Read Konyak Naga KAHPALAN 14 Bible Online

KAHPALAN 14 - Konyak Naga bible

KAHPALAN 14

¹Nyih ja Samson Timnahte lai, hüyange Timnah me Iye Philistialan yhala yo me naoyha ja nge.

²Hüwante I ong, hüyange Ipa hei Inyu nite i, “Taowe Timnah me Philistialan yhala yo me naoyha ja ngeki; tüokhei sha-a ü-sheko ne menglak jingne yha woipeikei.”

³Hüpoi Ipa hei Inyu niye Ite i, “Shoyekhüppu Philistialan mepu pahi nang sheko ne yahlak, nang pheipu yhalalan yo me yejema-a teman kahta yo me sheko ja nehoi yenangpu a?” Hüpoi Samson-e Ipate i, “Yha ü-tangte peine tampha; hangjingne yhawe üte meiye kenyangki.”

⁴Hüpoi Ipa hei Inyu niye hatüo Youngwanpa mepu she yeshing; hangjingne Philistialan phei tüi-e Iye hipak ja leiye ngohyangki. Tüopa hipak me Israellan Philistia phang me ngoh yangki.

⁵Hüwante Samson, Ipa hei Inyu niphei Timnahte lai, hüyange I Timnah wuwünglick kahte pei. Hüyange leihu, yengkong mailang üha jawe Ite mokhshe wao-e tam;

⁶Hüwante mokhshe Youngwanpa yaha üngan wong üyong puphei I tangte pei; I yakkeng me ngoh, hüyangpoi Iye younha ja hitpuke Iye yengkong mailanga yak phei phütte toi; Hüpoi Iye hanghe ling hatüo Ipa yejema-a Inyute ye i.

⁷Tüophei me I lai hüyange naoyhanyu phei ngao; Samson-e yhate kenne lei.

⁸Hüyange nyih ütenja ngohyange, Iye yha yahlak jingne leihye; hüyange Iye yengkong mailang mangte leine lamnahte yu, hüyange leihuyah, yengkong mailang püm me zah üngang pahyange, hüyange zahtai jelo ngoh yangki.

⁹Iye hatüo phohyah yange yak me jon, hüyange Iye hah jang hah-e tai; hüyange Ipa hei Inyu tangte pei, hüyange imante pha, hüyange iman-e hah. Hüpoi Iye yengkong mailang ümang mepu yah she imante ye i.

¹⁰Hüyange Ipa shekonyu nokte pei, hüyange Samson-e tüome mongmei mo ja tüm; hangjingne hüke naoshe lan-e linge ngohyangki.

¹¹Aope Philistia lan-e I nge, iman-e I phei ngohlak jingne shümpalan delüm ngoiye shon.

¹²Samson-e imante i, “Sha-a taowe numante nüngneilak ja tong phaning; mo nyih nyit mongme numan-e üte hatüo hanghe yeih iye okma-a, hüyange yam-e okma-a, hüwante taowe numante pengkhai phakshaoh delüm hüyange mo phakshao delüm phalakei;

¹³hüpoi numan-e hatüo hanghe üte ye-i-okma-a, hüwante numan-e pengkhai phakshaoh delüm hüyange mo phakshaoh delüm üte phalak.” Hüyange iman-e Ite i, “Toman-e jaiye nyaolakei, nang mepu nüngneilak-a itehu.”

¹⁴Hüyange Iye imante i, “Hahpu mepu ülam ja hahlak ngai, wong shenang pupa mepu ülam ja üwüng ngai.” Hüyange nyih lüm mongme nehoi iman-e nüngneilak-a hanghete i, ye-i-ok.

¹⁵Peli shepupa nyih me iman-e Samson shekote i, “Nüngneilak-a hanghe shi nang netanpate yohkei, hüke yejema-a nang hüyange nangpa nok toman-e vünne jakke winlak. Toman toinan tamlak jingne nange toman nyik-e jempu a?”

¹⁶Tüokhei mükphi phei Samson shongte I sheko pei hüyange i, “Nange üte nupahi nunangki! Nange üte-a yekenpu yang! Tomching kahtalante nange nüngneilak ja pha, hüyange hatüowa hanghe nange üte nehoi ye i.” Iye yhate i, “Leihuyah, taowe ü-pa yejema-a ü-nyute nehoi ye i, hüyange nangtepa-a ilak a?”

¹⁷Hüyange iman mo manküm manküm yhawe nyih nyit shap; hüyange nyit shepu nyih me Iye yhate i, hangjingne yhawe Ite yeonge kangpu ngoh. Hüwante yhawe yoi ching kahtalante nüngneilak-a itam.

¹⁸Hüyange chingnyu me ngohpalan-e nyit shepu nyih wanghe mannyippe Ite i, “Zahtai jelo phei hanghe shewüng pupa? Yengkong mailang phei-a hanghe wong shenangpupa?” Hüyange Iye imante i, “Ü-mahu ühawe kahtok yephek shihma-a, numan-e Ü-nüngneilak-a yeyam ok hah shepu.”

¹⁹Tüophei me mokhshe Youngwanpa yaha üngan wong üyong puphei I tangme pei, hüyange Iye Ashekelonte lai hüyange imching mepu kahta delüm toi hüyange iman toinan nyieyeyah, hüyange nüngneilak iye okpa lante mo phakshaoh pha. Hüyange mongshih üyong ngaiye Iye Ipanokte leihye.

²⁰Hüyange Samson-e yoi shekonyuwa, I mongjüm aowe I lüng, Ite phawe tüoh.