Read Konyak Naga KAHPALAN 16 Bible Online

KAHPALAN 16 - Konyak Naga bible

KAHPALAN 16

¹Nyih ja Samson Gazate lai, hüyange tüome Iye üsho yüonyu ja nge, hüyange I yha tangte ong.

²Gazalante, “Samson tüome peiteki” she shingne tam. Hüyange iman-e I neikon, hüyange wangnyak phapan peten me yomme tan, hüyange phapan yepope tan-e i, “Napning wang manngai manngai teman-e tan-e ngohhah, tüophei me teman-e I toilak.”

³Hüyangpoi phawo ngoiye hei Samson shiye ngoh, hüyange phawo me I yayong hüyange chingnyu peten taküp hüyange shongni te wenao omme laowe no, hüyange tüolan khongküm I phaktang me paiyange Hebron sheshao me ngohpu kahtang ütangte paiye in.

⁴Tüophei me, Sorek kahjee me ngohpu sheko ja min Delilah phei I tei ken.

⁵Philistia wanglam lampalan nga ngoiye yha tangte pei hüyange yhate i, “Ite yohkei, hüyange I wong üyong ümeken me ngoh, shingkei; hüyange teman-e I shalak hüyange I tangme nokpu ne menge oklak ne, hanghe kon phei teman-e I pholak, hatüo leitüoh; hüyange toman püm lep ipuwe nangte khüm ükhüw gho pen me ja pong phalakei.”

⁶Tüokhei Delilahwe Samsonte i, “Nang wong üyong ümeken me ngohnangki, hüyange ütam-e nang phohuküma-a hangke phowe hangke angküme oklak, hatüo chingmei lam linge üte itehu.”

⁷Samson-e yhate i, “Manwanpu pelah wu nyit-e iman-e üte sa-ma-a, hüwante tao wong yenangpe ngailak, hüyange ülao kahta kih hei ngohlak.”

⁸Hüwante Philistialan wanglam lampalan yhate manwanpu pelah wu nyit yahpei, hüyange tüolan-e yhawe Ite sha.

⁹Sha-a tüp ümongpa me yhawe kahta ütam lowe tan-e ang. Hüyange yhawe Ite i, “Samson, Philistialan nang pho ne peinangpu!” Hüpoi vün me wu lette tamwantepu ke pelahwu-a Iye phünne win. Tüokhei I wong ümeken me ngohyapei yeshing.

¹⁰Hüwante Delilahwe Samsonte i, “Leihuyah, nange üte ye-i-yeshepe lingteki, hüyange üte lowe lamteki; chingmei lamlinge nangte hangke shalak, sha-a üte itüoh.”

¹¹Iye yhate i, “Iman-e jemanjonpu wu ülawe üte sa-ma-a, hüwante tao wong yenangpe ngailak hüyange ülao kahta kih hei ngohlak.”

¹²Tüokhei Delilahwe wu üla yahpei, hüyange tüolan-e Ite sha, hüyange Ite i, “Samson, Philistialan nang pho ne peinangpu!” Hüyange tüp ümongpa me kahta tan-e ngohyangki. Hüpoi Iye I yak mepu wu-a vee ja phünpu kih hei phünne tam.

¹³Hüwante Delilahwe Samsonte i, “Sha-ate ngoiye nange üte ye-i-yeshepe lingteki, hüyange üte lowelamteki. Nang hangke sha anglak üte itehu.” Hüyange Iye yhate i, “Ü-shang mepu shangmin üjing nyit takpu inkhek phei omme takma-a hüyange hatüo mongjüonge teishinma-a, hüwante tao wong yenang hüyange ülao kahta kih-e menglak.”

¹⁴Tüokhei I nyailüm meiye shi ne tam, shiye ngohwante Delilahwe shangmin nyit, takpu inkhek phei omme tak; hüyange tüolan-a yhawe mongjüonge teishin, hüyange Ite i, “Samson, Philistialan nang phone peinangpu!” Hüpoi shiye ngohpu I lüo, hüyange inkhek takpu nyoi, takpu inkhek hüyange wenao showe yahtai.

¹⁵Hüyange yhawe Ite i, “Nang mongjang üme yenangpu te nange hangke ‘Taowe nangte kennang she ipu oklak?’ Nange tao lümme ye-i-yeshepe lingteki, hüyange nange nang wong üyong ümeken me ngoh hatüo üte ye i.”

¹⁶Hüyange aope yhawe Ite nyih jeih she yeonge kang, hüyange Ite dak ne menge iyapeih, tüopa jeng me I yaha eange mah.

