Read Konyak Naga KAHPALAN 19 Bible Online

KAHPALAN 19 - Konyak Naga bible

KAHPALAN 19

¹Tüolan nyih hipak me aope Israel me ahngpa yenangpe ngoh, Levilan ja Ephraim phaotang kahmük üshok yete taiye, Iye Bethlehem Judah mepu phongphenyu yah.

²Hüpoi phongphenyuwe I phei mongshih ngai, hüyange I mepu Bethlehem Judah mepu Ipa nokte yha ye mah, hüyange lekeng peli nanjing tüome ngoh.

³Hüyange yha netanpa yayong, hüyange yhate ngaomei ngaowe yha nishe woiye yelak jingne yha pheite tai. I phei shaoshanpalan hüyange gado nishüp ja ngohyangki. Hüyange I yoi küo nokte pei; hüyange aope shekonyu üpawe I nge, I mongmei sheiye I phei hüolak jingne pei.

⁴Iküo, shekonyu üpawe I ngoine tam, hüyange I phei nyih lüm nyoi; tüokhei iman hahyinge hüyange tüome ngoh.

⁵Hüyange peli shepupa nyih me iman shomme shonge lüo, hüyange I tailak jingne tüm; hüpoi shekonyu üpawe matapate i, “An üjingha hahpuwe nang wongnang ne tamtüoh, hüyange tüophei me nakshih numan taine yayongyah.”

⁶Tüokhei iman shotte ye, hüyange imni moini jam she hahying; hüyange shekonyu üpawe kahtapate i, “Taowe yoppe tongnang, teyapa-a hüke muh ngohkei, hüyange nang mongme mongmei ne tam-e ngohkei.”

⁷Hüyange kahtapa-a tailak jingne tüm; hüpoi Iküowe Ite yoppe tong, hüyange tüome I üne-o nyoi.

⁸Hüyange nyih nga shepupa me tailak jingne I napning shonge yong; hüyange shekonyu Ipawe i, “Taowe nangte yoppe tongnang, nang mongjang wongnangne tamtüoh, hüyange wanghe hümme manta manta tanne ngohkei.” Hüyange imni moiniye jam-e hahying.

⁹Aope kahtapa tailak jingne yayong, I hüyange phongphenyu, hüyange I shaoshanpa; Iküo, shekonyu üpawe Ite i, “Leihuyah, sha-a ün ngoi nang, wangnyak phapan tankei she taowe nangte yoppe tongnang; leihuyah, nyih linteki, tüome lak-e ngohkei, hüyange nang mongme mongmeine tam-e ngohkei; hüyange ngainap shonge lüoyah, hüyange nokte yetüoh.”

¹⁰Hüpoi kahtapawe shaaji tüome-a pha yepümhu; I yayong hüyange yanne tai, hüyange Jebus phei (hatüowa Jerusalem) janhüowe owe pei. Iphei gado nishüp ja hangki kipu, hüyange phongphenyu I phei ngoh yangki.

¹¹Aope iman Jebus ü-o me ngoh, hipak-a linteiye ngoh, hüyange shaoshanpawe nokpupate i, “Shaapa-a kei, teman-e Jebuslan chingnyute leih yehah hüyange tüoken me lak hah!”

¹²Hüpoi I nokpupawe Ite i, “Aoyin Israellan ne yeje, iman eiha jat chingnyu yete teman-e yeyelak; hüpoi teman Gibeah yekaote taihah.”

¹³Hüyange Iye I shaoshanpate i, “Kei teman-e tüoni jajapahi me, Gibeah yejema-a Ramah me shihah.”

¹⁴Tüokhei iman yoi lamnyute tai; hüyange iman Benjamin jing Gibeah ü-o me ngohwante wanghe nyip,

¹⁵hüyange iman-e Gibeah me peiye laklak jingne leihye. Hüyange I ong, hüyange chingnyu lampong me shot; hangjingne aowe-o iman yoi noksa me ngoitamlak jingne yewoi.

