Read Konyak Naga KAHPALAN 20 Bible Online

KAHPALAN 20 - Konyak Naga bible

KAHPALAN 20

¹Hüwante Israel kahtalan khongkümpu Dan mepu Beersheba ngoiye ngai, Gilead kahtok omme, Mizpah me Youngwanpa tangte, kahta mongja ne mengyange ükhong jem.

²Hüyange Israel nokphonglan bangnyuha tangme woipa ne mengpalan Kahwang kahtalan jemjing ken me iman nying nyingke om, yanglow pheipu, ya pheipu wetaipalan lakh peli ngoh.

³Hüwante sha-a Benjaminlan-e ülao Israel kahtalan khongküm Mizpahte ongteki she jai. Hüyange Israel lan-e tong, “Tüopa ümeng toi-a hangke ngai tomante itehu!”

⁴Hüyange Levipa aowe shekonyu toiyapei tüopa netanpawe jan-e i, “Tao Benjamin jing Gibeahte lai, tao hüyange ü-phongphenyu pümlak jingne lai.

⁵Hüyange Gibeahlan ü-phei tüi-e yong, hüyange yaning tao ngohpu nok neikon-e nokte shüm; iman-e tao toilak jingne pei, hüyange iman-e ü-phongphenyu nyieyetai hüyange kange jon, yha liteki.

⁶Hüyange taowe ü-phongphenyu yahpei hüyange khoihnyai teh, hüyange Israel mothlei kahmük khongkümpute yha meiphin shonne tei; hangjingne iman-e Israelte nulakpa hüyange nuweshak-e jonteki.

⁷Tüokhei sha-a numan Israel khongkümpu, ngao ngaitüoh hüyange numan juteih phakei.”

⁸Kahta khongküm kahta ja kih-e yayong hüyange i, “Teman she ja nehoi yoi nyenok yam-e yetailak, yejema-a teman ja nehoi yoi nokte leih yeyelak.

⁹Hüpoi sha-a Gibeahte teman-e hatüoke linglak. Teman-e imante shümlak jingne phong yenglak hüyange kahtalan leyange ükhong ükhong onglak;

¹⁰Israel nokphonglan khongkümpu mepu ghoja lep iye pen, hüyange haja lep iye gho ja, hüyange haja pen lep iye haja ja, wetaipalan jingne hahying yahpeilak nanjingne ngohlak, hüyange ülaolan-a Israel tangme iman-e nuweshakpu toilinge tamyangpu jingne Gibeahte shaoshi phalak jingne onglak.”

¹¹Tüokhei Israel netan khongküm kahta ja ne mengyange, chingnyute shüm-e ching hahlak jingne jem.

¹²Israel nokphong lan-e Benjamin nokphonglan khongkümpute ngoiye kahta shon-e i, “Numan yo me hatüo hanghetoi ümeng ngaipu?

¹³Sha-a Gibeah me ngohpu angsa kahtalan-a toman-e iman li ne tamlak hüyange Israel mepu ünu yahteilak jingne iman-a lantam pha.” Hüpoi Benjamin lan-e iman jeiheinao Israellan ngao yeyah.

¹⁴Benjaminlan Gibeah chingnyulan mepu, khongküm yoi jeiheinao Israel phei tüi-e wehok te tailak jingne jamshe jem.

¹⁵Tüopa nyih me chingnyulan mepu Benjamin nokphonglan yanglow jonpalan haja da me wok tümmeta, hatüo me Gibeah mepu gho nyit tümme tapu ye-om.

¹⁶Gibeah mepu tüolan-a khongkümpu yo mepu yaknya kahta hüyange leyangphei kahta gho nyit ngoh yangki; kahta liliye shangmin ja nehoi yeshaipe long shüplak okke ngohyangki.

¹⁷Hüyange Israel kahtalan Benjamin ye-ompe yanglow jonpu tümme tapulan-a lakh peli ngoh yangki; tüolan khongkümpuwa wehokpu kahtalan.

¹⁸Israel kahtalan yayong hüyange Bethel te ong, hüyange Kahwangte tong, “Benjaminlan phei hoklak jingne toman ao üwangne onglak shi?” Hüyange Youngwanpawe jan-e i, “Judah üwangne onglak.”

¹⁹Hüwante Israellan shomme shonge yayong hüyange Gibeah chingnyu shongme lakjing ling.

²⁰Hüyange Israel lan-e Benjamin phei tüi-e hoklak jingne tai; hüyange Israel lan-e Gibeahlan phei hoklak jingne khüng lenge yong.

²¹Hüyange Benjaminlan Gibeah mepu ngai, hüyange tüonyih-a Israellan haja da me ni mah ne tam.

²²Hüpoi Israel kahtalan-e wongnange muh yong, hüyange üwangpa nyih khünglenge yongpu nyoi me wehoklak jingne hüke muh yong.

²³Hüyange Israel kahtalan Youngwanpa tangte ong, hüyange ünpong te ngoiye shap, hüyange Youngwanpate tong, “Toman jeiheinao Benjaminlan phei tüi-e toman-e wehok hoklak üne-o tailak jeya?” Hüyange Youngwanpawe jan-e i, “Iman phei tüi-e ongtüoh.”

²⁴Tüokhei Israel kahtalan-e Benjaminlan phei tüi-e ni shepupa nyih pei.

²⁵Hüyange nishepupa nyih-o Benjaminlan iman phei tüi-e Gibeah mepu ngai, hüyange Israel kahtalan haja pen me tet kahtokte toitaine tam; tüolan kahta khongkümpu yanglow jonpa lan-e ngoh yangki.

