Read Konyak Naga KAHPALAN 11 Bible Online

KAHPALAN 11 - Konyak Naga bible

KAHPALAN 11

¹Sha-a Gileadpa Jephthah-a wongnangpu naomei ja ne ngoh, I-a üshoyüonyu üha ne ngoh. Gilead mepu Jephthah puh.

²Hüyange Gilead shekonyuwe Ite hayimlan puhtam; hüyange aope I sheko hayim jonge küm, iman-e Jephthah jange tei, hüyange Ite i, “Üpa nok me nange moth yeleilak; hangjingne nanga ülao sheko üha ngohnang.”

³Hüwante I jeiheinaolan mepu Jephthah phette tai, hüyange Tob kahmük me ngoh; hüyange Jephthah shongte angsa kahtalan jem hüyange iman I phei kem.

⁴Hipak ütenja ngoh yange, Ammon lan-e Israel phei we ne meng.

⁵Hüyange aope Ammon lan-e Israel phei tüi-e hok, Gilead lwngmei lan-e Tob kahtok mepu Jephthah woiye peilak jingne tai;

⁶hüyange iman-e Jephthahte i, “Peikei hüyange teman-e Ammonlan phei hoklak jingne nang toman woipa ne mengkei.”

⁷Hüpoi Jephthahwe Gilead lwngmei lante i, “Numan-e tao yenupu a? Hüyange üpa nok mepu tao jange yetei a? Hangne numan shaoshi wantepa-a ü-tangte peipu?”

⁸Hüyange Gilead lwngmei lan-e Jephthah te i, “Tüojingne hei sha-a toman-e nang tangte leih-e peinang, toman phei nang tailak hüyange Ammonlan phei hoklak, hüyange Gilead me ngohpu üshei tangme toman üshangne nang menglak.”

⁹Jephthahwe Gilead lwngmei lante i, “Numan-e nishe tao nokte yahye yange Ammonlan phei hokma-a, hüyange Youngwanpawe iman üte phama-a, tao numan üshangne menglak?”

¹⁰Hüwante Gilead lwngmei lan-e Jephthah te i, “Temanpa me Youngwanpa saki ne menglak; nange ipuke ütingpa me toman-e linglak.”

¹¹Tüokhei Jephthah Gilead lwngmeilan phei tai, hüyange kahtalan-e I iman tangme üshang hüyange woipa ne lingtam; hüyange Jephthahwe I ngao khongküm Mizpah me Youngwanpa sheshao me ngao.

¹²Tüophei me Jephthahwe Ammonlan ahngpa tangte ngaolan kipa shonne i, “Ü-kahmük phei tüi-e hoklak nang ü-tangte peipu hatüowa nang hanghe ngoh nangki?”

¹³Hüyange Ammonlan ahngpawe Jephthah ngaolan kipate jan-e i, “Hangjingne Egypt mepu peiyange, Israel-e ü-kahtok, Arnon mepu Jabbok ngoiye hüyange Jordan ngoiye yahteki; tüokhei sha-a chingmei me tüolan-a leih yepha.”

¹⁴Jephthahwe Ammonlan ahngpa tangte nishe ngaolan kipa shon,

¹⁵hüyange Ite i, “Hüke Jephthahwe inang; Israel-e Moab kahtok, yejema-a Ammonlan kahtok yah yetai,

¹⁶hüpoi aope iman Egypt mepu ong, Israel-e phaonyu jong kaiye Ütak Yengchingke tai hüyange Kadesh te pei.

¹⁷Hüwante Israel-e Edom ahngpate ngaolan shonne i, ‘Nang kahmük kaiye toman taine tampha, she toman-e yoppe tongnang’; hüpoi Edom ahngpawe yejai. Hüke muh üne-o iman-e Moab ahngpa tangte shon, hüpoi Iye-o min she i. Tüokhei Israel Kadesh me ngoh.

¹⁸Hüwante iman phaonyu jong kaiye tai, hüyange Edom kahmük hüyange Moab kahmük neikon-e tai, hüyange Moab kahmük heong yekao me ngoi; hüyange Arnon jayekao me lak; hüpoi iman-e Moab yikengte ye-ong, hang jingne Arnon-a Moab yikeng me ngoh yangki.

¹⁹Hüwante Israel-e Amorlan ahngpa Sihon hüyange Heshbon ahngpa tangte ngaolan kipa shon; hüyange Israel-e Ite i, ‘Numan kahmük kaiye toman kahtokte toman taine tampha she toman-e yoppe tongnang.’

²⁰Hüpoi Sihon-e I yikeng kaiye tamlak ne Israelte mong yehüm; tüojingne Sihon-e iman kahta khongkümpu jamshe jemne tam, hüyange Jahaz me lak, hüyange Israel phei hok.

