Read Konyak Naga KAHPALAN 17 Bible Online

KAHPALAN 17 - Konyak Naga bible

KAHPALAN 17

¹Ephraim phaotang kahmük me kahta ja min Maika ngoh yangki.

²Hüyange Iye Inyute i, “Nange mahtepu khüm ngin gho pen me ja, hanghepa jeng jingne nange phoiwüm-e ngao, hüyange hatüo taowe jai, ngaoyangki, leihuyah, khüm ü-phei ngohnang; hatüo taowe yah.” Hüyange Inyuwe i, “Youngwanpawe üha nang moiman tüoh!”

³Hüyange Iye khüm ngin gho penme ja-a Inyute yah yetam, hüyange Inyuwe i, “Üha tangme phoiwümpu shahlak mepu laklak jingne taowe ü-yak mepu üha jingne moungja hüyange howe lingpu moung ja linglak, Youngwanpate phünne phanang; tüokhei sha-a taowe nangte sha-a leih yapha ning.”

⁴Hüyange aope Iye Inyute nginna leihpha, Inyuwe khüm ngin gho ni yah, hüyange hatüo khüm ai jonpate pha; Iye moung ja hüyange howelingpu moung noksa ja ling, hüyange hatüo Maika nok me ngoh yangki.

⁵Sha-a tüopa kahta Maikawe yoi jingne yoppe khümpu nokja ling, hüyange Iye ngengpa phakshaoh oleng hüyange teraphim ling, hüyange I jing ngengpa ne Ihalan yo mepu ja leye ang.

⁶Tüopa nyih hipak me, Israel me ahngpa yenangpe ngohyangki; kahta lili yoiye mongpu pa me hei ngoh yangki.

⁷Sha-a Judah nokphong mepu Bethlehem Judah me naoshe ja ngoh, I Levi naoshe, hüyange I tüo me peiye nyoi ngoh yangki.

⁸Hüyange tüopa kahta Bethlehem Judah mepu, ngohlak nyoijing ja yamme yayonge tai; hüyange I taiwante, Ephraim kahtang nyoi me Maika nokte pei.

⁹Maikawe Ite tong, “Nang ümeken mepu peipu?” Hüyange Iye Ite i, “Bethlehem Judah me taowa Levilan ja ne ngohnang, hüyange tao ngohlak nyoi ja me ngoh-e lakne taipuweih.”

¹⁰Hüwante Maikawe Ite i, “Ü-phei ngohkei, hüyange üte hengpa ja leye hüyange ü-ngengpa ja leye ngohkei, hüyange taowe nangte wangpeng ja me khüm ngin pen phalak, hüyange nyemo wangpu shinne hüyange nang hahying yah phaning.”

¹¹Hüyange Levipawe kahtapa phei ngohlak monge tei; hüyange naoshepa-a Ihalan yo me ja kih-e I sheshao me ngoh.

¹²Hüyange Maikawe Levi naoshe pa-a jaowetamme phünne pha, hüyange naoshepa-a I jing ngengpa ne meng, hüyange I Maika nok me ngohyangki.

¹³Hüwante Maikawe i, “Shaapa-a Youngwanpawe tao moiman tamlak, hangjingne ü-ngengpa ne Levilan mepu ja ngoh nang.”