Read Konyak Naga KAHPALAN 12 Bible Online

KAHPALAN 12 - Konyak Naga bible

KAHPALAN 12

¹Ephraim kahtalan jamshe wehoklak jingne jem hüyange Zaphon kaiye tai, hüyange Jephthah te i, “Hangne Ammonlan phei hoklak jingne kaiye tai, hüyange tomante-a yenyik? Toman-e nang shang tangme nenok jakke winlak.”

²Jephthahwe imante i, “Tao hüyange ü-kahtalan Ammonlan phei yeonge we ne menge ngohyangki; hüyange taowe numante nyikwante numan-e iman yak mepu toman yeyin.

³Hüyange aope numan-e tao yeyin oklak she taowe nge, taowe ü-üyin ü-yak me jonyange Ammonlan phei we ne menge tüi-e tai, hüyange Youngwanpawe iman ü-yak me pha; hüma-a tenyih numan hangne ü-tangte peipu, ü-phei tüi-e hoklak jingne hei?”

⁴Hüwante Jephthahwe yoi kahtalan khongkümpu woijem hüyange Ephraim phei hok; hüyange Gilead kahtalan-e Ephraim chinghah; hangjingne iman-e i, “Numan Ephraim mepu phette taipalan numan Gileadlan, Ephraim hei Manasseh yo me ngohnang.”

⁵Hüyange Ephraimlan phei tüi-e Gilead lan-e Jordan yengtien jing yah. Hüyange aope Ephraim mepu phette taipalan ütam-e, “Tao kaine tamkhu” she ilakei, Gilead lan-e Ite i, “Nang Ephraimlan a?” Aope Iye “Yeje” she ilakei,

⁶iman-e Ite i, “Hüma-a Shibboleth she itehu,” hüyange Iye i, “Sibboleth,” hangjingne Iye ju me ngao khakshuwe yengai ok; hüwante iman-e I phowe peilak hüyange Jordan yengtien jing me toine tam. Hüyange hüke tüopa hipak me Ephraimlan haja deli me ni toi.

⁷Jephthahwe wangpeng wok Israel kahpane meng. Tüophei me Gileadpa Jephthah li, hüyange Gilead ching yoi chingnyu me mu.

⁸Jephthah phei me Bethlehempa Ibzan Israel kahpa ne meng.

⁹Ihalan delüm ngoh; hüyange yhala delüm, Iye eiha jat phei nokne menge tam, hüyange Ihalan jingne eihajat mepu yhala delüm woipei. Hüyange Iye wangpeng nyit Israel me kahpa ne meng.

¹⁰Tüophei me Ibzan li hüyange Bethlehem me I mu.

¹¹I phei me Zebulunlan Elon Israel kahpa ne meng; hüyange Iye wangpeng pen Israel kahpa ne meng.

¹²Tüophei me Zebulunpa Elon li, hüyange Zebulun kahmük Aijalon me mu.

¹³I phei me Pirathonpa Hillel üha Abdon Israel kahpa ne meng.

¹⁴Ihalan deli hüyange Ihulan netan delüm ngoh yangki hüyange iman-e gado denyit me ongyange kem; hüyange Iye wangpeng tet Israel kahpa ne meng.

¹⁵Hüyange Pirathonpa Hillel üha Abdon li, hüyange Amaleklan phaotang kahmük Ephraim kahtok me Pirathon me mu.