²¹Hüyange Youngwanpa Israel Kahwange, Sihon hüyange I kahtalan khongkümpu Israel yak me pha, hüyange iman-e iman ok; tüokhei tüopa kahmük me ngohpu Amorlan kahmük hei moth khongkümpuwa Israel-e yah.

²²Hüyange iman-e Arnon mepu Jabbok ngoiye, hüyange wanwüng jeng mepu Jordan ngoiye Amorlan kahmük khongkümpu yah.

²³Tüokhei sha-a hüke Youngwanpa Israel Kahwange, yoi kahta Israel tangme Amorlan mepu yah ngai yangki; hüyange tüolan-a nange yahlakpa a?

²⁴Nang Kahwang Chemoshwe hanghe nangte pha, hatüo yeyahlaka a? Hüyange Youngwanpa toman Kahwange toman shaome aoyin mepu yahngaitam, khongkümpuwa toman-e yahlak.

²⁵Sha-a Moab ahngpa Zippor üha Balak phei nang shemeipupa a? Iye Israel phei tüi-e ja me nehoi toktei yangkü a? Yejema-a Iye iman phei wehokte taiyang kü a?

²⁶Aope Israel Heshbon hüyange tüopa chingshaolan me, hüyange Aroer hüyange tüopa chingshaolan me, hüyange Arnon yengnah me chingnyu khongkümpu me, wangpeng gho lüm ngoh, hüwante hangne nange tüopa hipak me nishe leih yeyah?

²⁷Tüokhei taowe nang phei tüi-e ünu ye-om, hüyangpoi ü-phei hokpu kaiye nange üte yemeipu jonnang; Youngwanpa ngao phünpupawe, tenyih Israel kahta hüyange Ammonlan nipa me minphün phama!”

²⁸Hüpoi Ammon ahngpawe Jephthah ngaolan hanghepa I tangte shon hatüo te mong yepha.

²⁹Hüwante Youngwanpa yaha Jephthah tangme pei, hüyange Iye Gilead hei Manasseh kai, hüyange Gilead me Mizpah kaiye tai, hüyange Gilead me Mizpah mepu Iye Ammonlan tangte tai.

³⁰Hüyange Jephthahwe Youngwanpate jiengjep hüyange i, “Nange Ammonlan ü-yakte ütingme phaküma-a,

³¹hüma-a taowe Ammonlan tangme okpu ngeye leih yewante tenok tafün shongmepu aohipa ü-phei hüolak jingne üwangne ngailakei, Youngwanpa jingne menglak, hüyange taowe I jakke dolak jingne phalak.”

³²Tüokhei iman phei tüi-e hoklak jingne Jephthahwe Ammonlan tangte yengyin kaiye tai; hüyange Youngwanpawe I yak me iman pha.

³³Hüyange Iye Aroer mepu Minnith neikonpu ngoiye, chingnyu da ngoiye hüyange Abel-keramim ngoiye hüyange üngang toiye iman nao. Hüke Ammonlan Israel phang me ang.

³⁴Aope Jephthah Mizpahte inok yamme ye; hüyange leihu I ha yhala pheamkao yahyange polok-e I pongte yu; yha-a Iha tüoja shing ngoh yangki; yha tokte kaiye I hala yhala ao-o yenangpe ngoh.

³⁵Hüyange aope Iye yha nge, Iye yoi inkhek hit hüyange i, “Aya, ü-yhamei! Nange tao yeonge üphangpa ne linge tamteki; hüyange nang kaiye tao shaoshi üyongne menge tamteki; hangjingne taowe Youngwanpate üju epyangki, hüyange taowe jiengyangpu leihyene ye-ok!”

³⁶Hüyange yhawe Ite i, “Opa, nange Youngwanpa te nang ju epyangpu ne mengma-a, nang ju mepu hangke ngai hüke üte ling tamtüoh, hangjingne Youngwanpawe nang wepalan Ammonlan te nang jingne phuh hahyangki.”

³⁷Hüyange yhawe yoipate i, “Üjingne hatüo hei ling tamkhu! Lekeng ni ü-shaha tüotüoh, hümme tao phaotang yete taiye waalak, hüyange tao wange ngoipu yhala ju jingne mangshap lak, tao hüyange ü-einyulan.”

³⁸Hüyange Iye i, “Taitüoh.” Hüyange Iye yha lekeng ni jingne shonne tei; hüyange yha yanne tai, yha hüyange yha einyulan hüyange kahtang yeme yha wangengoipu naoyha ju jingne mangshap.

³⁹Hüyange lekeng ni linphei me, yha yoipa tangte leihye, aowe Iye jiengjeppu ke yhate ling; hüyange yhawe aope-o netan yeshingpe ngoh yangki. Hüyange Israel me hatüowa wanglam ja ne menge mah;

⁴⁰hüke Israel naoyhalan-e wangpeng lep iye Gilead lan Jephthah yhala mang shaplak jingne wangpengte nyih peli tailak.