²⁶Hüwante Israel kahta khongküm, wetaipalan khongkümpu, Youngwanpa tangte ong hüyange Bethel te pei hüyange shap; iman tüome Youngwanpa sheshao me shot, hüyange ünpongte ngoiye tüonyih-a nyaowele; hüyange Youngwanpa sheshao me jakke dopu hüyange chingmei dopu pha.

²⁷Hüyange Israel kahtalan-e Youngwanpate tong, (hangjingne tüolan nyih hipak me Kahwang phei jiengjeppu ghonu tüome ngoh,

²⁸hüyange Aaron üha Eleazar hayim Phinehaswe tüopa tangme tüopa nyih hipak me shaoshan) hüyange i, “Üne-o toman-e toman jeiheinao Benjaminlan phei hoklak jingne onglak heiya, yejema-a laklak shi?” Hüyange Youngwanpawe jan-e i, “Ongtüoh, hangjingne ngainyih pa-a taowe numan yak me iman phalak.”

²⁹Tüokhei Israel lan-e Gibeah neikon-e dodowe tan.

³⁰Hüyange Israel lan-e nyih lüm shepupa Benjaminlan phei tüi-e ong, hüyange üwangpa ün me lingpuke Gibeah phei hoklak jingne khünglenge yong.

³¹Hüyange Benjamin lan-e kahtalan phei hoklak jingne lüowe ngai, hüyange chingnyu mepu yan-e ngaiye ngohyangki; hüyange lintepu hipak kih-e iman-e wengtuh shongme, Bethelte ongpu yekao me, hüyange Gibeahte taipu yekao me chingkeng lamnyu me, Israel kahta delüm nanjingte met hüyange toine ükong wang.

³²Hüyange Benjamin lan-e i, “Üwangpa kih-e muh, iman teman sheshao me mahnang.” Hüyangpoi Israel lan-e i, “Teman-e yan-e taiye hüohah, hüyange chingnyu mepu iman noshe wehok shapju te peine tamhah.”

³³Tüokhei Israel meinyu ükhonga shinne yeyange Baaltamar me ja ne shüngyange tan; hüwante ülao Israellan dodoyange ngohpalan iman ngohpu nyoi mepu, hüke Geba mepu ngai.

³⁴Hüyange Gibeah phei hoklak jingne Israel khongkümpu mepu ngaipu haja pen pei, hüyange wehok shapjuwa yeonge wanne ngai; hüpoi Benjamin lan-e meiyange yengohpe imante wengtuh ne ngaikülak yeshingpe ngoh.

³⁵Hüyange Youngwanpawe Israelte Benjamin okne tam; hüyange Israellan-e tüonyih-a Benjaminlan haja da me nga phei me gho ja mahtam; tüolan khongküm yanglow jonpalan shaha ngohyangki.

³⁶Tüopheime iman-e ye-ok she Benjamin lan-e shinge pei. Israellan ükhong meinyuwe Benjaminte imante jange ngaine tam; hangjingne Gibeah neikon-e dodoyange tüohpulante iman-e monghüm.

³⁷Hüyange dodoyange ngohpa lan-e mamshe Gibeahte shümme jange ngai hüyange chingnyu khongkümpuwa yanglow phei lange tam.

³⁸Hüyange Israellan hei dodoyange ngohpalan nipa me füojai teingao puwa iman-e chingnyute vünkhuh üyong ngaiye tamlak ngoh yangki.

³⁹Hüyange Israellan-e shapju me ngaiye yong, hüyange Benjaminlan-e ülao Israel lante okne tam-e kahta delüm nanjing toine ükong wang; hangjingne iman-e i, “Ütingme üwangpa shapju kih-e iman teman sheshao me toita nang.”

⁴⁰Hüpoi aope chingnyu mepu vünkhuh shongnyu ne menge nyeitoiloi ngaiyapeih, Benjamin lan-e iman tokphei te lei, hüyange leihu, chingnyu nopu mepu vünkhuh ngaiye wangte ong.

⁴¹Hüwante Israellan lüppeye, hüyange Benjaminlan mokh ne tam; hangjingne iman tangme wengtuhwe ngoiteki she ngeye ok.

⁴²Tüojingne Israellan sheshao me tokphei lüpyange phao yekaote lüp; hüpoi shapjuwe iman kemyüo, hüyange aoyin chingnyu mepu ngai iman-e üpa me mahtam.

⁴³Benjamin lante iman-e neikon-e shüm, hüyange imante jange tai, hüyange heongye Gibeah sheshao ngoiye Nohah me toipoiloi lange tai.

⁴⁴Hüyange Benjaminlan haja pen me tet mahtam; khongkümpu wongnangpu kahta shaha ne ngoh yangki.

⁴⁵Hüyange iman-e lüppe ye hüyange phao yekaote Rimmon long yamme phet; hüyange iman haja nga pa-a shapju me toi, hüyange iman Gidom ngoiye woiye jang, hüyange iman haja ni toitam.

⁴⁶Tüokhei tüopa nyih me Benjamin lan yanglow jonpu toipu khongkümpu haja da me nga; iman khongkümpu wongnangpu kahta shaha ne ngoh yangki.

⁴⁷Tüoyangpoi kahta gho wok pa-a yinpu ok, hüyange phao yekaote Rimmon long yamme phet, hüyange Rimmon longnyu me lekeng peli ngoh.

⁴⁸Hüyange üne-o Israel lan-e Benjaminlan phei tüi-e lüppe ye, hüyange yanglow phei kahta hüyange tampu yinmok hüyange iman-e ngepu khongkümpu toi. Hüyange iman-e ngepu chingnyu khongkümpu te vün pahtam.