Read Konyak Naga KAHPALAN 1 Bible Online

KAHPALAN 1 - Konyak Naga bible

KAHPALAN 1

¹Joshua litephei me Israel kahtalan-e Youngwanpate tong; “Toman nokphonglan yome Kananlan phei hoklak jingne ao üwangne onglak?”

²Youngwanpawe jan-e i, “Judah nokphong üwangne onglak; leihuyah, Taowe kahmük-a iman yak me phateki.”

³Hüyange Judah kahtalan-e Inao Simeon kahtalante i, “Tomante tampu kahmük wankam yekaote toman phei onghah; hüyange teman-e Kananlan phei tüi-e hokhah; tüophei me nangte tampu kahmük yekaote teman hüke jam-e taikülak.” Tüokhei Simeon iman phei tai.

⁴Hüyange Judah shapjute tai. Youngwanpawe imante shapju me okpu nge ne tam hüyange Kananlan hei Perizzlan naoyange Bezek me haja pen toi.

⁵Iman-e Bezek me Adonibezek nge, hüyange I phei tüi-e hok, hüyange iman-e Kananlan hüyange Perizzlan nao.

⁶Adonibezek phette tai, hüpoi iman-e I jange tai, hüyange I pho, hüyange I yakpenyu hei yapenyu teh win.

⁷Hüyange Adonibezek-e i, “Ahngpalan denyit imanjing yakpenyu hei yapenyulan tehyange ü-khao phangme üsho üno yam-e leye ngoh yangki; taowe linge tampuke hüke Kahwange üte linge tamnang.” Hüyange iman-e I Jerusalemte yahpei hüyange I tüo me li.

⁸Hüyange Judah kahtalan-e Jerusalem phei tüi-e hok, hüyange hatüo yah, hüyange yanglow phei mahtam, hüyange chingnyute vün intam.

⁹Tüo phei me Judah kahtalan-e phaotang kahmük me, heyekao me, hüyange kahjee me ngohpu Kananlan phei tüi-e hoklak jingne tai.

¹⁰Hüyange Judahwe Hebron chingnyu me ngohpu Kananlan aoyinte Kiriath Arba she nyik-e ngoh, iman phei tüi-e hokne yong. Tüoken me iman-e Sheshai, Ahiman, hüyange Talmai puhulan naowe tam.

¹¹Tüomepu iman Debir me ngohpalan phei tüi-e yayong. Üshong wante Debir min-a Kiriath Sepher ngoh yangki.

¹²Hüyange Caleb i, “Aowe Kiriath Sepher oklakei, hüyange yahlakei, taowe üha yhala Achsah sheko ne menglak jingne Ite phalak.”

¹³Hüyange Caleb ünao ükümpa Kenaz üha Othniel-e hatüo chingnyu yahpu ok; hüyange Iye Ite yoi yhala Achsah I shekonyu ne menglak ne pha.

¹⁴Naoyha poipu nyih Othniel-e yhate yoipate kah ja jingne tongkei she kang. Hüyange yha gado tok mepu yu, hüyange Caleb-e yhate i, “Nange hanghe yah-hupu?”

¹⁵Yhawe Ite i, “Üte moiman ja yahkei; nange tao heyekao kahmük üwan me ngohlak üne linge tampu khei, üphangye yeng ngaijingo omme üte yahkei.” Hüyange Iye yhate yeng ngaijing ütok hei üphangye moini pha.

¹⁶Hüyange Mosa Iküo, Kenlan huhayim heyekao me Arad ü-o me ngohpu logpee chingnyu mepu Judah kahtalan phei yuwe Judah phaonyu jongte ong; hüyange iman-e taiye tüoken me Amaleklan phei chingnyoi ngoh.

¹⁷Hüyange Judah kahtalan-e Inao Simeonlan phei tai, hüyange iman-e Zephath me ngohpu Kananlan naowetam, hüyange hatüo lanshe mahne tam. Tüokhei chingnyu min-a Hormah she nyik.

