Read Konyak Naga KAHPALAN 18 Bible Online

KAHPALAN 18 - Konyak Naga bible

KAHPALAN 18

¹Tüolan nyih hipak me Israel me ahngpa yenangpe ngoh. Hüyange hükihpu nyih hipak ja me Dan nokphong I yoi ngohlak jingne mothleipu ja yamme ngoh; hangjingne tüopa hipak ngoiye Israel nokphong yo me iman mothlei hango iman tangte yepeipe ngoh yangki.

²Tüokhei Danlan-e iman nokphong shangtoi khongkümpu mepu wongnangpu kahta nga, Zorah mepu hüyange Eshtaol mepu, kahmükte kuhshüklak hüyange nyoiphante leilak jingne shon; hüyange iman-e imante i, “Taitüoh hüyange kahmük nyoiphante leitüoh.” Hüyange iman-e Ephraim phaotang kahmük mepu Maika nokte pei, hüyange tüome lak.

³Iman Maika nok me ngohwante, iman-e Levilan naoshepa ngao me shinge ok; hüyange iman leihye yange hüyange Ite i, “Aowe nang tüome woi pei ei? Tüome nang hang lingpu shi? Hatüome nang toishao-a hangshi?”

⁴Iye imante i, “Hüke hüyange hüke Maikawe üte namno nang; Iye tao nanmee phawe angnang, hüyange tao I jing ngengpa ne menge ngohnang.”

⁵Hüyange iman-e Ite i, “Toman-e nangte yoppe tongnang, toman taipu hatüowa okpu ngelak heiya ye-ngelak Kahwangte tongkei.”

⁶Hüyange ngengpawe imante i, “Chingmei me taitüoh; hanghe jingne numan tainang, tüoyekao me Youngwanpawe leinang.”

⁷Hüwante kahta nga-a yan hüyange Laishte ngoi, hüyange tüome ngohpu kahtalan nge, hangke iman Sidonlan lepu me wüngmak-e hüyange tüome imante ümeng linglak ne wongnangpu ao-o yenang, hüyange iman Sidonlan phei yeonge jaiye nyoi, hüyange kahta ao phei-o hango teishinpu yenang.

⁸Hüyange aope iman jeihei naolan tangte Zorah hüyange Eshtaolte leihye; iman jeihei naolan-e imante i, “Numan ngaolan hangke?”

⁹Iman-e i, “Yayongtüoh, Laishlan phei hokne teman onghah; hangjingne toman-e kahmük-a ngeteki; hüyange leihuyah, hatüo yeonge meinang ei; hüyange numan wüngkütük-e ngohlak a? Onglak hüyange kahmük-a yahlak jingne nyaiye khaiye tahngoh.

¹⁰Aope numan tailakei, nyailüm meipu kahtalan kahtok jate peilak, hüyange kahtok-a yongnang; hangjingne Kahwange hatüo numante phateki; kahtoknyu me ngohpu hanghe-o yetoilak kahmük ja ngoh nang.”

¹¹Tüokhei Zorah hei Eshtaol mepu Danlan nokphong kahta gho wok wehok o tümyange tai;

¹²hüyange iman ong, hüyange Judah me Kiriath Jearim me lak; tüokhei tenyih ngoiye tüopate iman-e Mahanehdan she nyik; leihuyah tüopa-a Kiriath-Jearim phei me ngohnang.

¹³Hüyange tüomepu iman-e Ephraim phaotang kahmük kaiye tai, hüyange Maika nokte pei.

¹⁴Hüwante Laish kahmük kuhshükne taipalan kahta nga-e iman jeihei naolante i, “Tüolan nok me ngengpa phakshaoh ja hüyange kahyaknok, hüyange moung ja hüyange howe lingpu moung ja ngohnang she numan-e yeshingpu a? Tüokhei sha-a numan-e hanghe linglak teih tehu!”

