Read Konyak Naga KAHPALAN 15 Bible Online

KAHPALAN 15 - Konyak Naga bible

KAHPALAN 15

¹Hipak üten ja ngohyang phei me, wheat tahyah wante, Samson-e younpongha ja yahyange I shekote leilak jingne lai. Hüyange Iye I küote i, “Tao ü-sheko (tangte) tüpte onglakeih.” Hüpoi yha üpawe I ongne yetam.

²Hüyange yha üpawe Ite i, “Ütingme nange yha lanshe win-e tüoh she taowe teih; tüokhei taowe nang mongjümpate yha phayangki. Inaopa yha phei-a naoyha shemeipupa ne yeje a? Yha nanleiye Inaopa yayah.”

³Samson-e imante i, “Tüopa ünma taowe Philistia lante aope ümeng linglakei, üte ümeng phane yengohlak.”

⁴Tüokhei Samson-e taiye hiyan gho lüm pho, hüyange ayeng yahpei, hüyange Iye ünyei hei ünyei ni ni shayange hüyange ünyei ninipa me ayeng japong satam.

⁵Hüyange aope Iye ayeng me vün pahtam, Iye hiyanlan-a Philistialan kah tah ngaiye ngohpu yo me yanne tam; hüyange tahpe hüyange ngaiye ngohpu hüyange olive pesha khongküm jakke tam.

⁶Hüwante Philistia lan-e i, “Hatüo aowe lingpu?” Hüwante imante i, “Timnah mepu kahta ja mata Samson; hangjingne Samson sheko-a I mongjümpate phawe tam.” Hüyange Philistialan ong, hüyange yha vün me jakke toi, hüyange yha üpa nokte vün wok-e tam.

⁷Samson-e imante i, “Numan-e hüke lingpu ne mengma-a, taowe numante phuh hahlak, tüophei me hei tao laklak.”

⁸Hüyange Iye iman yasea hei yungkengte heappe üngang toitam; tüophei me I tai hüyange Etam long khüw phang me ngoh.

⁹Hüwante Philistialan ong hüyange Judah me lakjing ling, hüyange Lehi chinghah.

¹⁰Judah kahtalan-e imante tong, “Hangne toman phei hoklak jingne numan ongpu?” Iman-e jan-e i, “Toman-a Samson shalak jingne ongki, Iye tomante lingpuke Ite linglak.”

¹¹Hüwante Judah kahtalan haja lüm Etam long khüw nyoite lai, hüyange Samsonte i, “Philistia lan-a toman tangme wanglam lampalan she nange yeshingpu a? Hüma-a hatüo nange tomante hanghe lingpu?” Hüyange Iye imante jan-e i, “Üte iman-e lingpuke taowe-o imante ling.”

¹²Iman-e Ite i, “Philistialan yak me toman-e nang phalak, nang shalak jingne toman lai.” Hüyange Samson-e imante i, “Numan nying nyingke tao yetoilak she jieng jeptüoh.”

¹³Iman-e Ite i, “Yeje, toman-e nang sha hei shalak hüyange iman yak me phalak; toman-e nang yetoilak.” Tüokhei iman-e I wu üla niye sha, hüyange I longkhüw mepu yah ngai.

¹⁴Aope I Lehite yah pei, Philistia lan-e I phei hüolak jingne langphenge jemta; hüwante mokhshe Youngwanpa yaha wong üyong puphei I tangme pei, hüyange I yak me ngohpu wu-a yiha me vün ongpuke ngohyangki, hüyange I yak me sha puwa phünne mah.

¹⁵Hüyange Iye gado tahwaan üla ja kahtok me nge, hüyange I yak ngaiye hatüo toonne yah, hüyange tüophei Iye kahta hajaja toi.

¹⁶Hüyange Samson-e lok-e i, “Gado ja tahwaan phei shüngkhan shünge; Gado ja tahwaan phei, kahta haja ja taowe toi.”

¹⁷Aope Iye ngaopu lak, Iye tahwaan-a I yak mepu pitsheng win; hüyange tüopa kahmükte Ramathlehi she nyik.

¹⁸Hüyange Samson yeonge yengleye ngai, hüyange Iye Youngwanpate nyik hüyange i, “Nang shaoshanpa yakte tüopa yintampu üyong nange pha tamyangki; hüyange sha-a yenglepuwe lilak a? Hüyange shoyekhüppalan yak me yeilak a?”

¹⁹Hüwante Lehi me ngohpu kahkook Kahwange lüowe tam, hüyange tüopa mepu yeng ngai; hüyange aope Iye ying, I yaha nishe menghawe ye, hüyange I wongnange ngai. Tüokhei tüopa min-a Enhakkore she nyik, tenyih ngoiye hatüo Lehi me ngohnang.

²⁰Hüyange Philistialan hipak me Iye wangpeng da Israel kahpane meng.