Read Konyak Naga KAHPALAN 10 Bible Online

KAHPALAN 10 - Konyak Naga bible

KAHPALAN 10

¹Abimelech phei me Israel yinlak jingne Dodo üha Puah, hüyange Iha Tola, Issakhar mepu kahta ja ngai; hüyange I Ephraim phaotang kahmük Shamir me ngoh.

²Hüyange Iye Israel wangpeng da me lüm kahpa ne meng. Tüophei me I li, hüyange Shamir me mutam.

³I phei me Gileadlan Jair ngai, Iye Israel wangpeng da me ni kahpa ne meng.

⁴Hüyange I hayim delüm ngoh, iman-e gado delüm me shot; hüyange iman chingnyu delüm ngoh, hanghepate tenyih ngoiye Havvoth Jair she nyik, hatüo Gilead kahtok me ngohnang.

⁵Aope Jair li, I-a Kamon me mu.

⁶Hüyange nishe Israel lan-e Youngwanpa sheshao me hanghe yemei hatüo ling, hüyange Baal hüyange Ashtaroth, Aram kahwang, Sidon kahwang, Moab kahwang, Amonlan kahwang, hüyange Philistialan kahwang shaoshan; hüyange iman-e Youngwanpa winne tüoh, hüyange I shao yeshan.

⁷Tüokhei Israel phei tüi-e Youngwanpa mongshih ngai, hüyange Iye iman Philistialan yak me hüyange Amor hayim yakme yüowe tam;

⁸Hüyange tüopa wangpeng me iman-e Israel hayimte toiteine tam-e hüyange shaoshi pha. Wangpeng pen me tet jingne Israel kahtalan khongküm Jordan kaiyange taiye Gilead me Amorlan kahmük me ngohpu khongküm iman-e shaoshitam.

⁹Hüyange Judah phei tüi-e, Benjamin phei tüi-e, hüyange Ephraim nokphong phei tüi-e hoklak jingne Ammon hayimlan-e Jordan kaiye tai; tüokaiye Israel yeonge shaoshi ngoh yangki.

¹⁰Hüwante Israel hayimlan-e Youngwanpate üngwün-e i, “Toman-e nang phei tüi-e ünu omteki, hangjingne toman-e toman Kahwang winne tüoh hüyange Baal shao shan yangki.”

¹¹Hüyange Youngwanpawe Israel kahtalante i, “Taowe numan Egyptlan yak hei Amorlan mepu, Ammonlan mepu, hüyange Philistialan mepu yeyinpu a?

¹²Üne-o Sidonlan, hei Amaleklan, hüyange Maonlan-e numan shaoshitam; hüyange numan-e üte üngwün, hüyange iman yak mepu Taowe numan yinne tam.

¹³Tüoyangpoi numan-e Tao winne tüoh hüyange ülao kahwanglan khüm; tüokhei Taowe shaaji numan nishe yeyintamlak.

¹⁴Taitüoh hüyange numan-e leyeyahpu kahwanglan te üngwün tüoh; numan shanghah shaoshi hipak me iman-e numan yinne tamtüoh.”

¹⁵Hüyange Israellan-e Youngwanpate i, “Toman-e ünu omyangki; hangheyin nang sheshao me meinang she teihyapeih hatüolan tomante lingtam tüoh; hüke tenyih toman hei yintampha she toman-e nangte yoppe tongnang.”

¹⁶Tüokhei iman-e ülao kahwanglan win hüyange Youngwanpa shaoshan; hüyange Israel shaoshipu shaaji Iye nün ye-ok.

¹⁷Hüwante Ammorlan jamshe shüppe jem, hüyange Gilead me lakjing ling. Hüyange Israel kahtalan iman nying nyingke jamshe shüppe jem, hüyange Mizpah me lakjing ling.

¹⁸Hüyange tüoken me kahtalan, Israel üshanglan ne jawe japhei tei ngaowe i, “Ammon hayim phei tüi-e wehok ükong wanglak ao ngoh nangki? Gilead me ngohpalan üshei tang me I üshangne menglak.”