¹⁵Hüyange iman-e tüoyete lüp, hüyange Levipa naoshepa nokte Maika ngohpu nyoite pei, hüyange I hangke ngoh tong.

¹⁶Sha-a Danlan kahta gho wok ngoiye hoklak yonglah phei, petente onglak nyoi me yong;

¹⁷hüyange kahmükte kuhshüklak jingne ongpu kahta nga ong, hüyange ümongte ong hüyange kahyak, ngengpa phakshaoh, hüyange kahyaknok hei howe lingpu moung yahyange yu; hüyange ngengpa-a petente onglak lamnyu me wehok o tümpu kahta gho wok phei yong.

¹⁸Aope tüolan kahta Maika nokte ong, hüyange kahyak, ngengpa phakshaoh, kahyaknok hüyange howe lingpu moung yah yüo, ngengpawe imante i, “Numan-e hang lingke?”

¹⁹Iman-e Ite i, “Nang jünge ngohtüoh, nang yak-e nang jute büangyah, hüyange toman phei woikei, hüyange nang toman üpa ja ne hüyange ngengpa ja ne mengkei. Nang jingne kahta ja nok me ngengpa ne menglak meipu heiya, yejema-a Israel me jatnyu ja hüyange nokphong tangme ngengpa ne mengpu shemeipu?”

²⁰Hüwante ngengpa mongmeiye teih, hüyange Iye ngengpa phakshaoh, kahyaknok, hüyange mounga yah hüyange kahtalan yo me tai.

²¹Tüokhei iman tokphei lüp hüyange yanne tai, hüyange hashih naha hei tampu yinmok hüyange toinan iman shaome ang.

²²Aope Maika nok mepu iman ütenja tai, Maika nok neikon-e ngohpalan kahtalan jam-e jem, hüyange Danlante leiyange kemyüo.

²³Hüyange iman-e Dan hayimte üngwün, hüyange iman-e yoi sheta lüp, hüyange Maikate i, “Ükhong hüke peilakne hatüo nanga hangheye shaoshipu shi?”

²⁴Iye jan i, “Numan-e taowe lingpu kahwanglan yah tainang hüyange ngengpa woiye tainang, hüyange taowa hanghe towe ngoh nangki? Hüma-a, hangne numan-e üte, ‘Hangheye nang shaoshipu shi she tongpu?’ ”

²⁵Hüyange Danlan-e Ite i, “Mongshih ngaipu ütam-e nangte yak yuma-a, nang hüyange nenok noksa üyin mahwe ngohlak yang, toman yo me nange ngao tah ngai.”

²⁶Tüophei me Danlan-a yoi lamte tai; hüyange aope I jingne iman-a jamloi wong nangpu yang she Maikawe ngeye ok, I toklüppe nokte leihye mah.

²⁷Tüophei me Maikawe hanghe ling, hatüo yahyange hüyange I jing ngengpa woiyange, Danlan jünge nyailüm meiye ngohpu kahtalan tangte Laishte pei, hüyange yanglow phei iman chinghah, hüyange iman-e chingnyute vün in.

²⁸Hüyange yinnetampu yenangpe ngoh, hangjingne hatüo Sidon mepu jamloi jaiye ngoh, hüyange ao phei-o iman teishinpu yenangpe ngoh; hüyange hatüo Bethrehob ü-o me ngohpu kahjee me ngoh yangki. Hüyange iman-e chingnyu ling, hüyange tüome ngoh.

²⁹Hüyange iman-e chingnyu min iman payim Dan ao Israel me puh, I minleiye Dan she nyik; hüpoi üwangne-a chingnyu min Laish ngoh yangki.

³⁰Hüyange Danlan-e iman jingne kahyak-a ang; hüyange Gershom üha Jonathan, Mosa ühu, I hüyange I hayim kahmük-a küpnokte phowe mantei mantei Danlan jat ngengpa ne ngoh yangki.

³¹Tüokhei Shiloh me Kahwang nok ngohpute ngoiye, Maika kahyak-a iman-e ang.