kahtoknyu khongkümpu ümengpa phangme ngohnang she teman-e shing.

²⁰Hüyange Kahwang üha peiteki, hüyange hangheye teman-e tüopa ngaotingpa shing, tüopa kihpu shinge okpu temante pha, hüyange teman tüopa ngaotingpate, hüke I ha Jesu Khrista me ngohnang she teman-e shing. Tüopa-a ütingpa Kahwang, hüyange jinte üküm yenangpu üyin.

²¹Hayimlan, mounglan mepu numan nying nyingke kentinge angyah.