¹⁸Judah kahtalan-e Gaza tüopa mepu yikeng mongo omme, Ashkelon tüopa yikeng mong, hüyange Ekron tüopa yikengmong omme yah.

¹⁹Hüyange Youngwanpa Judah phei ngoh yangki, hüyange Iye kahtang nyoilan yah, hüpoi Iye kahjee me ngohpalan yejang ok, hangjingne iman me yan tongtoi ngoh yangki.

²⁰Hüyange Mosawe ngaopuke, Calebte Hebron pha; hüyange tüopa mepu Iye Anak puhulan lüm ngoiye jange tei.

²¹Hüpoi Benjamin lan-e Jerusalem me ngohpu Jebuslan yejang ok; tüokhei tenyih ngoiye Jerusalem me Benjaminlan phei Jebuslan ngohnang.

²²Hüyange Joseph nokphonge Bethel phei tüi-e ong, hüyange Youngwanpa iman phei ngoh yangki.

²³Hüyange Joseph nokphonge Bethel kuhshüklak jingne shon. (Tüopa chingnyu min üwangne-a Luz ngohyangki).

²⁴Hüyange kuhshükpalan-e chingnyu mepu kahta ja ngaiye nge, hüyange iman-e Ite i, “Chingmei lamlinge chingnyute onglak lamnyu tomante hüotampha, hüyange toman-e nangte shüpshe phei jonlak.”

²⁵Hüyange Iye imante chingnyu lamnyu-a hüo; hüyange iman-e chingnyuwa yanglow phei mahtam; hüpoi iman-e kahtapa hüyange Inok noksa khongkümpu yinne tam.

²⁶Tüokhei kahtapa-a Hitlan kahtokte tai hüyange chingnyu ja ling, hüyange tüopa min Luz she nyik; tenyih ngoiye tüopa min ngohnang.

²⁷Manasseh nokphong lan-e chingnyu hatüolan hüke, Bethshan chingnyu, Taanach chingnyu, Dor chingnyu, Ibleam chingnyu, Megiddo chingnyu, hüyange tüolan ü-o me ngohpu chingshaolan jange yetei ok; hüpoi Kanan lan-a hüke muh kahmük me nyoi ngoh.

²⁸Aope Israel wongnange ngai, iman-e Kananlante kange toi lingne tam, hüpoi iman jange teinepa yetampe ang.

²⁹Hüyange Ephraim nokphonge Gezer me ngohpu Kananlan yejangtei ok, tüokhei iman yo me Kananlan Gezer me ngohnang.

³⁰Zebulun nokphonge Kitron hei Nahalal chingnyulan me nyoipu kahtalan yejangtei ok; tüokhei tüoken me Kananlan yelakpe iman phei nyoi, hüyange iman jingne kange toi lingne tam.

³¹Asher nokphonge Acco, Sidon, Ahlab, Achzib, Helbah, Aphek, hüyange Rehob chingnyulan me nyoipu kahtalan yejangtei ok.

³²Iman-e jange yetei ok yahpu jingne Asher kahtalan-a tüome nyoi ngohpu Kananlan phei jam-e nyoi.

³³Naphtali nokphonge Beth Shemesh hei Bethanath chingnyu ni me nyoipu kahtalan yejangtei ok, tüokhei tüome nyoi ngoh pu Kananlan phei jam-e Naphtali kahtalan nyoi. Tüoyangpoi iman jingne kange toi lingne tam.

³⁴Hüyange Amorlan-e Dan nokphongte phaotang nyoite leih-e shunge yenetam, hüyange iman-e iman-a kahjee te laine yetam.

³⁵Amorlan yelakpe Heres kahtang me, Aijalon me, hüyange Shaalbim me yepope ngoh; hüpoi Ephraim hei Manasseh nokphong lan-e iman wanglam phangme mongjüonge wanglam lam-e ang, hüyange iman jingne kange toi lingne tam.

³⁶Hüyange Amorlan yikenga Akrabbim lamkeng te ongpu mepu Sela apyekao mepu hüyange ütangye ngoiye onge ngohyangki.