¹⁶Hüyange leihuyah, ünpong me wupa ja kah me toilinge ngohpu mepu onge ngoh; kahtapa Ephraim phaotang kahmük mepu ne ngoh, hüyange Gibeah me nyoiye ngohyangki; hüyange tüome ngohpalan-a Benjamin lan ne ngoh yangki.

¹⁷Iye yoi mük weam-e lei, hüyange chingnyu chingyang me yinkempu kahta nge; hüyange wupawe i, “Nang hang taiki? Hüyange nang ümeken mepu peiki?”

¹⁸Iye Ite jan-e i, “Toman Bethlehem Judah mepu Ephraim phaotang kahmük üshok yete tainang, tüoyekao mepu tao pei, hüyange tao Bethlehem Judahte tai, hüyange sha-a nokte leihye nang; hüyange tao woi inne kahta ao-o yenang.

¹⁹Toman gado jingne tahjant hüyange hahying ngohnang; hüyange üjingne, nang rhanyu hüyange nang shaoshanpalan phei ngohpu naoshelan jingne- an hüyange wuwüngti ngohnang; hanghe-o yewang yengoipe yenang.”

²⁰Hüyange wupawe i, “Nang phei chingmei ngohtüoh; nang wongpong lili khongkümpu taowe paowe tüklak, chingyang me tahlak.”

²¹Tüokhei Iye I yoi nokte woi in hüyange Gadote hahying pha; hüyange iman-e yoi yatuh yakpho hüyange hahying.

²²Iman mongmeiye ngohwante, leihuyah chingnyu mepu jajang japulan-e nok shüpneiye neikon, hüyange taküpte kong; hüyange iman-e nok nokpu wupate i, “Nenokte ongpu kahta-a aoheyeih, toman-e I phei phwnglakei woiye yüokei!”

²³Hüyangpoi wupa nokshaote yu hüyange imante i, “Tah ü-jeihei naolan, hüke yemeipe tahjon; tüopa kahta tenokte hei peipu yinpa ngohnang, hükihpu ümengpa jonlak tah ikei.

²⁴Leihuyah, tüome üha yhala naoyha ja ngohnang, hüyange I phongphenyu; iman taowe woiye yüoküning, hüyange numan-e iman innenyai ne tamtüoh, hüyange imante numan-e hangke mong hüke lingyah; hüpoi tüopa kahta tepa-a ümeng hango tahling!”

²⁵Hüpoi kahtalan-e I ngaote yejai; tüokhei kahtapawe I phongphenyu shuiye nokshaote yüo, hüyange iman tangte woiye yüo; hüyange iman-e yhate kange jon, hüyange napningte ngoishe yhate iman-e shushupuke jon; hüyange aope wangngai hipak ngoi, iman-e yha taine tam.

²⁶Hüwante shekonyu wangngaipu phei jamshe ye, hüyange yha nokpu ngohpu nyoi kahtapa taten shongme wang manngai manngai lamyange ngoh.

²⁷Aope yha nokpuwa napning yayong, hüyange taküp ep, hüyange I lamyete tailak yongengai; hüyange leihuyah, sheko I phongphenyuwa, yha yak-e yeyüo okpe tafün shongme lamyange ngoh yangki.

²⁸Hüyange Iye yhate i, “Lüotüoh, taihah;” hüpoi yejan. Hüwante Iye yha gado tangme ki, hüyange kahta-a yayong hüyange Inokte tai.

²⁹Hüyange aope I inokte ngoiye pei, Iye yangja yahpei, hüyange I phongphenyute jonyange üwen mei phin pen me ni ne menge yha teh khoih; hüyange Israel nokphong pen-me-ni üshei yete yha mei shon.

³⁰Hüyange tüopa ngepulan üsheiye i, “Egypt kahtok mepu Israel ngaipu nyih mepu tenyih ngoiye tüopa kih-e aope-o manngai hüyange ngaiye-o yepei; tüopa jeng teih nyüotüoh, shoyah hüyange ngaotüoh!”