Read Konyak Naga KAHPALAN 2 Bible Online

KAHPALAN 2 - Konyak Naga bible

KAHPALAN 2

¹Sha-a Youngwanpa shongmokpa Gilgal mepu Bokimte ngoi, hüyange Israel lante i, “Taowe numan Egypt mepu yah ngai, hüyange Taowe numan jing pajeiyong lante janpu kahtokte numan woi pei. Hüyange Taowe i, ‘Taowe numan phei jiengjep yangpu aope-o yemenglak.

²Hüyange tüopa kahmük me nyoipulan phei numan-e aope-o jiengjeppu yelinglak yang. Numan-e iman jing wümjonglan mengtam lakyang.’ Hüpoi Taowe hanghe ngaowe tam numan-e yeling; numan-e nyongküleih pahi lingteki!

³Tüokhei sha-a Taowe inang, numan sheshao mepu Taowe iman yejang teilak; hüpoi numan jingne iman-a wepane menglak, hüyange iman kahwanglan numan jingne jhom ja ne ngohlak.”

⁴Aope Youngwanpa shongmokpawe tüolan ngao ngaoya peih, Israel kahtalan khongkümpu üngwün-e shapne ükong wang.

⁵Tüojingne iman-e tüopa kahmükte Bokim she nyik, hüyange tüome iman-e Youngwanpate toidopu pha.

⁶Joshuawe Israel kahtalan yoi yoi lamte yan taine tam, hüyange kahta lili yoi mothlei ngohpu kahmük yahlak jingne yan tai.

⁷Hüyange Joshua üyin me ngohpu mongme, hüyange lwngmeilan aoyin Joshua phei me üyin ngoh; hüyange aoyinne Youngwanpawe Israel jingne toi üyong lingpu nge, iman jin khongküm pume Israel kahtalan-e Youngwanpa shaoshan.

⁸Nun üha Joshua Youngwanpa shaoshanpa, nyupuh wangpeng gho ja phei me pen me li.

⁹Tüokhei iman-e Gaash kahtang apyekao Ephraim phaotang kahmük me, I yoi mothlei Timnath-heres yikeng phang me I mu.

¹⁰Hüyange tüopa jin khongkümpu yoi payimlan tangte jem; hüyange iman phei me Youngwanpa yeshingpu yejema-a Iye Israel jingne lingpu yeshingpu jin ja ngai.

¹¹Tüophei me Israel kahtalan-e Youngwanpa sheshao me hanghe ünu hatüo ling, hüyange Baal shaoshan.

¹²Hüyange iman Egypt kahtok mepu woiye ngaipu, imanjing pajeiyonglan Kahwang, Youngwanpa winne tüoh, hüyange ülao kahwang pheite woi, iman neikon-e ngohpu kahwanglan, hüyange iman nying nyingke tüolante ümme khüm; hüyange iman-e Youngwanpa mongshih ngaine tam.

¹³Iman-e Youngwanpa winne tüoh hüyange Baal hüyange Ashtaroth shaoshan.

¹⁴Tüokhei Israel phei tüi-e Youngwanpa mongshih ngai, hüyange nyieye yahpalan te iman nyieyah ne tam, hüyange Iye iman wepa neikon-e ngohpalan yak me iman yüo, tüokhei shaaji iman-e wepalan sheshao me yeyong ok.

¹⁵Hangke tingme iman shapju jingne yayonglakei, Youngwanpa yak-a iman phei tüi-e ünu linglak jingne ngoh yangki, hüke Youngwanpawe deingao phapuke, hüyange hüke Youngwanpawe imante jiengpuke, hüyange iman shaoshi yatengpu ngoh yangki.

¹⁶Hüwante Youngwanpawe kahpalan ngaine tam, aoyinne iman nyieye yahpalan wong mepu iman yin.

¹⁷Hüke lingyapeyoi iman-e kahpalante-o ngao yejai; hangjingne ülao kahwang pheite iman-e nuweshak-e tai, hüyange iman nying nyingke imante khüm; iman pajeiyonglan aoyinne Youngwanpawe ngaowe tampu lamnyu me kempu mepu, jinlalan iman mamshe leih ye, hüyange iman-e hüke yeling.

¹⁸Hangkih tingme Youngwanpawe iman jingne kahpalan ngaitam, hüwante kahpalan phei Youngwanpa ngohyangki, hüyange iman wepa yak mepu kahpalan jin hipak khongküm pume yin; hangjingne aoyinne iman shaoshi ne tam hüyange shangne tam, tüopa jingne wao-epu ngaowüng jaiye Youngwanpawe shüpsheye teih.

¹⁹Hüpoi hangkih tingme kahpalan li, iman leihye mah, hüyange iman payimlan phei shemeng she ling, ülao kahwang pheite taiye, iman shaoshan-e imante khüm; iman-e linge yahpulan mepu yejema-a iman mongjang wanpu lamnyu mepu iman yelak.

²⁰Tüokhei Israel phei tüi-e Youngwanpa mongshih ngaipu loong; hüyange Iye i, “Tüopa kahtalan-e Taowe iman pajeiyong lante ngaowe tampu ü-jiengjeppu mengteki, hüyange ü-ngao yejaipu khei,

²¹Taowe-o sha-a me peiye Joshuawe I li eipe tüohpu jat ja nehoi iman sheshao mepu yejang teilak.

²²Tüopawe hüke iman pajeiyonglan lingpuke Youngwanpa lamnyu me kentinge kemlak heiya yejema-a yekemlakei, Taowe Israelte tok-e leilak.”

²³Tüokhei tüolan jat lanshepa-a yejang teipe Youngwanpawe tüoh, hüyange Iye iman Joshua yakme-o phünne yepha; yejema-a Joshua liphei me-o Iye mamshe jange yeteitam.