¹⁷Tüokhei Iye yhate ükümne I mongjang khongkümpu shingne tam, hüyange yhate i, “Shanglin nyit aope-o ü-shang me man ang nyüo; hangjingne ünyu seamemuh tao Kahwang jingne jaowe tampu (Nazirite) ngohnang. Ü-shang linne tamküma-a, hüwante pa-a, ü-wonge tao tüohkülak; hüyange tao wong yenangpe ngailak, hüyange ülao kahta kih-e hei menge mahlak.”

¹⁸Aope Delilahwe yhate I mongjang khongkümpu Iye ngaowe tamteki she shinge pei, yhawe Philistia wanglampalante nyik ne shonne i, “Tenyih pa-a ongkei, hangjingne Iye üte I mongjang khongkümpu ngaoteki.” Hüwante Philistia wanglam lampalan yha tangte ong, hüyange iman yak me ngin yah pei.

¹⁹Hüyange yhawe I yha yungkeng tangme shi ne tamlak jingne yoh, hüyange yhawe kahta ja nyik, hüyange Ite I shangme shangmin ütüp nyit ngohpu linne win. Hüwante yhawe I shaoshitam ne ükong wang, hüyange üngan wong taimah.

²⁰Hüyange yhawe i, “Samson, Philistialan nang pho ne peinangpu!” Hüyange shiye ngohpu mepu I lüo, hüyange teih, “Tao üshongpe taipuke tai mahlak, hüyange ü-nying nyingke yepokpe ngohlak.” Hüpoi Youngwanpawe I tüohyangki she Iye yeshing.

²¹Hüyange Philistia lan-e I phowe pei, I mük yokke win; hüyange Gazate I woiye lai, hüyange shakphan yan yankeileiye Ite sha, hüyange küpnok me angyange Ite tah ngütne tam.

²²Hüpoi shangmin linyang phei me I shangme nishe shangmin ngaine ükong wang.

²³Sha-a Philistia ahngpalan-e iman jing kahwang Dagon te dopu üyong dolak hüyange mongmeilak jingne jem; hangjingne iman-e i, “Teman kahwange teman wepa Samson teman yak me phateki.”

²⁴Hüyange aope kahtalan-e I nge, iman-e iman kahwang minyong; hangjingne iman-e i, “Teman kahwange temante teman wepa, hüyange teman kahmük mengtampa, aowe teman maawe toi, I phateki.”

²⁵Hüyange aope iman mongjangme mongmei üyong pei, iman-e i, “Teman jingne minwon küne Samsonte nyik kei.” Tüokhei iman-e küpnok mepu Samson nyik, hüyange iman sheshao me Ite wonnewangne tam. Hüyange iman-e I shongnyu nipa me yongne tam.

²⁶Hüwante Samson-e I yak me jonpu nahate i, “Tao nyeanglak jingne nok paipu shongnyu me üte jonne tamkhu!”

²⁷Sha-a nok-a sheko hei netan-e maateiye ngoh yangki; hüyange Philistia wanglam lampalan nga khongkümpu tüome ngoh yangki, hüyange noktok me netan hei sheko haja lüm nanjing Samson wonpute leiye shotte ngoh yangki.

²⁸Hüwante Samson-e Youngwanpate nyik, hüyange i, “O Youngwanpa Kahwang, taowe nangte yoppe tongnang, tao teihtüopha hüyange wong nangne tampha, taowe nangte yoppe tongnang, tüopa ünmehei, O Kahwang hüke ü-mük ni jingne taowe Philistia lante phuh hahlak ne.”

²⁹Hüyange Samson-e nokpaipu hotan mepu shongnyu ni me tük, hüyange tüolan me nyeangyange jate I yakjah ye-e, hüyange jate yaknya yeye phünyange wongkümme ngaiyange shung.

³⁰Hüyange Samson-e üngwün, “Philistialan phei tao li shi nüng!” Hüyange I wong khongküm puwe I khuh tayange shung, hüyange nok-a wanglam lampalan tangme hüyange tüome onge ngohpu üshei tangte toita. Tüokhei üyin me ngohwante Iye hangshin toi, tüopa phei I liwante toipu sheyong she Samson-e toipu ngoh yangki.

³¹Hüwante I jeiheinao hüyange I noksa kahtalan khongkümpu lai, hüyange I mang yahtai, hüyange I yah in-e Zorah hei Eshtaol nipa me Ipa Manoah mangjong me mu. Iye wangpeng da Israel kahpane meng.