Read Konyak Naga KAHPALAN 21 Bible Online

KAHPALAN 21 - Konyak Naga bible

KAHPALAN 21

¹Sha-a Israel lan-e Mizpah me, “Teman aowe-o yoi yhala Benjaminte shekonyu ne menglak jingne yephalak she jiengjep.”

²Hüyange kahtalan-a Bethelte pei hüyange tüoken me Kahwang sheshao me ünpongte ngoiye shot, hüyange iman ngao üyong ngaiye shap.

³Hüyange iman-e i, “O Youngwanpa Israel Kahwang, Israel me tenyih nokphong jawe yewangpe ngailak ne hatüo hangne Israelte ngaipu shi?”

⁴Üne nap kahtalan shonge yonge, hüyange tüome wümjong ling, hüyange jakke dopu hüyange chingmei dopu pha.

⁵Hüyange Israellan-e i; “Israel nokphonglan ükhong jempu nyoite Youngwanpa tangte yeongpu Israel nokphong yo me ao ngohnang shi?” Hangjingne Youngwanpa tangte Mizpahte ao yeonglakei, I jeng jiengjeppu üyong ngoh yangki, hüyange i, “I ütingme li ne tamlak.”

⁶Hüyange Israel kahtalan-e iman jeiheinao Benjaminlan jingne yeonge shüpsheye teih hüyange i, “Tenyih Israel mepu nokphong ja mahtam teki.

⁷Iman towe ngohpulante sheko yahtamlak jingne teman-e hanghe linglak, hangjingne teman yhalalan shekonyu ne menglak jingne yephalak she Youngwanpa min iye jiengjep yangki.”

⁸Hüyange iman-e i, “Israel nokphong yo me Youngwanpa tangte Mizpahte ye-ongpu ngohya shi?” Hüyange leihu, Jabesh-gilead mepu lakpu ükhong jemjing te ao-o yepei.

⁹Hangjingne aope kahtalan tüm-e tawe min nyikyapeih, leihuyah, tüome Jabesh-gilead me ngohpalan ao-o yenangpe ngoh.

¹⁰Tüokhei ükhonge tüome wong shenangpupa kahta haja pen me ni shon, hüyange imante ngaowe i, “Taitüoh, hüyange Jabesh Gilead me ngohpalan yanglow phei sheko hüyange üjoilan-o omme toitüoh.

¹¹Hüyange numan-e hatüo linglak yang; numan-e netan lili hüyange netan phei shingte phei sheko lili jaoshe-e mahtam tüoh.”

¹²Hüyange iman-e Jabesh-gilead me ngohpalan yo me netan phei manpang nyüopu wangngoipu yhala gho peli tüo; hüyange Kanan me ngohpu Shiloh lakjingte iman-e tüolan-a woipei.

¹³Hüyange Rimmon long me ngohpu Benjamin kahtalante bangha khongküm puwe ngaolan shon, hüyange imante chingmei pongetam.

¹⁴Tüo hipak me Benjaminlan leihye; hüyange iman-e Jabesh-gilead shekolan aoyin üyin me yinne ang, imante shekonyu ne pha; tüoyangpoi iman jingne tüolan-a yepük.

¹⁵Kahtalan-e Benjamin lan jingne shüpsheye teih, hangjingne Israel nokphong yo me Youngwanpawe yakpa ja ngaitam.

¹⁶Hüwante ükhong lwngmei lan-e i, “Benjamin mepu sheko mahtam yangpu khei, towe ngohpulan jingne shekonyulan jingne hangke ilak?”

¹⁷Hüyange iman-e i, “Israel mepu nokphong ja yewintamlak jingne iman jingne, Benjamin mepu phette taipu mothlei japa-a ngohlak yang.

¹⁸Tüoyangpoi teman-e teman yhalalan mepu shekonyu ne menglak jingne imante yephalak.” Hangjingne Israel kahtalan-e jiengjeppe i, “Benjaminte aowe shekonyune phalakei, I phoiwümpu shahtüoh.”

¹⁹Tüokhei iman-e i, “Leihuyah, Shiloh me wangpeng lep iye Youngwanpate mo ja ngohnang, tüopate Bethel henyipye, Bethel mepu Shekhemte ongpu yeme heongyekao me hüyange Lebonah heongye me jemlak ngohnang.”

²⁰Tüokhei iman-e Benjamin kahtalante ngao phawe i, “Taitüoh hüyange wuwünglick kah me lowe ngohtüoh;

²¹hüyange leihuyah, Shiloh yhalalan polokpu nyoite polokke ongkülak, hüwante numan wuwünglick kah mepu ngaitüoh, hüyange numan kahta liliye Shiloh yhalalan yoi shekonyu ne menglak photüoh, hüyange Benjamin kahtokte leihyah yetüoh.

²²Hüyange aope iman payimlan hüyange jeiheinaowe toman tangte peiye ngao ngailakei, hüke toman-e imante ilak, chingmei lamlinge iman tomante angtam pha; hangjingne wehok me iman mepu kahta lili jingne toman-e shekonyu yeyah; yejema-a numane-o imante iman yepha; hüke yeje shihma-a sha-a numante ümeng neakke ngohhah shepu!”

²³Hüyange Benjamin kahtalan-e hüke ling, hüyange iman shangtoi phei shuwe, aoyinne polok hüyange aoyin iman-e phowe yah, shekonyu ne iman-e yah; hüyange iman tai hüyange iman mothlei yam-e ye, hüyange chingnyulan linge ye, hüyange tüome chingnyoi.

²⁴Hüyange Israel kahtalan-e tüopa hipak tüopa nyoi mepu yan-e tai, kahta lili yoi yoi nokphonglan hei nyahtap tangte, hüyange iman kahta lili yoi yoi mothlei yam-e ye.

²⁵Tüolan nyih hipak me Israel me ahngpa yenangpe ngoh; kahta liliye yoi mongpuke hei ngohyangki.