Read Konyak Naga KAHPALAN 13 Bible Online

KAHPALAN 13 - Konyak Naga bible

KAHPALAN 13

¹Üne-o nishe Israel lan-e hanghe Youngwanpa mükshao me ünu ne meng hatüo ling; hüyange Youngwanpawe iman Philistialan yak me wangpeng deli pha.

²Dan jat mepu Zorahlan ja min Manoah she ngoh; hüyange I shekonyu ükengne ngoh, hüyange moi yepai.

³Hüyange Youngwanpa shongmokpa shekonyu tangte ngai, hüyange i, “Leihuyah, nang ükeng hüyange nao yepuh; hüpoi nang püm yekengpe ngailak hüyange netan nahaja puhlak.

⁴Tüojingne kentingyah, wuwüngti yejema-a wongnangpu yeng tahying, hüyange yejaopu hango tah hah;

⁵hangjingne jaiyah, nang püm yekengpe ngailak hüyange netan naha ja puhlak. I shangme shanglin nyit yejonlak, hangjingne puhnap memuh naha-a Kahwangte Nazirite (jaowetampu) ja ne menglak; hüyange Philistialan yak mepu Iye Israel yinlak jingne ükong wanglak.”

⁶Hüwante shekonyu peiye yoi netanpate i, “Kahwang kahtaja ü-tangte pei, hüyange I sheta Kahwang shongmokpa leye, yeonge müktishiwa ngoh yangki; I ümpeyekao mepu pei taowe Ite yetong hüyange Iye üte I min ye i.

⁷Hüpoi Iye üte i, ‘Leihuyah nang püm yekengpe ngailak, hüyange netan nahaja puhlak; tüokhei wuwüngti yejema-a wongnangpu yeng tahying; hüyange yejaopu hango tah hah, hangjingne naha-a puhpu nyih mepu I lipu nyih ngoiye Kahwangte Nazirite (Jaowetam-e) ja ne ngohlak.’ ”

⁸Hüwante Manoahwe Youngwanpate yoppe tong, hüyange i, “O Youngwanpa taowe nangte yopnang, nange shonpu Kahwang kahta-a toman tangte nishe shonpha, hüyange puh ne ngohpu naha phei-a toman-e hanghe linglakei tomante nyüotam pha.”

⁹Hüyange Kahwange Manoah ngaowüng jai, hüyange Youngwanpa shongmokpa nishe shekonyu tangte yha kah me shotte ngohwante pei; hüpoi netanpa Manoah yha phei yenangpe ngoh.

¹⁰Hüwante shekonyuwa mam-e phet hüyange yha netanpate i. “Leihuyah, nyih ja ü-shongte ngaipu kahta-a ü-tangte ngaiye ngohnang.”

¹¹Hüyange Manoah yayong hüyange shekonyu pheite woi, hüyange kahtapa shongte wenne Ite i, “Tüopa sheko phei ngaopu kahta-a nang a?” Hüyange Iye i, “Tao üja.”

¹²Hüyange Manoahwe tong, “Sha-a aope nang ngao ütahte ngailakei, naha üyin wanglam hangke menglak, hüyange Iye hanghe linglak?”

¹³Hüyange Youngwanpa shongmokpawe Manoah te i, “Taowe shekonyute ngaopu khongküm yhawe kentinge ngohyah.

¹⁴Wuwünglick mepu ngaipu hango yhawe yehahlak, yejema-a yhate wuwüngti yejema-a wongnangpu yeng yingne tahtam, yejema-a yejao yeshapu hahying hango yehahlak; taowe yhate ngaowe tampu khongküm yhate jonne tamtüoh.”

¹⁵Manoahwe Youngwanpa shongmokpa te i, “Chingmei lam linge toman-e nang tükke anghu nangki, hüyange nangjingne younpong üha ja tüm-e tampha ning.”

¹⁶Youngwanpa shongmokpawe Manoahte i, “Nange üte tükyapoi, taowe nang hahying yehahlak; hüpoi nange jakke dolak ja tümma-a, hüwante Youngwanpate phatüoh.” (Hangjingne Manoahwe I-a Youngwanpa shongmokpa she yeshingpe ngoh.)

¹⁷Hüwante Manoahwe Youngwanpa shongmokpa te i, “Nang ngao ütahte ngaiwante toman-e nangte iyeshepu phalak jingne, nangte hangke minpu?”

¹⁸Hüpoi Youngwanpa shongmokpawe Ite i, “Hatüowa yashanyalipu she shing jang shinge hangne nange ümin tongpu shi?”

¹⁹Tüokhei Manoahwe younpong üha-a hahying dopu phei yah, hüyange Youngwanpa, aowe yashanyali toi lingnang, Ite hatüo longnyu tangme jakke do.

²⁰Aope wümjong mepu vünloonga wangyete ong, Youngwanpa shongmokpa, Manoah hüyange shekonyu niye leiye ngohwante wümjong vünloong me ong, hüwante imni sheko netan niye kahtokte sheta khuhta khüm.

²¹Tüophei me shaaji Youngwanpa shongmokpa Manoah hüyange shekonyu tangte yengai. Hüwante Manoahwe I-a Youngwanpa shongmokpa she shing.

²²Hüyange Manoahwe I shekonyute i, “Ütingpa me tümni lilak yang, hangjingne tümniye Kahwang ngeteki!”

²³Hüpoi shekonyuwe Ite i, “Youngwanpawe teman toilakne ngaishipu ne mengma-a, Iye jakke dopu hüyange hahying dopu teman mepu yeyahhah shepu! Yejema-a hatüo khongkümpu temante yehüohah shepu! Yejema-a tüo kih-e temante sha-a shingne yetamhah shepu!”

²⁴Hüyange shekonyuwe netan naha ja puh, hüyange I min Samson she nyik; hüyange naha-a jong, hüyange Youngwanpawe I moiman tam.

²⁵Hüyange Zorah hei Eshtaol nipa me Mahanehdan me Ite Youngwanpa yahawe hengetam-e ükong wang.